شو حاب تحكي؟

خلّي رسالتك لطيفة وبنّاءة

صورة، صوت أو فيديو · حتى 10 MB

لن تظهر رسالتك للعامة إلا إذا نشرها صاحب الحساب.

أسئلة المستخدم

لم ينشر أسئلة بعد.

الرسائل المنشورة

  • رسالة منشورة

    أمي يدون سبب لقيتها بتزعق فيا جامد وبتقولي بكرهك بكرهههكك وتزعق وهي بتقولها وتكررها
    وأنا مش فاهمة لحد دلوقتي هي ليه عملت كدا
    ومن يومها لا قادرة أحبها ولا أثق فيها ولا عارفة أتعامل معاها زي الأول كانت أقرب وأحب حد ليا
    ممكن تقوليلي اتخطى دا ازاي

    • إبلاغرد صاحب الحساب

      فيه مثل بيقول اذا عرف السبب بطل العجب
      اكتر حاجة تفرق بين الناس هو اننا مبتصارحش
      مبنتعاتبش
      مبنقولش اللي في قلبنا لبعض
      ولما بنختلف ولا نتخانق كل واحد ياخد جمب ويخاصم من غير ما يحاول يفهم ولا يعرف غيره اتصرف كده ليه ولا في قلبه ايه
      اقعدي معاها قعدة ود وصفا وصارحيها باللي في قلبك وقوليلها انك زعلانه

  • رسالة منشورة

    طنط سامية انا عندى 13 سنة و كان معايا فون عليه نت كنت بلاقى فرصة اتفرج على حاجات مش كويسة كتير بس ماما اخدت منى الفون فترة كبيرة لما عرفت بس رجعته تانى و اصلا لما بلاقى فون اخويا كنت بفتح منه بردو ماما عرفت و لغت النت خالص و انا قولتلها انى سمعت ان ده ادمان بقيت بصلى و برسم كتير لكن بردو مش واثقة فى نفسي انى لو فيه نت هفتح تانى قوليلى اعمل ايه و ماما تساعدنى ازاى بعد اذنك

    • إبلاغرد صاحب الحساب

      انت اجمل بنوته
      رسالتك الجميلة دي خلتني سعيدة جدا
      عندك وعي عالي ومبينضحكش عليكي ومثقفة
      وقدرتي توصلي بنفسك لاجابة السؤال
      ايه اللي يضرني وايه اللي ينفعني
      وعرفتي ان ماما مش قصدها تضايقك ولا تزعلك لكن خايفة عليكي وبتحميكي
      فعلا رأيك صح ده ادمان
      وبييجي لكل الناس مش انت بس
      الادمان هو التعلق بشيء مضر زيادة عن اللزوم لدرجة اننا نحس ان منقدرش نستغنى عنه
      ولو اتحرمنا منه لفترة بتجيلنا اعراض وكأنها اعراض الانسحاب من الادمان
      احنا الكبار وفي كل الاعمار ممكن يجيلنا ادمان
      وممكن نمر بالمرحلة دي فترة من الوقت
      وممكن منقدرش ونسقط في الامتحان وكل ما نسيبه نرجعله
      انت الحمد لله بفضل الله ثم بمساعدة ماما قدرتي تتغلبي على الادمان وكنتي اقوى من ناس كتير مقدروش
      انت بطله
      شعورك انك مش واثقه في نفسك انك ممكن ترجعي للادمان تاني ده صحيح جدا
      انت ماشاء الله عندك وعي عالي بذاتك وذكاء مشاعر وبتفهمي وتحللى شخصيتك
      عشان كده انت بنفسك اللي هتقدري تقرري امتى ممكن ترجعي تمسكي الفون والنت من غير متدمنيه
      وهل هتقدري تتغلبي على ضعفك قدام الفرجة على الافلام ولا لا
      مش هقدر اقولك امتى هتقدري تتغلبي على الادمان وترجعلك ثقتك بنفسك
      لكن هقولك حاجة تانية
      صلي كتير لربنا صلي الفروض وفي اخر اليوم بعد العشا صلي ركعتين قيام وادعي ربنا يحفظك ويثبتك
      وربنا هيستجيب ويديكي القوة والثبات
      اشغلى نفسك بحاجات تحبيها زي الهوايات والرياضة
      اشغلى نفسك بحاجات تفيدك وتفيد الناس
      اخرجي بره الحياة الافتراضية واشركي نفسك في حياة حقيقية
      زيارات.. اصدقاء.. انشطه اجتماعية.. تحمل المسئولية
      رعاية مامتك واخواتك والاهتمام بشئونهم ومساعدتهم في حل مشاكلهم
      خليكي انت الاخت اللي بتحل المشاكل والكل بيعتمد عليها
      شوفي بتحبي تهتمي بأيه كمان
      بتحبي النباتات
      ازرعي في البيت نباتات ضل ونباتات شمس في الشباك والبلكونة
      نباتات عطرية وزهور بتغير مود البيت خالص وتديكي طاقة ايجابية
      بتحبي الحيوانات ممكن تجيبي قطه وتربيها
      احلى احساس لما تحسي انك مسئولة عن غيرك وبتراعي كائنات ضعيفة محتاجالك
      ده هيشغلك ويخليكي تحبي الحياة
      لو بتحبي الفرجة والافلام
      اتفرجي على التليفزيون او حملى الفيلم واتفرجي اوفلاين واختاري افلام مفيدة وممتعه
      عشان متعرضيش نفسك للنت
      كلمي اصحابك فون مش نت
      وانزلى اخرجي معاهم
      اتفسحي وروحي متاحف وحدائق
      انا زرت متحف محمد علي في المنيل
      جميل اوي اوي وراقي وممتع بصريا وحاجة اخر فخامة ورقي
      شوفي ايه المزارات السياحية والطبيعية القريبة منك وروحيها وشوفي بلدك بشكل مختلف واستمتعي بيها
      ده هيخلى عندك ثقافة عالية جدا وهيوريكي جانب تاني من الحياة اوسع بكتير من اننا نسجن نفسنا في عالم الموبايل الضيق جدا
      فكرى مع ماما ازاى تساعدي غيرك
      ممكن تعملى وجبة للفقراء وتديها لحد محتاج ااو تعملى عصير فريش متلج وتحطيه في ازايز وتديها لعامل نظافه واقف في الشمس طول النهار
      عشان بتساعدي نفسك وبتساعدي غيرك ربنا هيكافئك ويساعدك وهيفتحلك ابواب للخير مكنتش على بالك
      وكمان هيلهمك بافكار اكتر واكتر

  • رسالة منشورة

    حقيقة العلاقة بين بابا وماما من أسوأ ما تكوين اهمال واهانة بالالفاظ وعدم احترام وليا اخين كبار اتخرجوا وانا في الجامعة وللاسف ماما جابت اخت المفروض هتروح kg 2 السنة دي مع سوء العلاقة بينهم. اللي مضايقني من ده كله ان اللي مبهدل هي اختي الصغيرة دي لا اهل تروح لهم عشان علاقتنا بهم مش كويسة ولا عندنا اصحاب تشوفهم وتلعب معاهم ودايما قاعدة في البيت ومفيش حضانات حلوة وعشان بابا عينه بتاخد شوية في اللي حواليه فماما دايما بتخبي حاجة اختي عن بابا زي اللبس الحلو او حتى تسريحة حلوة لو لعبة جديدة حلوة لو مذاكرتها وكتبها وقصصها فدايما اختي تطلبها ومبنلاقيش عذر اقول لها لو بابا موجود وفعليا بابا عينه بتاخد شوية وحرفيا انا مقهورة على اختي اوي انا عارفة ان ربنا له حكمة كبيرة اوي ان يجيب لنا طفلة جديدة في بيت العلاقة بين زوجين فيه مفيهاش اي احترام بس انا كل لما ابص لاختي احس بالذنب عشانها 😪

    • إبلاغرد صاحب الحساب

      كلنا كبشر ابتلاءات لبعض.. باباكي ابتلاء لمامتك ومامتك ابتلاء لباباكي وهمه الاتنين ابتلاء ليكم كلكم وانتوا كلكم من اصغركم لاكبركم ابتلاء ليهم
      واكبر امتحان ليكم كلكم هو اختك الصغيرة
      ربنا بعتهالكم عشان يشوف هتعملوا معاها ايه كلكم
      امي دايما تقول الحمد لله ان فيه اخره وحساب
      هناك كل واحد هياخد حقه بالميزان لا زيادة ولا اقل
      هناك اللي قصر في الامانة واللي ضيع رعيته واللي فرط في القوامة واللي ضيعت حق جوزها واللي ضيعوا حق الاب والام واللي اهملوا ضعفاءهم
      كله هيتحاسب وكله هدفع من حسناته او يشيل على راسه ذنوبه
      متسأليش ليه ربنا رزقكم بأخت في الجو ده
      رزقكم بيها عشان تبقى امتحان ليكم مين هيعاملها كويس ويراعيها بما يرضي الله
      ومين هيقصر في حقها ويهمل في تربيتها ويشيل ذنبها
      موعدنا الاخرة
      ويارب نفوق قبل ما نقابل ربنا بذنوبنا وتقصيرنا في حقه وحق عباده

  • رسالة منشورة

    السلام عليكم
    انا عندي ١٤ سنه و كنت بلبس بنطلونات و كدا بس الحمدالله بطلت ألبس بس بلبس احيانا بنطولن يعني بس بيكون على حاجه طويله المهم ف لبسي كلو يعتبر جيبات و ديرسات و حاجات واسعه و انا حابه شكلي بيهم خالص
    بس اصحابي بيقولوا أن الجيبات و الحاجات دي مكبراكي اوي البسي بنطلونات عادي زينا و انا قولتلها. أن دا المفروض كلنا نعملوا و أن اصلا غلطت البنطلون
    قالت طب ما البنطلون واسع (هو مكنش واسع اوي بس مكنش ضيق على الجسم) قولتلها بس طالما دا محدد جسمك و محدد رجلك يعني أن دي رجل و دي رجل
    المهم و قفلت على الموضوع
    بعدان واحده صحبتي تاتب غيراها كنا هننزل و كدا و قالت ألبسي البالغ الفلاني على البنطلون و نطقك سوا قولتلها مش بحب البنطلونات قالت ايه دا ايه بالعكس البنطلون احلى و نريح اكتر من الجيبه و كمان الجيبه بتكبرك قولتلها ماشي او اي حاجه و سكت على الموضوع
    انا مش عارفه ارد عليهم بأيه عايزه ارد عليهم رد علشان مفتوحش الموضع دا تاني
    معلش طولت عليكي

    • إبلاغرد صاحب الحساب

      وعليكم السلام
      طيب انا عاوزه حد يفهمني برد منطقي
      ليه الجيبه شكلها بيكبرك وليه البنطلون شكله مبيكبركيش🤔
      هل هذا منطق!!!!!
      طيب انا كل ما اروح مصلحة حكومية ولا شركة خاصة اشوف فيها موظفات من سني ولابسين بنطلون
      يعنى فيه ستات كبار بيلبسوا بنطلونات ولابسيط طرحة
      يبقي ازاى الجيبه بتكبر الشكل والبنطلون مبيكبرش الشكل!!!!
      ولا ست الكتكوته اللي بتعلقك على زوقك في اللبس عاوزاكي تمشي على مزاجها وتلبسي على زوقها هي وتلغي شخصيتك وزوقك
      بصي حبيبتي
      المفروض الاصدقاء يحترموا اختيارات بعض وزوق بعض
      اصحابك لابسين بنطلون وانت متكلمتيش ولا قولتلهم بلاش تلبسوا بنطلون عشان خايفة عليكم تشيلوا ذنوب وسيئات
      اوم ايه بقى
      اصحابك الحلوين يفرضوا زوقهم الشخصي عليكي بدون اياتوها تلاتين لازمه وبيقنعوكي تلبسي زيهم وتسيبي شخصيتك على جمب وتمشي مع القطيع
      طيب ليه!!!
      انت اختيارك انك مش تلبسي بنطلون له منطق وله سبب مهم انك مش عاوزه تشيلي ذنوب
      لكن همه لما يلبسوا بنطلون ويشيلوا ذنوب
      ده فيه منطق!!!!
      احتفظي بشخصيتك ومتخليش حد يلغي كيانك ويفرض رايه وزوقه الشخصي عليكي
      لو اصحابك بيحبوكي كانوا احترموا زوقك واختياراتك الشخصيه
      صاحبيهم وحبيهم بس عرفيهم حدودهم وان كلامهم بيضايقك ولازم يحترموا زوقك

  • رسالة منشورة

    السلام عليكم ورحمه الله وبركاته عاوزه نصيحه حضرتك أنا أمى ربنا يحفظها بخيله جدا فى الماديات وفى المشاعر طول عمرى يعانى من البخل والقسوة بس كنت بستحمل وعمرى ما زعلتها ولا صرحتها كنت بكتم جوايا عكس إخواتى الحمدلله ربنا كرمنى بزوج عوضنى عن كل شئ بحبه وحنانه وكرمه بس مازلت يعانى من كلامها يعنى أرن أطمن عليها تقولى جوزك مضيع فلوس وظيفتك على أبوه وأخواته دى ضاحك عليكى خدى مرتبك هاتى ذهب عمرها ما قالت ليا نصيحه تعنى على طاعه زوجى ولا تربيه أولادى وكلامها كله ضغط عليا

    • إبلاغرد صاحب الحساب

      وعليكم السلام ورحمة الله وبركاته
      طيب ايه رأيك تخلى تفكيرك ايجابي اكتر
      بمعنى
      انك دايما تفكرى ان النعمه اللي ربنا بيرزقك بيها سببها الاول هو تحملك لامك وعدم التساءة ليها
      وان كل ما تحملتيها وبرتيها ان شاء الله ربنا يرضى عنك ويكرمك في الدنيا والاخرة
      الفكرة دي هتريحك جدا

  • رسالة منشورة

    انا كنت في يوم مضايقه جدا و افتكرت حاجه في الطفولة ضايقتني اكتر ومن الزهق والزعل نزلت برنامج أقل ما يقال عنه انوا سئ جدا واتعرفت عليها على واحد وانا حبيت الشخص ده جدا وهو كمان قالي انوا بيحبني وميقدرش يستغني عني واحنا دلوقتي بقالنا شهر بنتكلم وهو حتي مش هينفع يجي يتقدم دلوقتي عشان انا لسه صغيره ودخله تالته ثانوي و انا فعلاً ولا تربيتي ولا ديني يسمحوا لي بكده بس انا فعلا حبيته اوي ومهما اسمع فيديوهات ونصايح عن الموضوع ده مش قادره ابعد عنو هو فعلاً عوضني عن حاجات كتير اوي وانا محتاجه افضل اتكلم معاها انا اه عارفه أن ده مينفعش بس عندي امل كبير انوا هيتجوزني

    • إبلاغرد صاحب الحساب

      حبيبة قلبي انت غالية اوي وعزيزة
      وزي ما قلتي فعلا انك متمسكة بالكلام مع واحد انت عارفه انه حرام بس مش قادرة تبطلي لان محدش بيعوضك عن شعور الوحدة اللي انت حاساه
      صلي كتير وادعي ربنا انه يتوب عليكي من التعلق بحاجة حرام
      ودوري في قرايبك او اصدقائق البنات على حد كويس يبقي صديق ليكي تتكلمي معاها وتتفسحي معاها وتبقي انتيمتك وتستمتعي معاها بوقتك وتعينوا بعض على الطاعة
      وتبقوا سند لبعض ومتحسيش معاها بالوحده
      وان شاء الله ربنا هيرزقك بيها
      بس اسمعي نصيحتي
      لما ربنا يتوب عليكي من الكلام الحرام مع شخص غريب اوعي تقولى لحد ولا تفضحي نفسك طالما ربنا ستر عليكي
      وخدي بالك وحاسبي
      متثقيش ابدا ابدا في حد غريب عنك
      اوعي تديله اسرارك
      اوعي تبعتيله صور ليكي
      اوعي تتكلمي معاه كلام يستغله ضدك
      اوعي تصدقبه لانه شخص غير امين وميعرفش دينه
      لو يعرف دينه هيخاف عليكي ويعرف ان كلامه معاكي حرام
      ربنا يحفظك يا بنتي من شر شياطين الانس والجن
      وان شاء الله يتوب عليكي من هذا الذنب
      صلي كتير وادعي ربنا

  • رسالة منشورة

    ازاي حضرتك ي استاذة سامية
    انا داخلة ع 20 سنة الحمدلله و متابعة حضرتك بقالي سنة و يمكن اكتر
    انا مهتمة جدا بالتربية و دي حاجة اقدر اقول انها من المواضيع المهمة و اللي بتجذبني جدا و انا متابعة ناس كتير بخصوص التربية
    كنت عاوزة بس اسأل حضرتك ازاي الواحدة يبقي عندها خطة واضحة او ع الاقل فيها الخطوط العريضة عشان تربي اطفالها بما ان التربية تشمل جوانب مختلفة و كتير جدا و هيبقي صعب ان الواحد يبقي ملم بيها من غير خطة
    كنت بس حابة اعرف رأي حضرتك ف الموضوع ده ♥️

    • إبلاغرد صاحب الحساب

      التربية مبتنجحش الا لو الاب والام الاول ربوا نفسهم
      بمعنى
      يهتموا جدا بأنهم يتعلموا دينهم لان التربية بدون دين مبتوصلش الانسان لاي شيء ومبتنفعوش
      يبقي اول خطوة في تربية ولادي اني اهتم قبل الزواج بتربية نفسي تربية دينية صحيحة
      وتاني اهم حاجة اختار الزوج اللي متربي و له نفس اهدافي عشان يساعدني في التربية وحتى لو مقدرش يربي معايا بسبب ظروف شغل او سفر فهو مش هيعوقني عن اهدافي في التربية لانها هتكون نفس اهدافه
      اما بقى اي حاجة بعد كده فهي تفاصيل ممكن نتعلمها او نحققها على قدر الاستطاعه وحسب ظروفنا