What's on your mind?

A little kindness goes a long way.

Image, audio or video · up to 10 MB

Your message is only public if the profile owner publishes it.

Profile questions

No questions published yet.

Public messages

  • Public message

    مش قادرة اكسر الحاجز النفسي للمذاكرة خالص وعليا حاجات متراكمة كتيرة جدا اتخطي ده ازاي ؟

    • ReportProfile owner's reply

      عمرك ما هتفتحي باب، وإنت -مثلا- متخيلة أشباح هلامية أو كلب ضخم سعران قاعد وراه.
      طول ما مخوفة عقلك ومهولة الدنيا قدامه فإنت مشغلة اللمبة الحمرا وجرس الإنذار الي بتخليه يعمل أي حاجة عشان ما يخلكيش تفتحي الباب.

      فإيه رأيك لو بطلنا نقول الكلمتين الأخيرتين دول وجربنا نقول جوانا مثلا:
      أنا معنديش ''حاجات'' متراكمة كتيرة جدااا ولا حاجة.
      أنا ورايا مسألة عايزة أحلها في شيت معين في مادة معينة.
      أنا ورايا 5 صفحات عايز أبص فيهم واقرأهم بسرعة كده من شابتر معين في مادة معينة.
      just it!.
      هوني الدنيا وهي هتهون ... واللمبة هتطفي .. وهتتشجعي تفتحي الباب.
      وبعد ما تكسري الحاجز وتندمجي هتخلصي أكتر م المطلوب.

      تحايلوا ع عقلكوا ونفسكم يا جماعة .. نفسنا بتيجي بالمحايلة والله مش بالغشومية.

  • Public message

    سقطت تاني يا أحمد! أولي طب

    • ReportProfile owner's reply

      هقولك اللي هيحصل.
      هتكتئب
      ثقتك بنفسك هنزل تحت الصفر
      هتهرب من أي حاجة
      هتهرب للنوم
      لما تصحى غصب عنك من وجع الجوع هتدخل في وحل الأوفرثينكينج
      هو أنا فاشل؟
      هو أنا غبي؟
      طب ليه؟
      ليه مبقاش عندي أي حماس أو رغبة أو قدرة على أي مذاكرة من بعد الثانوية؟
      ليه فصلت شحن بالطريقة البشعة دي؟
      ليه بيحصل معايا كدة وأنا محترم وبحاول أساعد غيري ومش بحاول أأذي حد؟
      يمكن السبب في أهلي؟
      يمكن السبب في الظروف المادية؟
      يمكن السبب فيّ؟
      أتصرف إزاي مع كلام وتلقيحات أهلي المؤذية دي؟
      أنا دخلت طب ليه؟
      عشان أخد اللقب؟
      عشان الوجاهة الاجتماعية وأفرح أهلي؟
      طب أهلي دلوقتي فرحانين؟
      طيب أنا عايز طب فعلًا؟
      هل الطريق ده مناسب ليّ فعلًا؟
      طب أنا عايز ايه؟
      هعيد المواد دي للمرة التالتة؟
      طب أعمل إيه؟
      أهرب من البيت؟
      طب وبعدين؟
      أهرب من الكلية؟
      طب وبعدين؟
      ليه مضطر أواجه كل هذا الكم من الضلمة الإحباط والقهر والكسرة دي.؟ عشان إيه؟
      ما صحابي ماشيين في حياتهم عادي.. إشمعنى أنا؟
      ولیه ربنا ماستجبش دعائي لتاني مرة؟.. أنا دعيت في رمضان كتير جدًا جدًا إني أنجح!
      ليه مجبرش بخاطري المرة دي حتى لو قصرت فعلًا؟
      ليه يسيبني أتكسر واتقهر أوي كدة تاني؟
      ولا الحياة مادية باحتة والدعاء ده ملهوش لازمة؟
      مش هعدي تاني.. أنا بضحك على نفسي.
      أنا محبط.. مكتئب.. منكسر.. جسد بلا روح.. معدوم الثقة في نفسي ومعدوم الإيمان.
      تعبت.. مبقتش قادر أصمد ولا قادر أستحمل.
      هتحط راسك تحت المخدة وتجبر نفسك على النوم عشان ترتاح من التفكير.
      ===
      حاولت أوصفلك السيناريو ده عشان ماتحسش إنك لوحدك اللي ممكن تمر بيه في الكون.. أغلبنا في الحياة بيمر بخبطات كتير وبعضهم ورا بعض بشكل يوجع جدًا.. ولا أنصحك تواجه الضلمة دي لوحدك أبدًا أبدًا.
      أفضل نصيحة دلوقتي إنت محتاجها
      أقعد مع ناس صحابك.. قضي أغلب الوقت معاهم.. إياك تقعد لوحدك تحت أي ظرف من الظروف.. لو تقدر تنتقل معاهم في شقة طلبة لمدة معينة يبقى أحسن كتير.. والأهم من كل ده إنك تزور طبيب نفسي في أسرع وقت ممكن واكسر الحاجز النفسي اللي عندك ده.. مش عيب تطلب مساعدة من حد يا دكتر.. ناس كتير أعرفهم تعرضوا للأزمات دي ومع الطبيب بقوا أحسن كتير واستعادوا اتزانهم النفسي ومروا بالفترة الصعبة دي بنجاح الحمد لله.

      خد خطوة وماتستسلمش.. وإحنا هنا موجودين جنبك.. وأنا موجود ع الفيس دلوقتي لو حبيت تكلمني ولو حبيت تفضفض.. المهم إنك مش لوحدك يا صديقي '').

      ربنا ييسرلك أمرك كله ويشرح صدرك ويجبر بخاطرك ويثبتك ويريح بالك ويفرحك.. اللهم آمين.

  • Public message

    كنت منزل بروجرام رد على رسالة صراحة عندك ع الاكاونت عشان لو حد عايز يخرج من مود اكتئاب أو خنقة كدا ، هو كان جميل بجد اللهم بارك وفيه نصايح جميلة جدا وكنت حاطة في نيتي اطبقه وامشي عليه بعد الامتحانات بس اتفاجأت تاني يوم إنك مسحته فممكن تنزله تاني او تحطه هنا

    • ReportProfile owner's reply

      تمام.. طب تسمحيلي احطلك نظام تمشي عليه بكرة بحذافيره.

      ومتكسليش؟!

      تمام

      النهاردة يوم الأحد 26 يونيو صباح الفل هنصحى على 4.30 كدة نصلي ركعتين الفجر مش هياخدوا 4 دقایق

      نفتح بقى الشبابيك كلها وندخل نور ربنا ونغير هوا الأوضة المكتوم ده.. ونقف في البلكونة نشم هواء الفجر الطبيعي اللي ريحته تحفة ده اللي لسة متلوثش بتكنولوجيا وقرف البشر.

      لا موبايل ايه بقى اللي هتمسكيه ده.. احنا ننسى خالص أي ريحة تكنولوجيا في الحياة ومفيش مانع نرجع للعصور الوسطى.

      مافيش نت.. ولا موبايل.. ولا تلفزيون وأخبار.. ولا لاب.. ولا أي شيء.

      نلبس كده طقم ملون ومبهج ونهندم هدومنا عشان مش هنقعد في البيت النهاردة.. وحاولي تجيبي قرشين حلوين قدر المستطاع.. أول ما تنزلي من البيت..أول قرار هتاخديه بينك وبين نفسك إنك تفضلي مبتسمة ديمًا بسبب وبدون سبب.. أها خليك بشوشة مش مشكلة الناس تفتكرك هبلة عادي طز فيهم.

      أول ما تطلعي من العمارة هاتي أي علبة بلاستيك صغيرة إمليها مية وحطيها قدام الباب للقطط أو الكلاب تشرب منها.. حطي في أولوياتك تحيطي نفسك بـ كائنات غير البشر أكثر لطفًا.. وهتعدي على ماركت تشتري منه كيس بلالين وكيس ملبس خليهم في شنطتك.

      في الشارع أو المواصلات لو قابلتي أي طفل صغير عابس حاولي تلعبي معاه بأي طريقة والبداية سهلة جدًا تكسبي بيها قلبه ملبساية أو بالونة تنفيخهاله مع ابتسامة جميلة والباقي هيبقى سهل.

      حددي اثنين أو ثلاثة أشخاص بتعزيهم بقالك كتير مشوفتيهمش وقرري تزوريهم النهاردة بدون أي سبب.. لا ماتكليميهمش قولنا ننسى أم الموبايل.. روحي شوفيهم وجهًا لوجه واقعدي وارغي وهزري واسترجعي معاهم ذكرياتك.

      ابعدي عن الأوغاد والحمقى والشخصيات اللي براس كلبة واتوجدوا فقط عشان ينكدوا عـ الواحد عيشته.

      نعمل بقى شيء جديد ممكن؟.. اشتري فستان أو لبس جديد.. روحي مكان جديد.. اشتري لوحة لمناظر طبيعية أو خيل وحيوانات وعلقيها في أوضتك.. اكتبي جواب لحد عزيز عليك وقولي كل الحاجات اللي بتحبيها فيه وابعتيهوله.. أو أهديله هدية ما بدون مناسبة.. لو أمكن روحي حديقة أو مكان فيه زرع وبحر ومية.. مش لوحدك طبعًا مع أصحابك.. ادخلوا سينما وحبذا يكون فيلم كوميدي.. روحوا ملاهي.. مستشفى 57.. دار أيتام .. العبوا أي رياضة أو جيم.. روحوا إيفنت أو حفلة أو حملة تطوعية.. جربي ترسمي أو تلوني.. أو أي تجربة جديدة.

      أهم شيء من التجربة الجديدة والمغزى الأساسي إنك لازم تتعرفي على شخصية جديدة وتضيفها لقائمة معارفك.. أي بنت تحسي منها بشيء من اللطف والود توددي ليها بدون تفكير كتير في سيناريوهات عجيبة.. انكشيها وارغي معاها بتلقائية وماتسبيهاش إلا وإنتو متفقين على لقاء جديد.

      ماتفكريش في المستقبل.. ماتفكريش في أي شيء.. عيشي النهاردة فقط وكأنه آخر يوم في عمرك.. مش بفول عليك ^^ أطال الله عمرك.. المهم اعملي كل حاجة جميلة كنت مأجلاها وطز في أي حاجة تانية.

      نرجع بقى نصلي ونقرأ صفحة من القرآن وننام بدري لأنك هتكوني تعبتي من اللف وده شيء كويس جدًا عشان ماتدخليش في مرحلة الأوفر ثينكينج السوداوية المستفزة.

      أوعدك.. أوعدك لو عملتي كدة.. النفسية هتبقى في أعالي السماء بشكل لا تتخيليه.. المهم تاخدي قرار وتبدأي من النهاردة وماتكسليش وصدقيني النتائج هتكون مبهرة عن تجربة شخصية )''.

      وربنا يشرح صدرك ويفرحك ديمًا.

  • Public message

    هو الواحد بيستفيد ايه لما يحرق دم الناس بكلامه

    • ReportProfile owner's reply

      الأسباب كتير:

      ممكن بسبب الفراغ.. الزهق.. عايز أي أكشن.. فيدخل ينكش أي حد أو يكتب حاجة مستفزة ويحدد ناس معينة يبعتلهم ويجيب فشار ويتفرج.

      ممكن بسبب الغل والكره تجاه شخص معین فعايز أضايقه وخلاص.. لأني مابكونش مبسوط وأنا شايفه مبسوط.

      ممكن بسبب الجبن.. إني مش قادر أقول الكلمتين للشخص في وشه فهقولهم هنا من وراء حجاب.

      ممكن يكون تفريغ شحنة.. اللي حواليه مثلًا بينتقدوه ديماا وقرفينه فبيخرج كبته وخنقته على غيره.

      ممكن يكون محاولة لعكس النقيض على النفس فيحس إنه كويس... يعني لما أتكلم عن فجور العاهرة بعكس على نفسي إني تقي وورع.. لما أتهم فلان بالكذب أو الحمق بعكس على نفسي صدقي وحكمتي.. فبيحسسني بشيء من الثقة بالنفس الزائفة.

      ممكن يكون مرض نفسي.. شيء من المازوخية.. إن الشخص يتلذذ بالإهانة والشتايم وما إلى ذلك وبيبقى نفسه ديما حد یهزأه.. شفاهم الله.

      الأسباب كثير ولكن هو يظل من أشهر الأسئلة الفلسفية المحيرة والمثيرة للجدل عن أصل الشر البشري.

      ربنا يعافينا جميعًا ويصلح حالنا.

  • Public message

    متوترة وعندي فاينل نصيحة ؟

    • ReportProfile owner's reply

      أنا ديمًا في أوقات الامتحانات بمشي بمبدأين
      1. ما لا يدرك كله لا يترك كله
      2. اقض ما أنت قاض إنما تقضى هذه الحياة الدنيا
      يعني هذا الوقت سوف يمضي، والامتحان مش هياكلني، وإحنا هنموت، والحياة فانية، ومش مستاهلة توتر وقلق وندب على ما فات من مرقعة وسيناريوهات سلبية تجيب اكتئاب.

      نجيب الملازم ونجيب الامتحانات اللي فاتت ونحضر في مراجعة لو عايزين ونروح في حتة نلم اللي نقدر عليه ونبدأ باللي عليه ويت ودرجات كتير ونلعب لحد آخر دقيقة في المباراة وبعد ما الحكم يصفر نولع في الورقة ونطلع أجدعها خروجة نخربها ونجيب فشار وندخل سينما نشوف أجدع فيلم ونروح برانيس في نفسنا.
      As simple as it!
      والمثل بيقول لو مقدرتش تقاوم ليتس إنجوي باللي بيحصل فينا ده عشان هتبقى ذكريات جميلة بعدين هنشتاقلها بشدة.

  • Public message

    هو لما حد ييجي يسألني ويقولي اسمك ايه واقوله دكتور ... ده تكبر ؟

    • ReportProfile owner's reply

      مش فكرة تكبر.. بس هو شيء مش مفهوم بالنسبة لي!. يعني أنا لو محامي مثلًا.. وحد سألني عن اسمي، هقوله أنا المحامي أحمد؟! غريبة صح؟.. لأنه بيسألني عن اسمي، مش شهادتي الأكاديمية، ولا وظيفتي الحالية.. ولكنها بتتقال في مجتمعاتنا المريضة بسبب وجاهة اجتماعية زائفة.

      سيدنا يوسف وهو عزيز مصر، قال إيه عن نفسه؟.. أنا الملك الأسطورة الفيلسوف الحكيم المبجل سلطان السلاطين؟!
      قَالُوٓاْ أَءِنَّكَ لَأَنتَ يُوسُفُ ۖ قَالَ أَنَا۠ يُوسُفُ وَهَٰذَآ أَخِى

      فالنفوس الممتلئة يا صديقي مش محتاجة تتشدق بألقاب لتزيدها وجاهة وعُلوًا.

  • Public message

    حاسس انى جاهل ومعنديش ثقافة خالص

    • ReportProfile owner's reply

      طب أنا عملتلك خطة حلوة لو حابب تبدأ بيها عبارة عن أربع خطوات

      الخطوة الأولى: تغيير الديكور والبيئة المحيطة.
      انضم لجروب اسمه عصير الكتب، عليه 600 ألف حاليًا، خوارزميات الفيس هتفهم إن السكة دي حاببها وعايزها، هتبدأ تقترحلك جروبات مهتمة بالقراءة والكتب، انضم ليهم وابقى خد جولة فيهم من آن لآخر. وكذلك غير الناس اللي بتابعهم عـ الفيس والسوشيال ميديا عمومًا لناس تقدر تفيدك وتزود معلوماتك.. لإن نفسك وعقلك إن لم تشغلهما بمعالي الأمور شغلاك بسفاسفها، لذلك ابدأ بـمتابعة ناس في المجال أو الحاجة اللي أنت حاببها وشايف إنها هتثريك وتنفعك، وابعد عن متابعة الناس التافهة والمحبطة والسلبية، وماتقلقش امسك بس طرف الخيط وهو هيكر وهتلاقي الفيس بيقترحلك ناس على نفس الشاكلة، وهتلاقيه مع الوقت اتغير عندك تمامًا.

      وابدأ ابحث عن أي إيفنت أو مؤتمر أو مكان بيدي كورسات وبيقدم شيء مفيد.. روحه مش بس عشان المحتوى المفيد لأن ده سهل يتجاب.. ولكن عشان تتصاحب على الشباب اللي هتعرفهم هناك وتعمل صحبة جديدة بيفكروا زيك وعايزين يستفيدوا ويطوروا من نفسهم.. وبرضو الخيط هيكر وكل واحد هيعرفك على سكة جديدة أو ناس جديدة على نفس الشاكلة.. مع الوقت هيبقى عندك صحبة جديدة وشبكة علاقات جديدة هتكسبك ثقافة واسعة وهتغير فكرك وشخصيتك تمامًا بشكل لا تتخيله.

      الخطوة الثانية: نملأ الفراغ اللي في الداخل عشان نعرف نتفاعل مع الديكور والبيئة الجديدة.
      لازم تقرأ.. لازم.. مش بتحب اغصب نفسك واحملها عـ القراءة.. كل يوم صفحة أو صفحتين من كتاب.. حتى هتبقى عرفت إن فيه كتاب اسمه كذا وفي كاتب اسمه كذا وأسلوبه كذا.. فلو تم ذكره قدامك تعرف تتفاعل.. وفي البداية أنصحك بالروايات حتى تعتاد عيناك على الوثب بين السطور.

      مكسل تقرأ كتب اقرأ مقالات مثلاً افتح موقع الباحثون السوريون أو مرصد المستقبل واغرق في الكنوز دي.

      وتابع قناة ناشونال جيوغرافيك عشان تبقى مواكب اللي بيحصل حواليك من الأخبار والأحداث العلمية وتاخد منها نبذة موجزة.

      مكسل! ممكن تشوف وثائقيات متنوعة تعرف بيها ملخص الكتب: افتح مثلاً موقع علوم العرب أو جولات أو اليوتيوب وعيش.

      الخطوة الثالثة: اكتب ثم اكتب ثم اكتب اللي قرأته أو سمعته ده.. في الغالب مش هيثبت في دماغك أو هيبقى صعب تستحضره أو تستدعيه من ذاكرتك في الوقت المناسب.. لأنك ماحولتش تكتب وتلخص اللي عرفته.

      أساتذتنا علمونا جملة جميلة بتقول:
      الموجودات أربع؛ موجود بالعيان، وموجود بالأذهان، وموجود باللسان، وموجود بالبنان، فمرر علمك على تلك الموجودات يثبت.. فأفضل شيء عشان تثبت المعلومات اللي عرفتها عندك إنك تربطها بصورة معينة في خيالك = ذلك بالأذهان.. وتقرأها أو تشوفها بعينك = ذلك بالأعيان.. وترددها وتكررها مرارًا وتكرارًا بلسانك= ذلك باللسان.. وتكتبها وتلخصها بيدك = ذلك بالبنان أي الأصابع.

      الخطوة الرابعة: زكاة العلم نشره؛ فاللي تعلمته ولخصته لا تبخل به على غيرك، فانشر العلم وعلمه لغيرك ذلك ينفعك أكثر مما ينفعه، لأنه هيثبت المعلومات عندك وهتعرف إذا كنت فاهم فعلاً ولا في خلل معين في الفهم لازم يتعدل.

      وصدقني لو عملت كدة في ظرف سنة واحدة هتلاقي نفسك بقيت واحد تاني قلبًا وقالبًا.. وربنا يصلح حالنا وحالك.

  • Public message

    انا اسلوبى سيء جدا في الكتابة وداخل ع 22 سنة اهو ومبعرفش اكتب 5 سطور ع بعضهم باسلوب كويس أو منظم ع الأقل ازاي اقدر احسن دا ؟

    • ReportProfile owner's reply

      فاقد الشيء يكتسبه بعكسه
      فاقد الشيء يكتسبه بالممارسة.

      فلو عايز تكتب حلو = اقرأ كتيير
      ولو عايز تتكلم حلو = اسمع كتير

  • Public message

    متابعاك من فترة وعايزة اسألك سؤال . اللي انت فيه دة من علم وثقافة وفكر عالي ونجاح من ايه ؟ كنت بتعمل ايه ووصلت لدة ازاي ؟

    • ReportProfile owner's reply

      بلاش يا جماعة تنبهروا بالناس بالله عليكم !!

      السوشيال ميديا دي فقاعة فارغة.. والله بالونة منفوخة هواء فقط لبس شيك بس بنحب نعرضه للناس عشان نخبي بيه أو نستر بيه هدوم مقطعة تحتيها وجوانب مظلمة ربنا ساترها.. كلام كتير بيتقال في الحقيقة بنكون بنتمنى يكون موجود وحصل ومش شرط يكون موجود بالفعل.. إحنا ملايكة بس هنا بجناحات.. بنرد بأدب لأننا عدلنا الكلام خمسين مرة.. شكلنا حلو لأننا عدلنا الصور عشرين مرة.. كلامنا متنسق ومترتب في الفيديوهات لأننا عملنا مونتاج كتير وشيلنا سقطات وهري وبلاوي زرقا.. بنحط لينكات جايز منكونش بصينا فيها بالقدر الكافي.. فكرة إن الشخص ده فظيع وهو وصل للي فيه ده إزاي وأكيد أنا مش هقدر أوصله أو لسه قدامي كتير أو المسافة بيني وبينه كبيرة ده وهم.. قسمًا بالله العظيم ده وهم.. ده بيسموه في علم النفس تأثير الهالة.. (وعادي قرأت عن التأثير ده بالصدفة في مقال ما.. عادي يعني مخدتش ليسانس في آداب علم نفس).. الهالة الفارغة الزائفة اللي بتعملها السوشال ميديا اللي بيخلي بنات تتمنى شباب يكونوا أزواجهم أو العكس بسبب تأثير الهالة السخيف ده، والأسوأ إن أغلب الناس الموهومة والمبهورة دي ممكن جدًا تكون في الحقيقة عندهم قدرات وإمكانيات وفرص أكثر بكثير من الشخص اللي نافخينه في خيالهم ده.. بل ممكن يكونوا أفضل منه فعلاً بس هم مش حاسين.. مايعرفوش إنه ممكن يكون شخص بائس وفارغ وفاشل ومعندوش أي حاجة يعملها غير كام كلمة يلم بيها كام لايك وشير وأرقام مالهاش أي تلاتين لازمة ولا تمثل أي شيء في الوجود لا في الدنيا ولا في الآخرة.. وبلاش فكرة إن الشخص ده العلااامة الفظيع ده هو اللي هلاقي عنده اللي بدور عليه.. وهو اللي هيعرف يقولي حل مشاكلي كلها.. وهيغير حياتي تمامًا وبتاع.. بلاش تنبهروا.. بلاش تنبهروا.. بلاااش.

      ربنا يغفر لي ما لا تعلمون ويصلح حالنا جميعا.