شو حاب تحكي؟

خلّي رسالتك لطيفة وبنّاءة

صورة، صوت أو فيديو · حتى 10 MB

لن تظهر رسالتك للعامة إلا إذا نشرها صاحب الحساب.

أسئلة المستخدم

لم ينشر أسئلة بعد.

الرسائل المنشورة

  • رسالة منشورة

    معنديش نصيحة ليكي يا حبيبتي بس عاوزة اقولك أنك مثلي الأعلى و نفسي أكون زيك في المستقبل ، ربنا يحفظك و يكرمك و يرزقك من حيث لا تعلمي " بحبك في الله "

    • إبلاغرد صاحب الحساب

      إن شاء الله تبقي أحسن مني، أحبك الله الذي أحببتني فيه 💗💗💗

  • رسالة منشورة

    عاوزه أقولك إنك من أحب الناس لقلبي، وبجد فخوزه إنى أتعرفت عليكى في يوم من الأيام، وديماً بتمنالك الخير لأنك حقيقي تستهلى كل خير، وبدعي ربنا ديماً أنه يوفقك في حياتك وتحققي كل أحلامك، وإن شاء الله أشوفك حاجه قيِّمة ومؤثره في المجتمع وديما كده بترشدينا للطريق الصحيح، بحبك في الله وأدامكِ الله عوناً لنا على طاعته💞💞

    • إبلاغرد صاحب الحساب

      أحبك الله الذي أحببتني فيه، آمين آمين يارب وإياك 🥺♥️♥️♥️

  • رسالة منشورة

    الصراحة انا مش بعرف اكتب كلام حلو وكده بس حبيت اقولك اني بحبك في الله وبحمد ربنا انه قدر ليا اني اكون معاكي في سنة من سنين الدراسة علشان اكون على تواصل مع حد جميل زيك وبيتفانى في الدعوة للتمسك بتعاليم الدين الصحيحة في زمن الفتن اللي احنا فيه ده بجد انا شايفة انك نعمة من نعم ربنا اللي انعم بيها عليا.. دائما لما بحس اني بعدت عن ربنا بلاقي ستوري منك كأنه رسالة ليا علشان ارجع تاني ،ربنا يجعله في ميزان حسناتك ويثبتك على الحق ويرزقك الخير حيث كان ويرضيكِ به ويجمعنا في الفردوس الأعلى يا رب ♥️

    • إبلاغرد صاحب الحساب

      الحمد لله كله بفضل ربنا والله، آمين آمين وإياك يارب ♥️♥️♥️

  • رسالة منشورة

    انا بحبك اوي اوي اوي يا بسمة بجد والله ❤ انتي انسانة جميله بطبعك وهداوتك وطيبة قلبك ، بجد انتي من اجمل الاشخاص اللي قابلتهم في حياتي كلها مش بس جمال الاخلاق لا .. جمال الطبع والشكل والاخلاق وجمال اللسان وصفاء الروح والقبل .. انا معجبه بكل حاجة فيكي بمعني الكلمة والله .. انتي بقيتي من الاشخاص اللي اقدر اقول عليهم مثل اعلي ❤ لما بتعملي حاجه بحب اعملها واقول للناس اعملوها عشان بسمة عملتها .. بجد ربنا يجازيكي خير علي كل حاجه حلوه علمتيهالي وكل حاجه حلوه عملتيهالي .. بتمني بجد انك تفضلي من الاشخاص اللي مش يخرجوا من حياتي ولو حتي بحاجه بتنزليها علي الحالة بتاعتك وده يكفيني بجد .. هفضل طول عمري ممتنه للكليه انها عرفتني علي شخصية زي شخصية بسمة محمد احمد رضوان ❤❤❤
    واحب افكرك تاني .. انا بحبك اوي❤❤❤

    • إبلاغرد صاحب الحساب

      ياحبيبتي ربنا يجعلني عند حسن ظنك🥺🥺♥️ شكرا بجد لكل كلامك اللي يدخل القلب ده مش عارفة أقول إيه، ربنا يبارك فيك ويسعدك ويوفقك لكل خير 💕💕

  • رسالة منشورة

    خليكي. زي ما انتي متتغيريش وداومي علي الاذكار وقراءة القران وادعية التحصين وخليكي ملكه بجمال نقابك وبروحك الجميله

    • إبلاغرد صاحب الحساب

      ربنا يجازيك كل خير ♥️♥️♥️

  • رسالة منشورة

    انا معرفش رد بيجى ازايه طيب انا بعتلك امبارح 😅😅 عموما من غير رد انا عارفه انك بتحبى الكل وهتاجلى شرح نهارده عشان رايحه عند حماتى 😂😂 أو هسرق نت عند حماتى واسيبهم واسمع شرحك 😂😂 مع انى كونت حضره اول مره شرحتى شعر بس دايما بحب اسمعك ربنا يوفقك يارب ويحفظك وهتفضلى دايما قدوتى 😍

    • إبلاغرد صاحب الحساب

      رديت عليك امبارح وبقولك تاني للأسف مفيش تأجيل😂💕 وعموما هو سهل ومش محتاج فهم معتمد اغلبه على الحفظ واحنا بس هنعدي عليه بسرعة كده♥️

  • رسالة منشورة

    بحبك جدا و نفسي نبقي صحاب و قريبين بس بحس انك مش عاوزه تتكلمي معايا و المشكله ان بحب اتكلم معاكي بس مش بلاقي منك دا و انا مليش صحاب بتمني يكون ليا حتي لو صاحبه واحده و قلبي واجعني ان لما اموت مش هلاقي حد يفتكرني 😢💔

    • إبلاغرد صاحب الحساب

      أنا مش عارفة انتي مين بس اتمنى أكون مزعلتكيش، ممكن تكوني بعتي وقت امتحانات أو كده فرديت باختصار مش معناه اني مش عايزة اكلم حد، اللي مش بحب اكلمه بس هو اللي أسلويه مش بيبقى حلو معايا فبنفر منه وأرد عليه ببود، لكن أكيد إن شاء الله انتي مش كده💕 ربنا يرزقك الصحبة الصالحة واستكثري من الأعمال الصالحة والصدقات الجارية الحاجات دي هي اللي هتنفعنا بعد موتنا وتؤنسنا في قبورنا، أما الصحاب فهم بشر في الآخر ممكن يفتكرونا اسبوع اسبوعين شهر شهرين وخلاص نتنسي بعد كده ومش هينفعنا إلا أعمالنا، ربنا يحسن ختامنا يارب 😢♥️♥️

  • رسالة منشورة

    الطبعه بتاعتك نوعها إيه وفي حدود كام وقوليلي مكان مضمون اجيبها منه وبتستخدميها في إيه ولو جايباها من السعوديه لو خليت حد يجبهالي هدفع جمارك كتير؟
    وياااااريت تعلمينا تصميم الجرافيك والطباعه والحاجات دي والتطريز وكل حاجه حلوه انتي بتعمليها

    • إبلاغرد صاحب الحساب

      الطابعة عندنا من زمان من ساعة ماكنا في السعودية جبناها من فترة طويلة، بس هي من شركة (Epson) جميلة وموفرة وحبرها بيقعد كتير ممكن تلاقيها هنا اكيد هتبقى أرخص مما لو جبتيها من برا..بالنسبة للتصميم دي بصراحة بحسها أمانة ومسؤولية مقدرش أعلم أي حد إلا لو كنت عارفاه كويس وعارفة إنه بيتجنب المخالفات الشرعية عشان ميستخدمهوش في صور ذوات أرواح أو حاجات غلط وآخد أنا ذنبه 🥺♥️♥️

  • رسالة منشورة

    مين بس اللي لعب في عقلك وقالك إن خزان الطاعات و الإيجابيات عندك ناقص ؟
    خليكي دايماً محافظة جدًا على سلامة قلبك ومتلتفتيش لأي حد يقول عليكي حازمة ومتشددة بالعكس أنتِ مستقيمة وحذرة💕 ، قلبك طيوب أووي والناس كلها بتحبك ، متفكريش ابدًا في حاجة زعلتك كان سببها عنصر بشري
    متأثرة بيكِي جداً بحبك في اللّٰة جدًا بسـمة كتير طبعاً بخاف عليكي و بدعيلك كتير وبزعل أووي لو حسيت أن حد قال رسالة على جروب القسم مثلا ممكن تزعلك،و أول ما انتِ تيجي وتفتحي وأقرأ ردك بيكون قصف جبهة كدة ببقى هموت من الضحك
    أرجو الله أن تكوني دائماً بخير أنتِ وكل أسرتك اللطيفة أسعد الله أوقاتك بكل ما هو جميل
    دمتي في رعاية الله وأمنه. بتوحشيني بسرعة أووي ، المهم يلا مع السلامة ،خلى بالك من نفسك 💗💗

    • إبلاغرد صاحب الحساب

      أولا طبعا طبعا قلتها وهقولها كتير مفيييش حد مننا كامل ابدا، كلنا مقصرييين ومقصرين جدا جدا كمان والله ربنا يعفو عننا ويرحمنا برحمته أعمالنا دي كلها لا تساوي حاجة والله 🥺🥺

      ثانيا أحبك الله الذي أحببتني فيه، وبالنسبة لردي هو مش قصف جبهة ولا حاجة بس أنا للأسف بنفعل بسرعة وبحاول أمسك نفسي، أحيانًا بتتمسك وأحيانًا بتفلت وأرد بقى 😂♥️♥️

      آمين لكل دعواتك وإياك يارب💕

  • رسالة منشورة

    بجد من الناس الي بحبها وبحب اشوفها متقدمه دايما وبحس انك محاط بهاله ربانيه وروحيه وروحك صافيه مش عارفه بس بحس ان ربنا بيبعتلي ناس شبهك فى الالتزام في مراحل حياتي علشان اعرف اني الدنيا لسه بخير كان عندى صديقك شبهك في الالتزام وانتقبت وحنا في تانيه ثانوى بس هى خدت جنب لوحدها زعلت جدا وخسرت ثقتي في بعض الصحاب لحد مقابلتك نفس طريقتها في الالتزام بس مختلف عنها في طريقتها صحيح معقدش معاكى كتير ومش صاحبتك اووى بس بحب اشوفك ونفسي ابقي متقدم زيك وربنا يوفقك علي تعبك وبيجزيكى عليه صحيح الصراحه في الاول قولت عليكى مبتحبيش تختلطى بحد اوي غير صحابك بس لما اتكلمت معاكى لاقيتك عادى كان سوء تفاهم وراح لحاله

    • إبلاغرد صاحب الحساب

      ربنا يسعدك ويوفقك ويسدد خطاك لكل خير ويرزقك دايما باللي يعينك على دينك ودنياك 💗💗💗

  • رسالة منشورة

    يابسمة أنتِ بجد من أرق وأنقي وأجمل الشخصيات اللي عرفتها في حياتي ، احنا مش بنتكلم كتير بس فعلا فعلا ربنا الاعلم انا بحبك اد ايه والله وفعلا لما ربنا بيحب حد بيحبب فيه الناس ، انت نعمة في حياة اي حد يعرفك والله وبشكر ربنا أولًا ثم الكلية والقسم اللي عرفوني عليكي ، بتعلم منك حاجات كتير جدًا والله وبحاول أطبقها في حياتي وببقي مبسوطة جدًا جدًا واللي متعرفش علي بسمة ناقصه حاجات كتير اوووي والله برجو من ربنا أننا نفضل أصدقاء حتي لو علي الواتس بس علشان فعلا يستفاد جدًا جدًا من حالاتك ، وكان نفسي اوووي تكملي المسيرة اللي كنتي هتبدئيها انت ومني في أول سنة لنا في الجامعة وهي حفظ كتاب الله كنت مبسوطة جدًا والله وبعدين لما وقفتوا زعلت بس الحمدلله اللي ربنا بيختاره أفضل ونفسي فعلا ترجعي الفكرة دي تاني ونحفظ ونختم ونبقي خير صحبة صالحة معينة علي الطاعة ....
    واخيرًا برجوا من ربنا يكتبلك كل الخير ويحققلك اللي بتتمنيه يارب ويسعد قلبك ويفرحك ياحبيبة قلبي ❤️❤️❤️❤️❤️❤️❤️❤️❤️❤️❤️❤️❤️❤️❤️❤️❤️

    • إبلاغرد صاحب الحساب

      طب أقولك إيه بس 🥺♥️♥️ ربنا يخليك يارب، ومتعرفيش يمكن موضوع القرآن اللي بدأنا فيه ووقف ده كان خيرة عشان أتعلم أكتر وأكتسب خبرة على يد شيخات ومعلمات، ونرجع تاني على أساس صحيح ونظام أفضل وإتقان أكبر، ربنا يجمعنا على الخير دايمًا يارب، وآمين لكل دعائك💕

  • رسالة منشورة

    نفسي اوي يا بسومة نفضل صحاااب علطول مع انك مش تعرفيني بس انا بحبك ونفسي تحفظني القرآن كله ونفضل عند بعض حتي بعد كليه♥️♥️♥️♥️♥️♥️♥️♥️♥️♥️♥️♥️♥️♥️♥️♥️♥️♥️♥️♥️♥️♥️♥️♥️♥️✨✨✨✨✨

    • إبلاغرد صاحب الحساب

      إن شاء الله ياقلبي نفضل مع بعض على الخير دايما، وربنا يفتح لنا أبواب بركته وتوفيقه💗💗💗

  • رسالة منشورة

    انا بحبك اوي يا بسمه❤️❤️

    • إبلاغرد صاحب الحساب

      أحبك الله 💗💗💗💗

  • رسالة منشورة

    بسمة ربنا يجزيكي كل خير ويجعل شرحك بميزان حسناتك انا عايزة استاذنك لو ينفح اسجل شرحك واسمعو وحدي انا ام لطفل ومش بقدر انزل الجامعة علشان صعب اسيبو عند حد الا لضرورة وبردو صعب اسمع الزووم وامسك الكتاب واكتب في الوقت المسائي وبياخد الفون مني والقلم وبعد بعيط علشان انا مش قادرة اعمل حاجة وعايزة اعدي الامتحان وبيروح عليا الشرح وانا بأمسّ الحاجة استفيد فلو تسامحيني اني اسجل والله العظيم محدش هيسمعو غيري وامسحو انا عارفة انك مالكيش ذنب وانتِ اساسا بتعملي كده لوجه الله وبتخافي ربنا بس انا فعلا متضطرة وانتي ردي عليا بينفع او لا بس انا هدعيلك ان رفضتي او قبلتي بس ارجوكي حطي نفسك مكاني ...

    • إبلاغرد صاحب الحساب

      أنا آسفة بس مينفعش بجد🥺♥️ أنا باخد راحتي في الكلام معاكم مش بتكلم برسمية وممكن نضحك أو نهزر أحيانا ومقبلش خالص إن حد يسمع صوتي غيركم، مهما كان الواحد حريص وعنده أمانة وانا عارفة كده بس منضمنش برضو ممكن اي حاجة تحصل بغير إرادتنا😢 فمعلش اللي يفوتك ذاكريه لوحدك ولو حاجة وقفت قدامك ابعتيلي على الواتس وأرد عليك إن شاء الله♥️♥️

  • رسالة منشورة

    بجد بحبك وبحب هدوءك وابتسامتك الجميلة وحبيت الجامعة بيكي والصحبه الجميلة الي معاكي وربنا يجازيكي كل خير يارب ديما ويارب نفضل أصحاب بعد الجامعة كمان لاني بجد بتشرف جدا لما تكوني صديقتي

    • إبلاغرد صاحب الحساب

      حبيبتي ربنا يجمعنا على خير دايما يارب♥️♥️♥️

  • رسالة منشورة

    متبعديش عنا بعد ما نخلص الجامعة🥺♥♥♥♥

    • إبلاغرد صاحب الحساب

      هبعد أروح فين😂؟ إن شاء الله نفصل على تواصل مع بعض والحمد لله على نعمة الواتس اللي مقرب لنا المسافات 😂💕

  • رسالة منشورة

    بصي هقولك على حاجه ولزم تصدقيني اول مره في حياتي اشوف اللهم بارك لنا متفوقه تحب تساعد زميلها يعني مثلا حد غيرك ممكن يقول انا اولي بالوقت ده اذاكره لكن انتي بتفرحي اووي لما تشوفي حد ناجح انا ساعت بحس انك ملاك موجوده معانا بلغلط بحس قدامك ان انا ولا حاجه في الدنيا نهائي انتي ليكي عليه افضل كتيره جداا مش عارفه اردلك جميلك ازي كفايا انك سبتينا في مدتين حاسه اني ضعت بحبك جداا حقيقي والله

    • إبلاغرد صاحب الحساب

      ده والله من فضل ربنا وتوفيق ربنا انا ولا حاجة لولا كرم الله🥺♥️♥️ هو اللي منّ علينا وأنعم علبنا النعمة دي وألهمنا اننا نذاكر ونراجع ونتعاون مع بعض وتفضل أيام لطيفة وذكرى حلوة مابيننا.. خلي توكلك واعتمادك كله على ربنا وهو مش هيخيبك ولا يضيعك ابدًا وهيرزقك من حيث لا تحتسبي ♥️♥️♥️

  • رسالة منشورة

    انا شايفاكي جميلة ف كل حاجة مش عارفة انصحك بإيه 😂💔 ممكن اقولك خليكي دايما زي ما انتي جميلة و زيدي جمال و كل حاجة حلوة بتعمليها و بتقربك من ربنا و بتنفعي فيها الي حوليكي ، و متيأسيش ابدا من اي حاجة مهما كانت الظروف و لا تحزني ❤❤
    انا بحبك جدا جدا كان نفسي اكون ساكنه جمبك علشان اشوفك علي طول او اكون حد من قرايبك علشان اشوفك علي طول برضه بس للاسف مبشوفكيش غير قليل اوي في الكلية و مبسمعش غير صوتك علي الزوم و بشوف الستوري بتاعتك و بكلمك ساعات في الشات 😂💔 المشكلة ان بكس بالنكد كل مفتكر بقي ان فاضلنا ترم و نخلص الكلية خالص ابقي مش مصدقة ان مش هشوفك تاني و ان مش هسمع صوتك و ليالي الشرح اللطيفة الي كانت بتفرحني و تسهل عليا و تحسسني بالامل 😅 احنا دفعة محظوظة بيكي جدا ما شاء الله عليكي انا بحبك اوي اوي من كل قلبي و بحسك بنتي اوي كده ربنا يحفظك و يحميكي😌❤❤❤❤

    • إبلاغرد صاحب الحساب

      مش عارفة أقولك إيه ولا إيه بس شكرا ليك على مشاعرك الحلوة دي كلها دخلت قلبي😂♥️♥️♥️ ربنا يجمعنا في جناته على سرر متقابلين كما جمعنا في الدنيا يارب♥️

  • رسالة منشورة

    بحبك جدا وبحب طريقتك وتشجيعك لينا سواء باستوري او بأي حاجه بتعمليها انا وانتي م اصحاب بس فعلا بحبك

    • إبلاغرد صاحب الحساب

      حبيبتي ♥️♥️♥️

  • رسالة منشورة

    بإذن الله ربنا ييسرلك اي امر صعب عليكي ويعينك على تحقيق كل شي نفسك فيه وبتسعي إليه
    اللهم اجعل الخير كله في ما هو اتّ
    انتي جميله وتستهلي كل خير وكل حاجه حلوه ربنا يحفظك ويعينك على طاعته ❤❤❤❤❤❤❤❤❤❤❤❤❤❤❤❤❤❤

    • إبلاغرد صاحب الحساب

      آمين آمين وإياك، ربنا يسعدك يارب💗💗💗

  • رسالة منشورة

    علي ما أظن مش أنتي اللي تحتاجي مننا نصائح ؛ وعايزه أقولك علي حاجه أنتي كده صح وخليكي كده أوعي تغيري أي حاجه فيكي شخصيتك تفكيرك قرارتك الصرامه أحيانا تمسكك بالدين... مبدأك ككل... صححح وألف بنت تتمني أنها تبقي زيك يابسمة... فخليكي زي ما أنتي ، أنتي حاجه نادرة أووووي في الزمن اللي بقينا فيه ده ، وادعي ربنا كتيير يثبتك ادعي بالثبات دايماً ربنا يحفظك ويسعدك يارب ويكتبلك الخير حيثما كان 💕

    • إبلاغرد صاحب الحساب

      لا خالص متقوليش كده، مفيش حد مننا كامل وكلنا بنحتاج لبعض وكلنا بنستفيد من بعض.. ربنا يجعلني عند حسن طنك ويغفر لي ويهديني يارب، شكرا لدعواتك آمين يارب وإياك 🥺💗💗

  • رسالة منشورة

    بحبك جدآ بجد بكون مرتاحه لمجرد اشوفك♥️🙈 نفسي بجد أكون زيك كان نفسي من صغري يكونوا عودوني ع التدين وحفظ القرآن نفسي ف حاجات كتير بجد بس صعبه جدآ دلوقتي
    وأكتر حاجه مزعلاني أني مش هعرف اشوفك بعد آخر سنه اهي كليه بس بجد من قلبي بدعيلك ربنا يوفقك ف حياتك و يسعد قلبك يااارب♥️♥️😘

    • إبلاغرد صاحب الحساب

      لسة الوقت مفاتش، غيري من نفسك دلوقتي وكوني الأم الصالحة لأولادك عشان تربيهم من صغرك التربية اللي كنتي تتمنيها، طول ما انتي بتتنفسي فلسة الفرص كلها قدامك، استعيني بالله وابدأي رحلة التغيير، شكرا لدعواتك ولك بالمثل يارب💗💗

  • رسالة منشورة

    يا بسمة نحن نحتاج النصيحة منك ِ وليس أنت ِ

    • إبلاغرد صاحب الحساب

      كلنا نحتاج لبعض، محدش فينا أحسن من حد كلنا فينا مميزات وكلنا فينا عيوب فنتعاون وكل واحد فينا يدل الآخر الخير اللي يعرفه ♥️♥️

  • رسالة منشورة

    بسمه أنا بحبك اوى وبحب استفيد دائماً منك وبصراحه شيفاكى قدوتى ونفسي أكون زايك ونفسي اصحابك اوى واكون من اصحابك الصالحين فى دنيا والآخر بجد انتى حاجه كبير مش بتكرر غير كل مليون سنه ولى زايك قليلن جدا واسفه على الأخطاء الإملائية بس تلفون بايظ منى 😂😅 وياريت تاجلى شرح بكره بليز هكون عند حماتى 😂😂😂😅 بحبك فعلا انتى مثال على صحبه الصالحه فى الحياه ربنا يديمك في حياتى حتى بعد ما نتخرج

    • إبلاغرد صاحب الحساب

      أهم حاجة الأخطاء الإملائية عارفة إني بركز عليها😂♥️ ربنا يوفقك ياقلبي ويجعلني عند حسن ظنك، ومفيش تأجيل للشرح هو كده كده سهل لو معرفتيش تحضري مش مشكلة😂💕

  • رسالة منشورة

    هعيط بجد مش مصدقة😢😢كل حاجة بفكر فيها بتحصل والله مش فاهمة اي دا أنا انهاردة كنت بفكر اني نفسي إنك تنزلي لينك صراحة بس قولت هبقى أقولها بعد الامتحانات عشان أكيد هي مشغولة بجد🥺❤️❤️المهم أنا بحبك فالله جدا من كل قلبي بجد فوق ماتتصوري ونفسي أبقى في ربع علمك وأخلاقك الجميلة ونفسي أقابل مامتك واكلمها أخد منها كورس حلو عشان أربي بناتي زيك كدا فالمستقبل بجد بتمنى أوي، وطبعاً مفيش نصايح لأني قصادك أقل من كدا بس بتمنى منك لما تفضي بعدين تبقى تنزلي اللينك تاني عشان بحب أتكلم وافضفض معاكي ونفسي منك إنك تفيدينا من علمك وتساعدينا الي محتاجين نتغير للأحسن عارفة الموضوع هيبقى مرهق بس أن شاء الله يبقى بميزان حسناتك العمر كلة نفسي بجد تساعديني وتعملي دورات حلوة كدا معانا وأخيرا بحبك ويارب أشوفك أو يجمعني بيكي فالجنة ودعواتك ليا♥️

    • إبلاغرد صاحب الحساب

      مكنتش أتخيل إن فيه حد ممكن يكون مستنيني أنزل رابط صراحة 😢 ليه مش بتبعتيلي عادي؟ ممكن أكون مش برد دلوقتي على الواتس لكثرة الرسايل بس انا قلبي مقتوح ليكم .. أحبك الله الذي أحببتني فيه، ربنا يجعلني خيرًا مما تظنون ويغفر لي ما لا تعلمون إن شاء الله ربنا يرزقك بالذرية الصالحة وتكوني خير أم ليهم وتربيهم أحسن تربية♥️♥️

  • رسالة منشورة

    من اجمل الناس إللى فى حياتى بجد يمكن ما فيش كلام بينا بس بحبك جدا وبستفيد من الاستورى بتاعتك ربنا يجازيكى خير ويا رب تحققى كل إللى بتتمنيه 💗💗

    • إبلاغرد صاحب الحساب

      وإياك💗💗💗

  • رسالة منشورة

    أول مرة أكتب لحد على صراحة
    و الله يا بسمة من غير مجاملة حقيقي أنتِ خلص فيكي الكلام ، مفيش كلام يتقال أصلا♥️ ستظلي أجمل بسمة عرفتها ، كل اللي بتمناه إنك تفضلي على صلة بينا و نعرف أخبارك حتى بعد التخرج إن شاء الله ، يارب يارب تكوني أجمل و أحلى دكتور في كلية البنات حقيقي هتبقي مكسب للكلية و الله و للدفعات اللي هدرسلها إن شاء الله😍
    أنا بحبك أوووي أوووي يا بسمة، ربنا يحفظك لأهلك و يجبر بخاطرك و يحققلك كل اللي بتتمنيه ، و يجعلك في أعلى مكانة دايما👑♥️♥️♥️♥️♥️♥️♥️♥️
    # بسمة الدفعة🌺

    • إبلاغرد صاحب الحساب

      ياقلبي انتي 🥺♥️ أحبك الله الذي أحببتني فيه، شكرا لكل كلامك ده بجد، وآمين لكل دعواتك ولك بالمثل يارب 💗💗

  • رسالة منشورة

    الكلام الحلو خلص فيكي
    ♥️ ♥️♥️
    ياااااااااااااارب تزوري بيت الله الحرام قريباً 🕋🕋🕋🕋🕋

    • إبلاغرد صاحب الحساب

      آمين آمين وإياك♥️♥️♥️

  • رسالة منشورة

    ربنا ينور بصيرتك للعلم أكتر وأكتر وقريب ان شاء الله نشوفك علم من أعلام الجامعه ونتباهى بيكي ونقول دكتوره بسمه دي حبيبتنا وكانت معانا في دفعتنا انتي فعلاً تستاهلي كل حاجه حلوه ربنا يجازيكي خير ويخليكي لينا ويجبر بخاطرك ويراضي قلبك 💙💙💙💙💙💙💙💙💙💙💙💙💙💙💙💙💙

    • إبلاغرد صاحب الحساب

      قلبي آمين وإياك يارب 🥺♥️♥️♥️

  • رسالة منشورة

    لما تتخطبي اعزمينا كلنا دفعة لغه عربيه ولادك يا بسمه متنسيناش😂❤️❤️❤️❤️❤️

    • إبلاغرد صاحب الحساب

      لما اتخطب مش هعمل حفلة أساسا 😝😂😂😂♥️

  • رسالة منشورة

    بسمه 🙈 🙈 🙈 نفسي نرجع الكليه عشان أشوفك 😂❤️❤️❤️❤️ يابخت مامتك وباباكي واخواتك بيكي 😍😍ربنا يرزقك سعاده قلب وراحة بال ♥️ ونورتي مصر والله ومنورانا كلنا 😂 ❤️❤️أختي الاصغر مني بسنتين لما بتشرحي بتفضل تقولي يا بختكم ببسمه😂 واخواتي (بنات) 😂 ومامتي اول ما يسمعو صوتك يقولوا يا بسمااااااه ويضحكوني 😂😂

    • إبلاغرد صاحب الحساب

      ربنا يحفظهم ويخليكم لبعض يارب سلميلي عليهم😂♥️♥️

  • رسالة منشورة

    انت جميلة جدا في كل حاجة اللهم بارك لكن بحسك في كوكب تاني فكنصيحة اطلعي علي الواقع واقرئي كتير في التاريخ لناس مختلفة تقبلي الآراء واطلعي علي كل جديد ما دام يرضي الله وربنا ينور بصيرتك يارب وانا بحبك جدا في الله ❤❤❤❤❤

    • إبلاغرد صاحب الحساب

      مش فاهماك تقصدي تاريخ إيه؟ والآراء طبعًا تتقبل واختلافها لا يفسد للود قضية وأكيد كلنا لينا آراء متنوعة نتقبلها كلها، إلا إذا كان الاختلاف في أمر شرعي ثابت فدي مفهاش مجال للتقبل لأن طريق الحق واحد 💗 آمين آمين لكل دعواتك وإياك يارب 💕

  • رسالة منشورة

    انا عايزه اقولك بابا كان بيدعيلك امبارح في المطر عشان دائما اقوله عنك واقول ربنا يباركلها ويشفي باباها يارب . ربنا يجبر بخاطرك يارب يا أحلي معيدة إن شاء الله ❤️

    • إبلاغرد صاحب الحساب

      🥺🥺♥️♥️♥️♥️

  • رسالة منشورة

    أحبك في الله أتمني لكِ القبول في الدنيا والآخرة أدعو الله أن يحفظ والديكِ وأن يتمّ عليكِ حفظ كتابه العزيز وأن يجعله شفيعًا لكِ يوم القيامة وأن يرزقكِ سعادة الدارين 💞💞💞

    • إبلاغرد صاحب الحساب

      أحبك الله الذي أحببتني فيه.. آمين آمين وإياك يارب ♥️♥️♥️♥️

  • رسالة منشورة

    استمري علي طاعتك لربك زي ماأنت يابسمة واستزدي ولا تملي أبدا ، وده لرؤيتي للنتيجة اللي أنت عليها الأن من إصطفاء روحك ولطفك ومساعدتك في الخير وتفوقك وحب الناس ليك ،وحاجات تانية كتير اللهم بارك ويحميك ويحفظك ، وبقولك أنت قدوة ومثل للثبات للناس كتيروأنا واحده منهم ،حقيقي أنا بحاول افرض نفسي علي الطاعة ،ومع الوقت هوصل لطاعة الحقيقية الخالية من الشرك ووكفره وفساده، وربنا يعينا عليها أجمعين يارب اللهم آمين

    • إبلاغرد صاحب الحساب

      حبيبتي ربنا يهدينا ويصلحنا ويسدد خطانا ويرشدنا لطريق الحق ويعيننا على ذكره وشكره وحسن عبادته🥺♥️♥️

  • رسالة منشورة

    اولا بحبك جدا جداجدا 💓
    ثانيا بحمد ربنا اني لقيت بنوته حلوه كدا ذيك بحب اتعامل معاكي واتكلم معاكي بس عارفه انك مش بتعرفي تاخدي ع اي حد بسرعه نفسي تبقي صحبتي اوى اوى اوى اوى❤️اتمني انك تفضلي دايما معايا عايزه اقولك انك مش هتعرفيني لاننا مش بنتكلم كتير بس انا لو عليا هقرفك ف حياتك 😂عشان أفضل معاكي❤️انتي احلي بنوته ف الجامعه حرفيا ❤️ربنا يحميكي ويبعد عنك اي حاجه وحشه يارب واشوفك احلي دكتوره بأذن الله😍😘

    • إبلاغرد صاحب الحساب

      أحبك الله الذي أحببتني فيه.. أبدا خدي راحتك، تخلص الامتحانات بس ونفوق واقرفيني زي ما انتي عايزة أهلًا وسهلًا 😂♥️♥️♥️

  • رسالة منشورة

    السلام عليكم ورحمه الله
    متتغيريش ابدا ابدا وجاهدي كل شيئ واثبتي علي مواقفك 💙بس متزعليش من الي مش عارف يثبت ادعيلو وقدمي كل الي تقدري عليه لو ينفع افضلي قدمي عارفه كل حاجه منك حلوه وبحبها اوي و بحبك في الله 💙نفسي تفضلي معايا اوي نفسي ابقي قريبه منك جدا بس يحترم رغباتك الهادئه الجميله
    💙ربنا يوفقك ويسعد قلبك ويفرحك 💙معايا منك حاجه من سنه اولي 💙😍☺لو عرفتيني مين هبعتهالك خاص
    #يابسمتي

    • إبلاغرد صاحب الحساب

      مبزعلش أبداً من حد عشان بيعمل معصية هو فيه حد مننا خالي من المعاصي😢؟ مفيش طبعا.. الواحد بيكره المعصية نفسها وبيكره انتشارها وبيكره حتى انه هو بيعملها، لكن طبعا كلنا نتمنى الخير لبعض ونتمنا ان ربنا يهدينا ويعفو عننا ويغفر لنا😢♥️♥️

      أعتقد عرفتك، غالبا اسمك مكون من أربع حروف يبدأ وينتهي بحرف الميم😂♥️

  • رسالة منشورة

    بسمة أولا أحبك فى الله. ثانياً انا حقيقى اتمنى أتعرف على مامتك جدا جدا علشان أعرف منها إزاى اربى اولادى فى المستقبل
    ثالثاً اتمنى اكون صديقة مقربه ليكى
    وربنا يجعلك من عباده الصالحين يا رب وتسالى عليا فى الجنة إن شاء الله ولا أذكيكى على الله ولكن يشهد الله أنى أحبك وأحترمك🌸🌸🌸🌸🌸

    • إبلاغرد صاحب الحساب

      حبيبتي، أتشرف طبعا بصداقة كل حد هدفه وهمه رضا الله .. آمين آمين لدعوتك الجمبلة ولك بالمثل يارب💗

  • رسالة منشورة

    أجمل وأحن وأرق وألطف بسمة رضوان في الكون😚💜💜💜💜💜💜💜🌸

    • إبلاغرد صاحب الحساب

      من جمال قلبك♥️♥️♥️♥️♥️

  • رسالة منشورة

    حافظى على نقاء قلبك بجد انتى إنسانة جميلة اوى ربنا يكرمك يارب ويحققلك كل اللى بتتمنيه ويحبب فيكى خلقه يابسمة الدفعة 💜💜💜💜💜💜💜

    • إبلاغرد صاحب الحساب

      حبيبتي آمين وإياك 💕💕

  • رسالة منشورة

    ربنا يحفظك يارب ويبارك فيكِ خليكي زي ما انتِ وردة وبسمة مُشرقة في حياة اللي حواليكِ، ربنا يوفقك ويرزقك بالزوج الصالح اللي يستهلك،لو بتمني يكون ليا قُدوة فاهتكون انتِ، حبيت الجامعة عشان عرفتنا ببعض عايزة اقولك على حاجة افتكرني بيها (كُنتِ لي نِعمَ الصديق سَأشتقُ إليكِ) بحبك في الله كتير اوي

    • إبلاغرد صاحب الحساب

      هتشتاقي ليه هو انتي هتروحي فين😢 آمين آمين وإياك ♥️♥️♥️♥️♥️

  • رسالة منشورة

    انتي بجد شخصيه جميله اوووي ومحبوبه ماشاء الله وتتحبي بسرعه وبجد من الشخصيات الي تدخل القلب بسرعه وبالنسبالي انا عن طريق صوتك لاني مشوفتكيش قبل كدا بس علطول بسمع شرحك وان شاء الله نتقابل انا متأكده ام شخصيتك من قريب احسن من كدا بكتير كمان❤❤ ربنا يجازيكي خير ويبارك لاهلك واسرتك❤

    • إبلاغرد صاحب الحساب

      شعور غريب إن حد معايا في الجامعة وعارفني من صوتي بس ومشافنيش قبل كده 😂♥️ ربنا يجمعنا على خير، و آمين وإياك يارب

  • رسالة منشورة

    ربنا يكرمك يابنتي ويوفقك ويرزقك الزوج الصالح الي يستاهل كل حاجه فيكي حلوة ، اقولك حاجه انتي خساره ف اي حد ، انتي زي النجمه ف السما ، بحبكككك اوي ، ومبسوطة اوي اني اتعرفت عليكي بجد

    • إبلاغرد صاحب الحساب

      آمين يارب، ولا خسارة ولا حاجة انا عادية جدا والله ربنا يغفر لي تقصيري ويسامحني، و ربنا يرفع قدرك ♥️♥️