شو حاب تحكي؟

خلّي رسالتك لطيفة وبنّاءة

صورة، صوت أو فيديو · حتى 10 MB

لن تظهر رسالتك للعامة إلا إذا نشرها صاحب الحساب.

أسئلة المستخدم

لم ينشر أسئلة بعد.

الرسائل المنشورة

  • رسالة منشورة

    خطيبي شخص حنين، بيهتم بيا، بيقدرني، روحه كويسة وحبيته، وصلت لمرحلة شبه تعلق بيه...بعد فترة اكتشفت أنه بيكدب عليا وأمر الاختلاط عنده مفتوح، ممكن يسمع من أهله من غير ما يسمع رأيي، بيهتم بالمظاهر شوية، كلامه معايا ممكن ياخد منحنى مش محترم أنا مش متقبلاه تحديدا ف العلاقة الزوجية...واجهته اني مش هقدر أتعايش مع العيوب دي فضل يحلفلي أنه بيحبني وهيتغير وكل دا هيقدر يعدله واحنا مع بعض وأنه مهما كان شاب وبيغلط بس بيجاهد ويرجع...استخرت كتير ومش قادرة أوصل لقرار نهائي يريحني بين اني فعلا بحبه وهفتقده جدا ف يومي وبين عقلي اللي بيقوللي المفروض ما تكمليش..رأي حضرتك إيه؟

    • إبلاغرد صاحب الحساب

      ابعتي السؤال لدكتور هالة سمير هاتجاوبك بإذن الله

  • رسالة منشورة

    ممكن الرد ع مشكلة الكتمان و ازاي الواحد يعبر عن اللي جواه😢
    انا بعتت لحضرتك الرسالة قبل كده

    • إبلاغرد صاحب الحساب

      طيي معلش ياصديقي ابعتلي السؤال على الماسنجر عشان ارد عليك ڤويس. عشان الكتابة بتاخد مني وقت كبير

  • رسالة منشورة

    هو انا امتى هبطل أتأثر باللي فات وهعرف أطور نفسي واتخلص من الألم اللى مريت بيه وتتخطى الناس اللى سابوني
    امتى هركز على مستقبلي ومذاكرتي عشان أهلي!
    بكره الدنيا كلها بجد
    انا انسانه فاشلة حرفيا

    • إبلاغرد صاحب الحساب

      لأ مش فاشلة، انت مضغوطة شوية. والإنسان طالما مسلم وبيصلي فهو قطعا مش فاشل

  • رسالة منشورة

    السلام عليكم لو سمحت كنت عاوزه أسأل حضرتك ع شيخ بيقدم فتاوي حضرتك بتثق فيه وبيرد ع الاسك او اي اتطبيق يعني محتاجه اسأله ف شئ خاص جدا ويهمني من سنوات ومحدش بيردعليا من شيوخ الاسك لكثرة الأسئله عندهم أرجوك تفيدني لوسمحت

    • إبلاغرد صاحب الحساب

      https://www.facebook.com/YoussoF.MoSLeM

  • رسالة منشورة

    ممكن لو حضرتك تتكلم في بوست عن صلاة الجماعة وإزاي ممكن تحبب حد فيها عموما؟ أو تدلني على فيديوهات اديها لحد يهمني ممكن تكون سبب في رجوعه تاني؟ جزيت خيرا كثيرا

    • إبلاغرد صاحب الحساب

      فيديوهات الشيخ سمير مصطفى

  • رسالة منشورة

    طب ما ربنا قال ولا تزر وازرة وزر أخري ، ليه شخص برغم أن أهله ممكن يكونوا مش كويسين هو قرر يكون كويس و يبقي افضل دايما اعاقبه بالطريقة دي واقوله لا انت اهلك مش كويسين فا معلش اركن انت بقي علي جمب ليه طيب الاحساس دا ، حاسة أن كدا في ظلم كبير للشخص دا اللي هو طب انا مختارتش بتعاقبني علي دا ليه انا

    • إبلاغرد صاحب الحساب

      بص على التعليقات هاتلاقيني ناشر مقطع لمصطفى حسني اتفرج عليه.

  • رسالة منشورة

    ممكن حلول عملية للتخلص من القلق الوظيفي

    • إبلاغرد صاحب الحساب

      زود مهاراتك، واتوكل على الله هاتخلص من فكرة القلق الوظيفي

  • رسالة منشورة

    افضل دورات سمعتها ؟؟
    +شكرا جدا ✨

    • إبلاغرد صاحب الحساب

      تأسيس وعي المسلم المعاصر.
      دورات دكتور طارق سويدان
      دورات الزواج لدكتور محمد خير الشعال
      دورات الشيخ محمد صالح المنجد

  • رسالة منشورة

    اللي ينام علي مرتبة بدل سرير دا نسميه بخيل وامعة

    • إبلاغرد صاحب الحساب

      ايوه المتخلفين بيقولوا كدا فعلا.

      أما بالنسبة لكلمة إمعة فالمتخلفين بردو بيستخدموها وهما مش عارفين معناها.

      صباحك جميل وبيضحك 😁

  • رسالة منشورة

    قول ليوسف صالحين انه كرتونة بيض
    كفاية بقا دور الشيخ الكيوت

    • إبلاغرد صاحب الحساب

      اغتبته والاغتياب كبيرة ربنا يهديك

  • رسالة منشورة

    صور الأثاث الي بتشاركها حلوة اوي.. بعد ما بشولها ابقي ابغي اتزوج دالحين وهذا امر لو تعلمون عظيم.. Keep up the good work ✨
    سؤال تاني.. يعمل ايه الإنسان الي في علاقه مش مفهومة هي حب ولا صداقة

    • إبلاغرد صاحب الحساب

      مايعملش حاجة، يقطعها عشان علاقة حرام. ولما يبقى جاهز يروح يتقدم

  • رسالة منشورة

    ازاي الإنسان ميشغلش باله بحد بمعنى أدق يوصل لمرحلة الروقان والتصالح مع النفس وإنه ينافس نفسه فقط وميبصش لدرجات غيره قبل م يشوف درجاته لو بنتكلم عن الدراسة مثلا! مع العلم إن مفيش أي كره للغير أو تمني ليهم شر لا سمح الله بس مجرد إنه ممكن يزعل لو حد جاب زيادة عنه مع إنه تعب وعمل اللي عليه ف بيحس بالتقصير وهو شايفها صفة ذميمة فيه وازاي يتصالح عموما مع فكرة إنه عادي جدا يبقى مش ذكي ف مادة معينة وهل هو لما بيعترف بكدا بيقلل من قدراته ؟

    • إبلاغرد صاحب الحساب

      لأ مش بيقلل من قدراتك. ومافيش حاجة هاتخليك ماتركزش مع غيرك غير إن القرار دا يكون نابع من جواك انت

  • رسالة منشورة

    ازاي الانسان يبدا طريق جديد مع ربنا لوحده بعد ما قرر البعد عن كل حاجه وفقد الصحاب الوحشه والاماكن الوحشه وفقد كل حاجه ؟

    • إبلاغرد صاحب الحساب

      حاول تجيب صحاب جداد. يعني مثلا روح قدم على الدروس اللي بتقام في الجامع الازهر وجيب منها صحاب

  • رسالة منشورة

    ليه الناس بتنتقد البنت اللي مش عاوزة تشتغل
    يعني أنا حاليا بشتغل بس بقول بعد الجواز مش حابة اشتغل بينزل عليا سيل من الانتقادات وليه وتضيعي نفسك والشغل هو اللي هيسندك ومش هيحوجك لحد

    • إبلاغرد صاحب الحساب

      الزمان اتغير زمان كانوا بينتقدوا اللي بتشتغل، دلوقتي بينتقدوا اللي مش شغالة! 😂

      عموما ممكن تشتغلي من خلال الانترنت وتمسكي العصاية من النص

  • رسالة منشورة

    جوزي بيبعب معايا لعبة الغمر بالاهتمام والمحبة وبعدها التنقيط بيهم اتصرف ازاي انا تقريبا فقدت الثقة فيه ومش عاوفه ارجع اامن له ع الحب

    • إبلاغرد صاحب الحساب

      ابعتي استشارة لدكتور هالة سمير

  • رسالة منشورة

    السلام عليكم ياعبد الرحمن ممكن استشيرك انا متغرب في السعوديه بشتغل محاسب سافرت من شهر 2 والي الآن الشركه ماطلعت لي اقامه بالاضافة الي الشغل فيه بلاوي من المشرف اللي بيجيب البضاعة و المحاسب اللي كان في مكاني مجال عملنا محلات عبايات وعطور جردها اول ماجيت الشغل قالوا لي سنوي الجرد جردت الاسبوع اللي فات محل واحد عجز فيه 140000 ريال ده يدل بانه الناس دول مخزونهم ماحقيقي للسنوات الماضيه وانا حاليا هرفع الي اصحاب الشغل تقارير عن النشاط ،وانا ياعبد الرحمن قلقان بانه يستقصدوني اصحاب الشغل مثلا مايطلعو لي اقامه او يخفضو راتبي بسبب التقارير اللي هرفعها وتبين الصح
    ممكن تنصحني باي شي ياعبد الرحمن لاني والله مهموم وجزاك الله خير

    • إبلاغرد صاحب الحساب

      ربنا يفك همك ياصديقي. الافضل تستشير حد اقدم منك في السعودية وقوله اعمل ايه. وانا ممكن انزل سكرين شوت لسؤالك واسأل الناس ممكن يكون عندهم اقتراحات

  • رسالة منشورة

    عندي ٢٤ سنه مش بيتقدملي حد بس دايما واقفه حياتي ع شريك حياتي واني محتاجه ونس واحتواء مش قادره اتعامل مع المجتمع نزلت كذا وظيفة بس مبكملش فيها لان ده مش احتياجي ، خايفه اوي من نقطه انه من الطبيعي شخص مش هيكون متفرغلي دوما واني حابه اكون ست بيت مش موظفه بس دايما رابطه تطوير نفسي بوجوده وخايفه يكون ربنا مش كاتب لى دلوقتي وحاسه اني تايه من وقت ما اتخرجت

    • إبلاغرد صاحب الحساب

      الحاجات دي بإيد ربنا، اشتغلي على نفسك وماتربطيش حياتك بحد.

  • رسالة منشورة

    اجبلي موجه لحياتي منييين

    • إبلاغرد صاحب الحساب

      😂😂

      موجه للحياة بشكل عام يبقى شوف لايف كوتش بس شوف حد محترم مايكونش بيبيع كلام. ويوقلك كلام من نوع طور نفسك.. عافر.. سافر.. غامر.. والهلس دا

  • رسالة منشورة

    كتب اسامة صلاح مفيدة ؟!

    • إبلاغرد صاحب الحساب

      مفيدة ياصديقي

  • رسالة منشورة

    عايزه ابدأ ف مجال التدريس بعد التخرج انا ف سنة تالتة تربية محتاجه ايه يؤهلني للخطوة دي .. و ازاي اضمن تعيين ف مدارس خاصة و ازاي اجيب طلاب كتير ياخدوا دروس عندي

    • إبلاغرد صاحب الحساب

      اعملي قناة على اليوتيوب وتخصصي في مجال واحد. واعملي صفحة على الفيس ونزلي فيها معلومات عن مجالك وكدا..

  • رسالة منشورة

    ادعيلي

    • إبلاغرد صاحب الحساب

      ربنا يوفقك ياصديقي

  • رسالة منشورة

    مساء الخير
    انا خريجة حقوق وجربت مجال المحاماة فى مكتبين اتقفلت خلانى خايفة لأن فى مكتب المحامى قال بتوع ربنا ميشتغلوش فى المحاماة والمكتب التانى كان بسبب لبسى لأنى مختمرة وبصراحه انا معنديش مهارات وعاوز انزل اشتغل بس تايه هل اجرب تانى فى المهنه ولا اسيبنى منها بس برضوا عاوزة انزل اشتغل .. ياريت لو حضرتك تفيدنى

    • إبلاغرد صاحب الحساب

      أنا مش عارف ظروف المحاماة الصراحة. بس صدقا ابعدي عنها فيه عرسان كتير هاتخاف تتقدملك.

      واسألي بردو حد في المهنة هو أدرى مني أكيد

  • رسالة منشورة

    هو الشغل الخاص لو احسن فى الراحه النفسيه والمادية من الشغل الحكومى
    هيبقى الاصح يسيب الحكومى ويشتغل خاص ولا يستمر فى الحكومى؟

    • إبلاغرد صاحب الحساب

      خاص إيه؟ تقصد شركات خاصة ولا تفتح شركة؟

  • رسالة منشورة

    هو احمد عبد المنصف قفل الاكونت ولا مبقاش ينزل حاجة ؟ لأن كنت بستفاد من صفحته

    • إبلاغرد صاحب الحساب

      قافل مؤقتا

  • رسالة منشورة

    لو فندق 5 نجوم مثلا والشغل في مواعيده اللي من 9 ل 5
    والشغل حسابات او حجوزات يعني التعامل كله تليفون وإيميل

    • إبلاغرد صاحب الحساب

      مش شايف فيها مشكلة. بس على ما أعتقد انهم بيشترطوا عليهم لبس بنطلونات وهكذا

  • رسالة منشورة

    ايه الإنطباع اللي بتاخده عن بنت شغاله في السياحه قبل ماتعرف انها back office ومحافظه علي حجابها عادي وبعد ما تعرف

    وهل لو حد رشحلك بنت للزواج بالمواصفات اللي عايزها هل مجال شغلها ده ممكن يأثر في قرارك وبنسبة كام % تقريبا

    • إبلاغرد صاحب الحساب

      بالتأكيد المجال بيأثر على قرار الجواز. يعني اللي بتشتغل دكتورة وعندها نبطشيات وكل يوم في عملية وهلكانة طول اليوم، مش هاتناسبني. و أي واحدة مواصفات شغلها بالطريقة دي كذلك.

      أما بالنسبة للسياحة فأنا معنديش تصور كبير عن الموضوع، يعني بتوقع المجالات اللي فيه تكون إرشاد أو شغل ترميمات مثلا أو سيلز في شركة سياحة وهكذا..

  • رسالة منشورة

    حضرتك قولت علي التليجرام اتعلم مهارة واحدة وحدة وكده فياريت حضرتك تقول اي أفضل مهارة نتعلمها

    • إبلاغرد صاحب الحساب

      موجود بالفعل على التليجرام قايمة بشوية مهارات

  • رسالة منشورة

    أنا خريج ٢٠١٥، من ساعتها وأنا شغال الحمد لله، عندي شوية خبرات حلوين وحاليًا ولله الحمد مدير قسم الدليفري موبايل أبليكيشن بإحدى الشركات السعودية، لكني جديد في المانجريال ليفل ومحطوط تحت ضغط شغل وتعليمي رهيب، محتاج مونيتور، ومحتاج أمشي بخطوات صح عشان أنجح، ما هو أنا بعون الله لازم أنجح.

    • إبلاغرد صاحب الحساب

      اتعلم لغة، وبص على المحتوى الأجنبي هاتلاقي حاجات كتير تفيدك

  • رسالة منشورة

    عاوزة مساعدة؟ إزاي ابقى ثابتة ومتوترش وأنا بشرح؟؟
    خصوصا بتحرج اكتر لو شباب ثانوي أو كلية ..
    بدأت أعطي دروس من سنة
    والعدد مش بيبقى كتير، يعني ٤ او ٥ كدا، وأنا متخرجة من ٥ سنين

    • إبلاغرد صاحب الحساب

      مش عارف حل الحقيقة، بس المفروض من سنة تكوني اتغلبتي على الموضوع دا بشكل كويس.

      عموما التمرين الكتير وانك تكوني خبرة في مجالك دا بيديكي ثقة أكبر

  • رسالة منشورة

    عندي 25 سنه اتقدملي ناس كتير جدااا واتخطبت مرتين بس مشكلتي في الحياة اني طموحة ومن عيله كويسه ومعظم اللي بيتقدمولي بحسهم اقل مني ومفيش قبول خالص ولا برتاح لحد ودلوقتي اللي بيتقدمو بقو اوحش من اللي كانو بيجو زمان وانا حلوة ومش عايزة اسمع كلام اهلي اني اتجوز اي حد وخلاص المهم يكون محترم مش مقتنعه بالكلام ده نفسي في حد اكون فرحانه بيه وعندي مشاعر ناحيته وخايفه العمر يجري بيا ومطولش حاجة في الاخر خصوصا اني من منطقة تعتبر ارياف رأيك ايه وهل في امل الاقي اللي انا عيزاه في يوم من الايام ولا مستحيل

    • إبلاغرد صاحب الحساب

      خدي دورة دكتور محمد خير الشعال للجواز هاتجاوبك على أسئلة كتير

  • رسالة منشورة

    لو انا شخص عندي مهارة معينة ومحترف فيها جدا وكنت بشتغل في كذا مكان ولظروف ما قررت اسيب الشغل
    ازاي اسوق لنفسي وابني عملاء ليا سواء على أرض الواقع او بشكل إلكتروني
    ايه الخطوات او الخطة اللي ممكن امشي عليها

    • إبلاغرد صاحب الحساب

      قدم محتوى مجاني في مجالك، فيديوهات، بوستات، مقالات.. الخ

  • رسالة منشورة

    عاوز رد مقنع لخطيبتي عشان متحطش صورها ع الفيس ؟

    • إبلاغرد صاحب الحساب

      بص ياصديقي هي غلطتك من البداية، انت واخدها وهي بتحط صورها ماتجيش تغيره بعد كدا. إلا لو انت متفق معاها إن الوضع دا يتيغر

      عموما قولها أنا دي حاجة بتخليني أشعر بالغيرة خصوصا لما اعرف إن فيه بعض الأشخاص ممكن يفضلوا يتفرجوا على صورك ويدققوا وكدا. قولها معلش دي حاجة بتإذيني، فتفضلا منك ياريت بلاش تعمليها

  • رسالة منشورة

    ممكن تقترح عليا كبنت في امتياز أقدر أفتح مشروع ايه و ميكونش مكلف أو أنا نفسي لو حابة أشتغل حاجة كفريلانس جنب شغلي كطبيبة امتياز.. هو سؤال واسع شوية بس ياريت لو عندك جواب🤗

    • إبلاغرد صاحب الحساب

      شوفي مواد كنتي شاطرة فيها واشرحيها للطلبة مقابل فلوس. أو ممكن تشوفي مجال تخصصك إيه هو وتشتغلي في حاجة تخصه. يعني مثلا لو جلدية، يبقى قدمي نصايح للبشرة وبيعي كريمات وهكذا.. الخ

  • رسالة منشورة

    مساء الخير شكرا جزيلا لحضرتك
    أنا أخصائية تغذية علاجية وظروفى تمنعنى من الشغل اوفلاين حاليا.. الاونلاين أنسب إيه ممكن اعمله يزود الاقبال على الخدمات المقدمة فى صفحتى ؟

    • إبلاغرد صاحب الحساب

      قدمي نصايح مجانية على صفحتك للجمهور بتاعك واعملي إعلانات وهايجيلك عملاء بإذن الله

  • رسالة منشورة

    انا عاوز افتح سوبر ماركت تفتكر اي الحاجه الكريتيف الي ممكن اعملها و تجذب الزباين

    • إبلاغرد صاحب الحساب

      لازم تكون فاهم في المهنة أولا. شغل التلاجات بتاعة السوبر ماركت مش سهل

  • رسالة منشورة

    أ. عبد الرحمن لو محتاجة حد يعملي خطة تسويق جيدة لشغلي، هل ده عملك؟ ولو لأ ممكن ترشيح لحد، وهل لازم أدور على حد عنده خبرة في مجالي ولا مش هتفرق؟

    • إبلاغرد صاحب الحساب

      الأفضل تشوف حد متخصص في مجالك، بس اديني نبذة عن مجالك يمكن اقدر اساعدك

  • رسالة منشورة

    بنفكر أنا وصحابي نعمل مشروع space محترم هيكون في المنوفية مش في القاهرة إزاي أقدر اختار المكان وإزاي أعمل ديكور محترم للمكان
    بلاك هارت عليك

    • إبلاغرد صاحب الحساب

      بلاك هارت عليك ياصديقي.

      افتح جنب الجامعة، بس تكون جامعة فيها عدد طلبة كتير

  • رسالة منشورة

    امته تأخد قرار انك تسيب الشغل فعلا؟
    بقبض مبلغ نسبياً كويس بس ده مش حقى يعنى المفروض مثلا ااقبض 6000 بقبض 2000
    مفيش حواليا شغل براتب كويس و حاليا
    بس حاسه بالظلم و مفيش تغيير من قبل الشركة حتى لو اتكلمت
    و ضميرى مش سامحلى ااقصر ف شغلى
    مش محتاجه الفلوس بس مبعرفش مشتغلش
    اعمل اى

    • إبلاغرد صاحب الحساب

      سيبي الشغل في حالة إنك لقيتي شغل تاني. اعملي اللي عليكي في الشغل وقوي البورتفوليو بتاعك بإنجازاتك، واتعاملي مع الشركة اللي انت فيها بمبدأ: انتوا محطة في حياتي عشان مش لاقية غيركم بس في أول فرصة هاسيبكم وامشي.

      بس دا بينك وبين نفسك يعني ماتعرفهمش حاجة زي دي، وحتى لما تمشي ماتبلغهمش بقراركقبلها عشان مايكلوش عليكي المرتب طالما ظلمة

  • رسالة منشورة

    أنا كبنت لو عايزا أتعلم مهارة معينة وأشتغل بيها خلال سنة بالكتير
    حضرتك ممكن تقترح لي مهارة ومصدر أتعلم منه المهارة دي ذاتيا
    + إني بتعلم الماني وعلم شرعي والكلية لكن مش بروح كتير ومش ناويه أشتغل في المجال بتعها أصلا

    • إبلاغرد صاحب الحساب

      الألماني يكفي وزيادة. اتعلميه انت بس وهاتكوني في حتة تانية بعد سنة، كل الناس تحسدك عليها

  • رسالة منشورة

    لو شاب بعد ما اتخرج اشتغل معيد في هندسة،رأيك ممكن يشتغل ايه بجانب ده ،و هل تنصح بالاستمرار في المجال لانه ثابت و مكانة علمية ؟

    • إبلاغرد صاحب الحساب

      ادي كورسات أونلاين في مواد هندسة، هاتجيبلك فلوس حلوة جدا.

  • رسالة منشورة

    مجالي تحفيظ القرآن، بس الإنجليزي بتاعي ضعيف، عايزة ابدء أشتغل أونلاين بس وأوسع مجالي كتر، عندك إقترحات لخطوات أعملها، تجني ثمرها ولو بعد كذا سنة

    • إبلاغرد صاحب الحساب

      ممكن تتعلمي لغة وتحفظي قرآن للأجانب، الدخل هايكون أحسن

  • رسالة منشورة

    رد هنا علي الرساله دي لو سمحت عشان اعرف راءي حضرتك

    • إبلاغرد صاحب الحساب

      انهو رسالة عشان فيه كذا واحدة؟

    • إبلاغرد صاحب الحساب

      يعني 20 ساعة يوميا !!

      لأ دوري على شغل 12 ساعة في اليوم بمرتب يساويهم هما الاتنين أحسن. وهاتلاقي بإذن الله. بس ماتسيبيش الشغل إلا لما تمسكي في شغل تاني.

  • رسالة منشورة

    عندنا محل ادوات صحية فى منطقة مساكن أهالى ممكن ندخل مجال ايه تانى يحتاجه السكان مع العلم فيه محل أدوات كهربائية وحدايد وبويات جمبنا
    ممكن اقتراحات لو حاجة جت فدماغك

    • إبلاغرد صاحب الحساب

      ممكن تعملوا خدمات سباكة، تجيبوا صنايعي بمرتب واللي محتاج يصلح حاجة تبعتوله السباك ومعاه قطع الغيار من عندكم. منها بيعتوا قطع غيار أكتر ومنها هاتستفيدوا بسعر الخدمة، والزباين هاتجيلكم أكتر عشان عندكم خدمة متكاملة

  • رسالة منشورة

    أنا عارف انك مش استشاري نفسي لكن أنا طالب منك خدمة هتفرق معايا في حياتي كلها.. أنا طالب في هندسة قسم ميكانيكا فرقة تالتة... ومحتاج موجه ليا في حياتي.. انت كنت اتكلمت عن الإنسان يختار له موجه سوا في مجاله أو حياته بشكل عام.. ف طالب منك تكلم البشمهندس احمد عبد المنصف أنه يوجهني.. انا عارف أنه مشغول ومش فاضيلي وانا مش حد من معارفه عشان يضحي بجزء من وقته عشاني.. لكن أنا هكون بطلب رأيه بس في انا عاوز ادرس كذا يا بشمهندس.. اي في رأيك افضل كتب ابدأ منها.. خطة منهجية اتبعها.. وهكذا سواء في دراستي أو ديني.. اكلمه مكالمة ربع ساعة يظبط بوصلتي في الحياة.. علي الاقل حتي استشعر أن فيه حد كويس في حياتي اعرفه يشجعني وهو شخص ما شاء الله عليه جامع بين علم في الدنيا وعلم شرعي وعنده حكمه وقول حسن ♥️
    ارجوك وصل رسالتي له وعرفني رده وافق ولا رفض وينصحني ب اي لو هيرفض اروح لمين او اعمل اي..
    مش عارف دا هيضايقك ولا لاء بس دا رقمي لو شاء ربنا ان حضرتك ترد عليا لو محبتش ترد علي الصفحة عندك علي العامة.
    01093360108

    • إبلاغرد صاحب الحساب

      والله ياصديقي، منصف مش بيرد على تليفونات خالص. وحتى الرسايل مش بيرد عليها إلا مرة في المليون مثلا

  • رسالة منشورة

    ممكن حد انطوائي يدوس في مجال الماركتنيج؟

    • إبلاغرد صاحب الحساب

      اه عادي وينجح ويكسر الدنيا كمان

  • رسالة منشورة

    أنا كان عندي فكرة متخلفه انه أي حد درس كلية غير الكليات الطبية بيبقو طلبه فيهم تفاهه و ده سببه اني عرفت ناس كدا
    بس بعد بوستاتك الموضوع مش بالكليه هو بتسمع لمين و بتقرأ ايه
    ربنا يوفقك يا رب

    • إبلاغرد صاحب الحساب

      تسلم ياصديقي.. متشكر جدا 🙏

  • رسالة منشورة

    احب شخص جداً ونتحدث يومياً وانا اعرف ان هذا خطأ وتبت كثيراً وعدت مرة اخري سئمت نفسي ولكن لا اعلم وليس لي القدره ع البعد ماذا افعل.

    • إبلاغرد صاحب الحساب

      احضري دروس الشيخ سمير مصطفى

  • رسالة منشورة

    •نفسك ربنا يستعملك باية في ارضه .. الاثر اللي نفسك تسيبه يوما ما يعنی..؟
    اكتب بيه بوست علي فيسبوك
    • هل اختيارات الانسان بالضرورة تحدد طريقة تفكيره ؟
    رائيك؟ بردوا ياريت في بوست لو هترد

    • إبلاغرد صاحب الحساب

      بإذن الله

  • رسالة منشورة

    اتمنى تساعدني ازاي اعدي فترة اكتئاب بعد الولادة وفكرة ان جوزي شايف انه عادي وكل الستات بتولد لكن انا فعلا مجهدة ومكتئبة وحزينه

    • إبلاغرد صاحب الحساب

      الذهاب لطبيبة نفسية

  • رسالة منشورة

    دورات أو محاضرات فادتك علي المستوى الشخصي والاجتماعي؟

    • إبلاغرد صاحب الحساب

      دورات دكتور طارق سويدان.

      دورات بشمهندس أيمن عبد الرحيم طبعا.

      دورات الشيخ محمد صالح المنجد

  • رسالة منشورة

    الكليه عندي كلها ولاد وشغلها في مجموعات اجتماعيه شوية بزياده....توصيني بأيه بخصوص مسألة الاختلاط والضوابط🥺

    • إبلاغرد صاحب الحساب

      الكلام مع الرجالة لو انت ست يكون بقدر الحاجة فقط.

      ولو انت راجل كذلك

  • رسالة منشورة

    ربنا يسترك لو تقدر ترد ع سؤالي وحيرتي وتقدر تفيدني بترجاك تجاوبني، ازاي ممكن شخص ممكن يحب اتنين؟ ازاي بيقدر ما يحسش بذنب حد فيهم وهو بيكلم اتنين بمسمى الحب أو الصداقة؟ ولو كدا فعلا وابتليت بحب شخص كدا- وانا عارفة اني غلطت- ازاي أقدر أتخلص من العلاقة المؤذية دي وتعلقي بيه ممكن يقل ازاي؟!

    • إبلاغرد صاحب الحساب

      دي نهاية متوقعة للكلام بين الست والراجل.

      اقطعي الكلام فورا ومع الوقت هاتنسي. وشوفي مقاطع دكتور محمد خير الشعال

  • رسالة منشورة

    شاب ٢٢ سنة في كلية طب السنة الرابعة يريد الزواج ل شدة الفتنة...هل، في رأيك، من سبيل أن يعمل مع دراسته و يتزوج أم لا حل غير الصبر.. اعذرني عارف ان السؤال عام شوية

    • إبلاغرد صاحب الحساب

      بص ياصديقي هو صعب جدا، ولكن مش مستحيل. شوف والدك لو ينفع يساعدك. هايكون كويس جدا.

      وخد بالك إن ربنا وعد اللي عايز يتجوز بإنه ييسر عليه. فنام وارتاح ياصديقي وخطط وتكتك يادكتور وكله هايتسهل بإذن الله

  • رسالة منشورة

    زوقك و أسلوبك جميل ما شاء الله عليك بتحب تفيد الناس و تبسط الدنيا ربنا يباركلك و يوفقك يارب 🌸

    • إبلاغرد صاحب الحساب

      آمين.. اشكرك جدا 🙏

  • رسالة منشورة

    إزاي أوصل لمستوى عالي من الثقافة والتفكير والنجاح في الحياة العملية والعلمية والدين أثناء دراستي الجامعية مع العلم انه انا في كلية عملية طبية

    • إبلاغرد صاحب الحساب

      كل دا بيبقى صعب مع الكليات العملية الطبية، لإنها بتاكل الوقت. ركز في الكلية أفضل لو مستقبلها كويس، وثقف نفسك على خفيف كل يوم في المواصلات

  • رسالة منشورة

    بدور علي شغل ومش لاقي اي شغل مناسب مع الدراسه مش عارف اعمل اي

    • إبلاغرد صاحب الحساب

      اشتغل تسويق بالعمولة، وانشر اعلانات على أولكس، وفيس بوك وفي الجروبات ووسط اصحابك.. الخ

  • رسالة منشورة

    ادعي ازاي لشخص بحبه بالفرج

    • إبلاغرد صاحب الحساب

      ربنا يفرجها عليك.

  • رسالة منشورة

    الشغل اللى انا لسه بادئ فيه ضغطه كبير جدا ، وانا اول مشتغلت عملت غلطة فى الشغل كبيرة بس التحقت يعنى و المقابل أن كل الكلام و التشجيع بيكون بالعافية أو مش تشجيع، بيكون زى(معلش) كدا ، و كل يوم بيعدى بحس أن الضغط بيزيد ،اتخلص من رهبة البداية دى ازاى؟ خصوصا انى شخص كلام المحيطين بيأثر فيه بشكل كبير

    • إبلاغرد صاحب الحساب

      بكرا تتعود، أه والله زي مابقولك كدا.. بكرا هاتتعود وهاتتحط تحت ضغط أكبر يخليك تشوف الضغط اللي انت فيه دلوقتي كلام عيال

  • رسالة منشورة

    السلام عليكم ورحمه الله وبركاته... حبيب أنا زميل في كلية تجارة فرقة تانية وبفكر اخش قسم إدارة انصحني أتوكل ولا أخش محاسبة زيي زي اي حد

    • إبلاغرد صاحب الحساب

      على حسب دماغك، أنا كنت بحب العلوم الإدارية لذلك تخصصت إدارة. لو انت بتحبها ادخلها وتوكل على الله.

  • رسالة منشورة

    هعبر..
    بقالى مده عاوزه اعيط مش عارفه النهارده نمت كتير يمكن اعرف اهرب من افكارى ...... ولسه مش عارفه دماغى هتموتنى ،قررت بكرا بعد الجامعه اطلع اقعد ع البحر واعيط اتمنى تنفع ..يمكن العياط يهدى دماغى شويه ....
    مش ع حبيب ولا ع حد غالى وراح ...هعيط عشان كلهم اذونى اذونى ف أقرب الناس لى ..دمروا حياتهم فتلقائى لقيت نفسى ادمرت ، لى عملوا كدا بجد ، لى الناس بقت مؤذيه كدا
    مش مسامحاهم ابدا ابدا ابدا

    • إبلاغرد صاحب الحساب

      قولي حسبي الله ونعم الوكيل

  • رسالة منشورة

    حاجه عن اكتئاب الدراسه بالله عليك صيدله دايسه علي وشنا رايح جاي 😂💔

    • إبلاغرد صاحب الحساب

      اطلع يوم اسكندرية أو انزل وسط البلد مع حد صاحبك ودلع نفسك كدا وفرفش ياببلاوي، لسة اللي جاي تقيل 😂

  • رسالة منشورة

    انا شخص بدور على عروسه اكبر فرق بين الشخصين في السن يكون اد ايه لو حوالي ٧ سنوات على هيكون في اختلاف في الشخصية و الفكر كبير

    • إبلاغرد صاحب الحساب

      لأ عادي سبع سنين مش وحش

  • رسالة منشورة

    لو شاكه ان خطيبي مش فرحان بيا ومش عاوزني بس اهله هما اللي عاوزني،و بر الوالدين قيمه عنده عاليه وهما كبروا وعاوزين يفرحوا بيه اعرف ده ازاي لو تقدر تفدني!

    • إبلاغرد صاحب الحساب

      ابحثي عن دكتور هالة سمير، للاستشارات الزوجية، أو هويدا الدمرداش

  • رسالة منشورة

    انا في كلية تجارة وبعيد تانية علشان مشكلة حصلت مع مراقب نفسيتي زفت خالص قولي اعمل اي ؟؟
    +اي اللي الحاجات اللي ابدا اتعلمها تساعدني في المجال اللي بدرسه

    • إبلاغرد صاحب الحساب

      أنا سقط سنتين في تجارة، عادي جدا. ماتخليش حاجة تأثر على نفسيتك.

      ابدأي بالانجليزي

  • رسالة منشورة

    ازاي الإنسان ي move on من أي failure في أو دراسه شغل أو اي حاجه وخاصه لو دراسة وفي المجال الطبي وحصلهdrop في السنه الأولي؟!!
    اتمني حضرتك تجاوب أو حتي تخلي الناس تجاوب في الكومنتس عند حضرتك وهشوفها وشكراً مقدماً.

    • إبلاغرد صاحب الحساب

      الفشل جزء طبيعي من حياة أي بني آدم. أنا شخصيا فشلت وبفشل ولسة هافشل.

      هي الحياة كدا نجاحات وشوية فشل وتجربة وخطأ.. الخ

  • رسالة منشورة

    حياتي بتضيع ف التوهان مش عارفة اتحرك خطوة

    • إبلاغرد صاحب الحساب

      اتحركي.

      مافيش حل غير انك تتحركي

  • رسالة منشورة

    تعرف حاجه عن مجال تأسيس الشركات
    تبع قانون و تجاره اعتقد

    • إبلاغرد صاحب الحساب

      ماعنديش خلفية ياصديقي، بس ممكن تبعتلي سؤال محدد يمكن اقدر اساعدك

  • رسالة منشورة

    السلام عليكم الحقيقه انا من المتابعين في صمت اللهم بارك طريقه تعبيرك عن الكثير من المواضيع بشوفها متزنه وبشوف فيها ثمره تعب بباك ومامتك فيك ربنا يبارك فيهم السؤال بقي انا عاوزه استفاد من تربيتهم ليك بأنك تقولي بجد بباك ومامتك ازاي قدروا يزرعوا فيك ده وايه في تربيتهم فعلا اثر فيك قولت عليه الحمد لله انهم عملوا كده لما كبرت ... يارب يكون وصل سؤالي لاني بجهز اني اكون ام وربنا يرزقني

    • إبلاغرد صاحب الحساب

      أشكرك جدا يافندم، واتمنى اكون زي ماحضرتك متصورة عني.

      والله مش عارف حاجة محددة الصراحة، بس يمكن أهم حاجة اتربيت عليها هي إن الدين يكون رقم واحد في حياتي.

      بردو كانو بيخلوني اعبر عن رأي من انا وطفل صغير وكانوا بيسمعوا كلامي لو شايفين انه صح.

      ما اتدلعتش إطلاقا رغم اني وحيد ماعنديش اخوات ولاد ولا بنات، وبردو تقريبا ما اتضربتش منهم غير مرتين على ما أذكر.

      دايما كانوا بيحاولو يحافظوا عليا من الصحبة السيئة عن طريق انهم يمنعوني من التواجد في أماكن معينة، أو السفر مع صحابي مثلا لحد ما كملت 17 سنة تقريبا.

      باعو التليفيزيون ومنعوه من البيت ودا خلاني اقضي جزء كبير من طفولتي في القراءة، ودا يمكن كان ليه أثر كبير علي لما كبرت.

      طبعا دخولي الأزهر فرق معايا، وما أدركتش دا غير لما احتكيت بالناس برا ولقيت إن معلوماتهم الدينية تكاد تكون صفر.

      دا باختصار اللي عملوه معايا

  • رسالة منشورة

    فيه قدامي منحه للدراسه بره لكليه انا حباها بس المشكله انه امي واخواتي البنات هيكونوا لوحدهم خايفه اسيبهم وخصوصا اني انا الكبيره واخواتي صغيرين وف نفس الوقت الكليه دي حلمي من يون وفاه والدي وانا يعتبر شايله مع امي المسئوليه ضحيت بأحلام كتير خايفه قدام اجي الومهم او اندم اني ضيعت اكتر حلم كان نفسي فيه 🥲🥲🥲

    • إبلاغرد صاحب الحساب

      السفر للخارج للسيدات ليه أحكام شرعية، يفضل تسألي شيخ أولا، خاصة لو الدولة أوروبية

  • رسالة منشورة

    ايه رايك في شغل الاتحاد تبع الجامعه ولا الأسر كده انا بشوفهم بيتعاملوا مع بعض كاخوات عادي خايفه يكون فيه أبعاد تانيه للموضوع

    • إبلاغرد صاحب الحساب

      مافيش راجل بيتعامل مع الست زي اخته، يتعامل معاها باحترام أه، انما اخته والكلام دا مافيش.

      ادخلي بس شوفي الوضع عامل ازاي، لو فيه هزار وكدا اخلعي، عشان مش هاتقدري تقاومي بسهولة

  • رسالة منشورة

    مش هتتجوز بئا

    • إبلاغرد صاحب الحساب

      بإذن الله، قول يارب

  • رسالة منشورة

    كيف تتعامل مع المعضلات الاخلاقية في الدين ؟؟ كالسباية وزواج الضغيرة ....
    انا تعبت من المواضيع دي ومش عارف اتعامل ازاي

    • إبلاغرد صاحب الحساب

      محتاج تتعلم الدين من قواعده ياصديقي و أي شبهة عندك هاتلاقيها بتدوب زي الملح في الماية

  • رسالة منشورة

    لو حضرتك ممكن ترشح شيخ كويس ابدأ معاه فقه أو دورة حتى

    • إبلاغرد صاحب الحساب

      أكاديمية زاد

  • رسالة منشورة

    انا لسه بدرس لغه عربيه جامعه الازهر حاسه اني تايهه ومش حابه الكليه انا حاليا في تانيه ومش عارفه اعمل اي تفتكر احول ولا اكمل

    • إبلاغرد صاحب الحساب

      لو بتعرفي تنجحي بدون ماتبذلي مجهود كبير، خليكي فيها واعملي أي حاجة بجانب الكلية زي إنك تشتغلي مثلا. وبردو شوفي الكليات المتاح التحويل ليها لو شايفة حاجة مناسبة ليكي حولي، بس مانصحش يعني انت خلاص يعتبر في نص السكة

  • رسالة منشورة

    أصبح القلب عجوزا وقاسياً أصابني الفتور في الطاعات ومجاهدة المعاصي أصبحت أقل ما يمكن، الهمة تتناقص، وحين أحاول التغيير أكمل اليوم ويرجع كل شيء كما كان في اليوم الذي يليه فكيف السبيل للعودة،
    لعل القلب يعود كما كان.

    • إبلاغرد صاحب الحساب

      اتفرج على دروس الشيخ مصطفى سمير

  • رسالة منشورة

    اهتم شوية بالتليجرام مؤى الشباب الكحيان اللي عاوز يقرأ كلمتين ينفعوا😅
    احنا بنكره فيسبوك وكل ما يمكلك مارك زوكربيرغ

    • إبلاغرد صاحب الحساب

      عنيا حاضر، اهو بحاول انزل كل فترة حاجة 😂

  • رسالة منشورة

    مش ناوي تنزل حاجه على اليوتيوب عاوزين نشوف طلتك البهيه

    • إبلاغرد صاحب الحساب

      بحاول والله، بس بقالي فترة بحاول اركز في الشغل شوية

  • رسالة منشورة

    السلام عليكم
    ممكن حضرتك تعمل لنا خطة لتعلم مهارة التسويق ذاتيًا إن أمكن

    • إبلاغرد صاحب الحساب

      على جروب التليجرام

  • رسالة منشورة

    يعني مش معاك مدير في ظهرك واي حاجه هتحصل هتبقي غلطتك
    والقسم كله مسئوليتك
    مع العلم انك شيلت المسئوليه دي مايقرب من سنه بس في وجود مدير متابع شغلك ومديك الأمان

    الإداره نفسها مش كويسه والناس بتمشي مع اول فرصه

    • إبلاغرد صاحب الحساب

      هل هايقدروا يجازوك ماليا مثلا زي إنهم يكتبوك شيك أو كدا، أو يعملولك قضية؟

      لو الإجابة لأ خلاص روح اشتغل معاهم وابحث عن فرصة شغل وانت شغال وأول لما تلاقيها ابقى سيبهم بس بدون ماتقولهم عشان ماياكلوش عليك المرتب

  • رسالة منشورة

    تعمل ايه لو مش لاقي شغل كويس واتعرض عليك ترجع لشغلك اللي كنت فيه مشرف
    بس هتشيل الليله وهتلبس بمعني أصح عشان كله هيكون تحت مسئوليتك

    • إبلاغرد صاحب الحساب

      هتلبس بمعنى إيه؟

  • رسالة منشورة

    تعمل اي لو جواك كراكيب ومبارك كتير واسئله اكتر وخوف وندم علي ضياع العمر ومفيش حد تشتكيه ولا هيفهم كم الصراعات ال جواك ال هو بتبان عادي بس انت من جوه مشوه خايف تقابل ربنا بكل الخراب دا عاوزه تكسب دنيا وآخره احساس انك بتعافر لوحدك نفسك حد ياخد بايدك علشان تعرف تصلح الخراب ال جواك ولا هو دلع وعدم احساس بالمسؤولية عارف الخراب دا

    • إبلاغرد صاحب الحساب

      لو انت راجل، انزل صلي في الجامع حاول ماتكونش لوحدك عشان الشيطان مايصطادكش.

      روح اغتسل وصلي ركعتين استغفار وانت هاترجع ابيض من جديد. ولو التليفون مش بتحتاجه في الشغل بيعه، واشتري مكانه حاجة كحيانة عشان غالبا السوشيال ميديا هاتكون مأثرة عليك جامد

  • رسالة منشورة

    صراحة حابة أستشير حد بيفهم في الشغل عامة مع وجود خلفية ومرجع ديني، فسامحيني لو أطلت وجزيت خيراً.
    سيبت شغلي بعد 3 سنين فيه من شهر سبتمبر اللي فات لأسباب
    المجال ليه علاقة بالتلفزيون والقنوات، وكنت عارفة إن في شبهه، بس كنت واخدة بفتوة دار الإفتاء.
    - بطلت أتعلم حاجة جديدة من بعد سنة من وجودي في الشركة، حرفياً مفيش إضافات.
    -شايفة إن الوقت بيضيع وأنا أصلاً مش شغالة في المجال اللي أنا عايزة أبدأ فيه، وحقيقي كنت حاسة إن قضيت 3 سنين وخبرة يعتبر صفر لو قدمت في المجال اللي عايزة أتخصص فيه.
    - ال 3 سنين اللي فاتوا كنت بصبر نفسي وبتحرى أوقات الدعاء وأدعي ربنا يخرجنا من الشركة.
    - الشركة بتمشي الناس، ولكن بعد ما يقضوا فيها سنين عمرهم اللي فرص الشغل فيها بتكون كتير.

    -سيبت الشركة بدون ما يجيلي Offer من مكان تاني.
    - أنا أشتغلت في المجال اللي بدور فيه Freelancing وبيقولوا عليا شاطرة.

    - الإنجليزي الحمد لله كويس جداً كتابة وتحدث.

    - عندي مهارات ليه علاقة بالبرمجة
    -بشتغل على نفسي كتير، ف ال CV لطيف ودا مش بشهادتي، دا اللي بيتقالي في المقابلات.
    ولكن بقالي حوالي 4 شهور بدور على شغل ليل نهار( دا غير السنتين اللي فاتوا).. عمرها ما كانت صعبة كدا، كل تقريباً المقابلات يإما مجاش رد بعدها، يإما رفض، حتى الشركات اللي بعت لي Task وسلمتها وجات لي مراجعة لطيفة عليها، مسمعتش منهم تاني، يإما يتم تأجيل المقابلة في أخر لحظة بدون سبب وبدون رد مرة تانية.
    - كل الفرص اللطيفة اللي أتمنيتها ودعيت بيها، أترفضت فيها. ( مدركة إني مفروض معتقدش إن أنا شئ أو ينبغي أن يكون لي شئ) بس حقيقي الموضوع صعب.
    - بقيت أقدم في كل حاجة، فبدل ما كنت بدور على حاجات محددة، علشان أبني خبرة، بقيت بقدم في أي حاجة علشان أنقذ الجانب المادي بتاعي مع وجود إلتزامات عالية واللي عليت في السنتين اللي فات لأن مرتب الشركة القديمة كان كبير جدا فعلاً.
    -حاسة بعدم توفيق كبير أوي مصاحبني من فترة كبيرة في كل شئ.

    -أصلي الليل، وأدعوا الله ليلا نهارا وأحاول أن يكون لي ورد استغفار بشكل يومي، والحمد الله بحاول ألتزم أكتر من الأول.

    مش عارفة اللي أنا فيه دا نتيجة تسرعي؟ خطائي بإني سيبت الشركة؟ ذنوب مانعة دعائي، بدور في الإتجاه الغلط، مش قادرة أحدد، بس الوضع صعب نفسياً جدا.
    - بعتذر عن الإطالة، ويعتذر عن المشاعر السلبية الموجودة في الرسالة.

    جزيت خيراً كثيراً.

    • إبلاغرد صاحب الحساب

      اولا بصي على بوست عندي كنت مشير فيه مقطع للشيخ محمد مختار الشنقيطي. ثانيا بالنسبة للشغل حاولي تدوري على كارير كوتش تعرفي منه إيه اللي ممكن تعمليه. فيه واحد اسمه حسن القهار ممكن تتواصلي معاه

      https://www.facebook.com/hassan.kahar.9

  • رسالة منشورة

    بعاني جدا ف الفتره الحاليه من عدم استقرار واضطرابات
    نفسيه وتداخل مشاعر الحزن وعدم الرضا والسخط ع وضعي الحالي ..
    ربما يكون ده بسبب اني نفسي اعمل حاجه و وغير قادر عليها ف الوقت الحالي ، او بسبب اني زعلان علشان اخترت مجال امشي فيه وانا مبحبوش ومش قادر اطور نفسي فيه (مجال طبي) وخلاص بقيت ف اخر درجه ف السلم ولسه حاسس بندم لاختياري!!

    لو امكن تنصحني

    • إبلاغرد صاحب الحساب

      سيبك من الندم احنا ولاد دلوقتي. انزل شغلك عادي واتعامل معاه على إنه مصدر دخل لا أكثر، وبجانب الشغل حاول تجرب حاجات إضافية لحد ما تلاقي نفسك في واحدة منهم

  • رسالة منشورة

    فى فرصة اتعلم انجليزي لوحدي بدون كورسات لان ولا فى فلوس ولا متاح أخرج

    • إبلاغرد صاحب الحساب

      هل متاح معاك 299 جنيه؟

  • رسالة منشورة

    ادعيلى بصلاح الحال ، أحسبك على خير ولا أزكيك على الله

    • إبلاغرد صاحب الحساب

      ربنا معاك ياصديقي ويهديك 🖤

  • رسالة منشورة

    كنت عايزه اقول ان اه فكرة الموبيليا المستعمله النضيفه عملنا كده وجددناها وحرفيا متقدرش تفرقها بس هيا كانت تعتبر جديده أصلا مستعمله استعمال خفيف وخشبها تحفه لو اتعمل مش هيكون بالمتانه ديه وهيكلف جامد اوي عشان تعمل زيه

    • إبلاغرد صاحب الحساب

      بالظبط دا اللي بتكلم فيه، بس الدماغات بقى، يلا كل واحد ينام على الجنب اللي يريحه

  • رسالة منشورة

    هاي
    انا محمود بركات 😂 كنت عايز اقولك خد بلاك هارت 😂🖤🖤
    باي

    • إبلاغرد صاحب الحساب

      خد بلاك هارت ياحودا 😂🖤

  • رسالة منشورة

    قدامي فرصة انى اشتغل فى صيدلية مع ان ده مش مجالى وقدامي فرصة تانية انى اشتغل فى مكان زي مصنع بس هكون فى الادارة انا "زيرو خبرة"اختار انهى وظيفة بما ان حضرتك قولت ابدأ مع اول فرصه تبقى متاحه ليك

    • إبلاغرد صاحب الحساب

      اختار المصنع

  • رسالة منشورة

    اللي انت عايزه؟

    • إبلاغرد صاحب الحساب

      مش فاهم؟

  • رسالة منشورة

    لو حد معاه فلوس معينة يادوب تشطب شقته
    ومالوش هدف واضح لحد دلوقتي وبيتنقل من كارير لكارير لحد ميلاقي نفسه،
    فهل الأنسب بشطب شقته بالفلوس اللي معاه وياخدها دافع ويحوش كمان قرشين ويتجوز ويعيش زي ما الناس عايشة
    ولا يستنى يعمل كارير الأول والله أعلم هيتجوز امتى وهل هينجح في بناء كارير حقيقي ولا لا؟

    السن 25 سنة

    • إبلاغرد صاحب الحساب

      بص هو الموضوع مدارس، أنا تبع مدرسة إني لازم اكون محدد هاشتغل في إيه واستقر فيه شوية وبعدها اتجوز عشان مبهدلش معايا بنات الناس، عشان مش كل شوية اتنطط من وظيفة لوظيفة وهي معايا.

      بالنسبة للشقة شطبها واحدة واحدة يعني مرة تعمل السباكة وبعد مدة تعمل الكهرباء وهكذا، عشان احتمال تحتاج الفلوس قدام شوية فمتبقاش صرفتها كلها على الشقة.

      طبعا فيه حاجة مهمة، لو انت خايف على نفسك من الوقوع في الحرام، اتجوز وسيبها على الله

  • رسالة منشورة

    نتخطى حوار انك في دراسه مش حاببها ازاي؟

    • إبلاغرد صاحب الحساب

      لو لسة في البداية خالص حاول تحول، لو في نص الطريق انزل اشتغل وهاتلاقي إن الحافز عندك زاد إنك تخلص الجامعة

  • رسالة منشورة

    منصف مش عايز عروسة؟
    عندي ليه عروسة 😂

    • إبلاغرد صاحب الحساب

      لأ مش محتاج 😂

  • رسالة منشورة

    كان نفسي اهلي يعودوني من وانا صغيرة ع اني اشتغل واجيب فلوس وحالياً انا متدلعة وبذاكر وبسعى ع مهلي، ازاي اكسر دا واتأهل كمان كتفكير اني ازرع دا ف ولادي بإذن الله

    • إبلاغرد صاحب الحساب

      هو في الطبيعي مش مطالب منك كبنت إنك تنزلي تشتغلي وتسعي على رزقك. بس الواقع حاليا بيفرض إنك تمتلكي مهارة تكسبي منها فلوس.

      ابدائي اتعلمي أي مهارة ودوري على شغل بيها

  • رسالة منشورة

    انا بنت عمري ٢٤سنة لحد سنة ٢٠٢٠ مكنتش اعرف اي حاجة عن نفسي فالحمد لله بدور وابحث لكن لسه فسؤال اعمل ايه عشان اعرف هدفي او غايتي مع العلم إني مش بشتغل ولما اتجوز إن شاء الله مش ناوية اشتغل بس عاوزه ابقي بعمل حاجة مفيدة اعرف انا عاوزه ايه انا فاقدة الجزء ده جدا جدا

    • إبلاغرد صاحب الحساب

      جربي حاجات كتير واللي تلاقي نفسك ميالة ليه، كملي فيه

  • رسالة منشورة

    أنت جميل يا عبد الرحمن ♥️

    • إبلاغرد صاحب الحساب

      اشكرك ياصديقي.. خد بلاك هارت 🖤

  • رسالة منشورة

    أنت كراجل قادر تقرر إنك هتقيم بيتك بما يكفي بدون ديون وتبذير أنا كبنت قعدت تقريبا اكتر من خمس سنين أأهل أهلى إني مش عاوزة سفرة ودلوقتي بقول مش عاوزة أطفال كانوا هيوأدونى تقريبا فنعمل إيه مع أهالينا عشان الاتفاق فى الأول وفى الاخر بيكون مع الأب

    • إبلاغرد صاحب الحساب

      مش عارف الحقيقة بس الموضوع تدخل العقلاء من الناس أو إعلان حالة تمرد واللي يحصل يحصل

  • رسالة منشورة

    معلش كنت عايزه اخد رأى حد فى الموضوع دا
    انا فى الجامعه وبشتغل وبجيب حاجتى لنفسى وكل حاجتى من معايا هل لازم انى ابقى اوفر جزء من دخلى ولا ايه
    عشان حاسه انى مضغوطه بسبب انه يدوب مكفينى ومكفى مصاريفى وبين ان لازم اوفر جزء كل شهر ومش عارفه اوفر

    • إبلاغرد صاحب الحساب

      شوفي البنود اللي بتصرفي فيها. فلوسك ورتبيها بحسب الأولوليات لو ماكفتش بردو يبقى محتاجة تزودي مرتبك حتما ولا بد.

  • رسالة منشورة

    من الأشخاص المحترمة جدا واللي بستفاد منك بجد وهل في امكانيه اني اقابلك واقعد معاك شويه

    • إبلاغرد صاحب الحساب

      متشكر جدا ياصديقي الله يكرمك.. معنديش مشكلة نرتبها في أقرب وقت بإذن الله 🖤

  • رسالة منشورة

    لما يكون قدامك حاجات كتير مش عارف تبدأ بايه ولا ايه بتعمل ايه

    • إبلاغرد صاحب الحساب

      ببدأ بأي حاجة تيجي في سكتي

  • رسالة منشورة

    ذكرت قبل كده انك في طفولتك مكنتش بتتفرج ع التلفزيون ايه تقييمك دلوقتي للتجربة ديه هل ليها أضرار زي ماليها فوايد طبعا (رأيك هل ينفع نعمل كده مع الاطفال دلوقتي)

    • إبلاغرد صاحب الحساب

      ينفع وينفع جدا، دا أحسن وقت تعملوا فيه كدا خصوصا بعد مادخلوا الأفكار المسمومة في الكارتون

  • رسالة منشورة

    ف الاول جزاك الله خيراً علي كل اللي يتقدمه أستفدت كتير اوي من حضرتك ..
    عندي خطه ماليه حلوة اوي طبقتها و اللهم بارك جميله
    ممكن لو عجبتك تنزلها عندك تفيد بيها الناس ؟

    • إبلاغرد صاحب الحساب

      وإياكم ياصديقي.. متشكر جدا 🖤

      ابعت ياصديقي

  • رسالة منشورة

    ايه رأيك في موضوع انماط الشخصيةmbti (مايرز بريغز) وهل ضبط معاك فعلا نمط شخصيتك ايه

    • إبلاغرد صاحب الحساب

      مش بثق فيه الصراحة

  • رسالة منشورة

    من أكتر الناس اللي بجد مبسوطة أني بتابعها وبتمني اني اكون في نفس مستوي تفكيرها

    • إبلاغرد صاحب الحساب

      متشكر جدا لحضرتك.. أنا على أدي والله 😃

  • رسالة منشورة

    عرفت حضرتك من عند أحمد عبد المنصف وكان قدرا.
    اتعلمت حاجات كتيرة منك وفكرة البساطة وخاصة ف امور الزواج تشبعت بيها، التفكير المنطقي، وامور اخري
    ف شكرا ليك وجزاك الله عنا كل خير.

    • إبلاغرد صاحب الحساب

      العفو على إيه. 😃

      وإياكم ان شاء الله

  • رسالة منشورة

    علاج التسويف
    + محتاجه ابعد عن الموبايل فترة كبيره اعمل ايه والايام الاولى بتبقى عامله ازاى

    • إبلاغرد صاحب الحساب

      بالنسبة للتسويف شوف اخر بوست عندي.

      بالنسبة للموبايل بيعه لو مش هاتحتاجه في الشغل. لو معرفتش تبيعه حاول تشتري حاجة مستعملة تخليك تبقى متكدر انت وماسكه

  • رسالة منشورة

    أنت رايق جدًا ♣

    • إبلاغرد صاحب الحساب

      الله يخليك 😌

  • رسالة منشورة

    بحب المحتوى اللي بتقدمه.. نفع الله بك، و أرضى قلبك بما تتمنى 🤗

    • إبلاغرد صاحب الحساب

      اللهم امين. متشكر جدا ليك 🖤

  • رسالة منشورة

    انتا بنى ادم جميل وبعتبر نفسي عملت انجاز انى عرفتك انتا ومنصف وناس محترمة كتير بسب الاسك اتممى تكون بأحسن حال وابقى اكتب فى التليجرام

    • إبلاغرد صاحب الحساب

      اتمنى اكون عند حسن ظنك ياصديقي والله.. متشكر جدا ليك. هاكتب بإذن الله، عارف اني مقصر جامد 😭

  • رسالة منشورة

    انت حد محترم جدا وشكلك ابن ناس محترمة.وانا شخصيا بتعلم منك كتير والله وبتوقعلك مستقبل جميل ان شاء الله،،لكن كنت اتمني انك متستخدمش الابليكيشن لان ف اعتقادي ان ال بيستخدمه معندوش ثقة كامله ف نفسه،ممكن تكون انت صح عني،،بالتوفيق يا عبده

    • إبلاغرد صاحب الحساب

      الله يكرمك ياصديقي.. متشكر جدا 🖤

  • رسالة منشورة

    حضرتك مش عاوز تتجوز بتكلم جد ولله عندي عروسه ليك

    • إبلاغرد صاحب الحساب

      هاتجوز بإذن الله، شكلك عايز تخلص مني 😂

  • رسالة منشورة

    اتمني تنصحني .. لاني حقيقي مشتت ف الفتره دي .. وعندي احساس اني هلاقي الرد عندك .. هل اني اسيب شغلي لأني بدرس دبلومه مهنيه ف مجالي شيء غلط ؟ .. مع العلم اني حاولت اجمع ما بين الشغل والدراسه مقدرتش لاني بشتغل عدد ساعات كتير+مواصلات+اني مش مرتاح لاني مش بشتغل لا في مجالي دراستي ولا ف مجال حابه .. ومفيش وقت لاي مذاكره والامتحان كل ما يقرب اقلق اكتر وافكر ف تأجيل الامتحانات .. واسف علي الاطاله

    • إبلاغرد صاحب الحساب

      لو الدبلومة دي مردودها حلو عليك في المستقبل. يبقى سيب الشغل و اشتغل في مكان تاني بارت تايم أو ممكن تتفق مع شركتك إنك تشتغل بارت تايم مقابل خصم جزء من المرتب

  • رسالة منشورة

    كشاب بتعلم منك كتير بجد استمر بارك الله فيك و نفع بك

    • إبلاغرد صاحب الحساب

      دي مسؤلية ضخمة عليا والله. أشكرك جدا واتمنى اكون عند حسن ظنك

  • رسالة منشورة

    نكتر من محتوى ال interior design و ال furniture عشان مشاريع الكلية بس الله يباركلك 👀

    • إبلاغرد صاحب الحساب

      الانستجرام عليه حاجات أكتر من الفيس بوك

  • رسالة منشورة

    ازاي بتنظم وقتك وازاي اتخلص من الملل بيحصلي بسرعه جدا مهما اكون مخططه

    • إبلاغرد صاحب الحساب

      فيه مدرستين للإجابة على الموضوع دا:

      المدرسة الأولي التقليدية: ودي حلها في إنها تحفزك وتديكي شوية حلول مش مفيدة أوي.

      فيه مدرسة تانية عنيفة ( دي مدرستي). المدرسة دي بتقول:

      مافيش حاجة هاتخليك تنظم وقتك، مافيش حاجة هاتخليك تتخلص من الملل.

      الحل في إيدك انتي وأي حاجة تانية مالهاش جدوى بنسبة كبيرة.

  • رسالة منشورة

    من القليلين ال ليهم فكر مختلف بعيد عن روتين العامه ربنا يوفقك

    • إبلاغرد صاحب الحساب

      اشكرك جدا على الدعوة الجميلة

  • رسالة منشورة

    بارك الله فيك وفي والديك ربنا يوسع رزقك ويطمن قلبك ويرضى عنك 🌼

    • إبلاغرد صاحب الحساب

      الله يكرمك يافندم. متشكر جدا دعوة كنت محتاجها والله

  • رسالة منشورة

    انا متابعك بس عشان انت اتعلمت تخت المهندس ايمن عبد الرحيم فك الله اسره واجرعه لاهله وحها لوجه وتعاملت مع وبعدين كملت لمحتواك وفكرك في الماركتينج والاشياء العامة الاخرى

    • إبلاغرد صاحب الحساب

      شرف ليا ياصديقي

  • رسالة منشورة

    عبد الرحمن بيحب حنان وحنان مخطوبه

    • إبلاغرد صاحب الحساب

      انا ماسمعتش حد قالي كدا من ابتدائي. ضحكتني والله :D

  • رسالة منشورة

    فعلا من الناس اللي بتخليني افتح الفيس، شكرا للمحتوى اللي بتنزله، بتمنى يكون في طريقة متظهرليش فيها بوستاتك اللي فيها اثاث وديكور 😅

    • إبلاغرد صاحب الحساب

      اشكرك ياصديقي. للأسف مفيش طريقة لإخفاء بوستات الديكور

  • رسالة منشورة

    عادي انك تعبر عن رفضك للعادات الاستهلاكية الغلط ف الجواز بس بحس انك بتزودها حبتين، يعني زي ما متفقين مثلاً ان الإسراف ف الدين نسبي ع حسب حالة الشخص ف عادي ان حد يجيب العدد اللي هو عايزه طالما مأجبرش حد يعمل زيه او اتباهى بدا مثلاً الموضوع عندك بحسه بيزيد شويتين لدرجة الهجوم وخلق حلول وبتاع،اكيد ليك وجهة نظرك بس قولت أعبر عن إحساسي

    • إبلاغرد صاحب الحساب

      مظبوط كلامك لذلك بقول في أخر البوست، لو انت مستريح ماديا يبقى الكلام مش موجه ليك.

  • رسالة منشورة

    التليجرااام يا مولانااا

    • إبلاغرد صاحب الحساب

      عنيا حاضر، مقصر فيه جامد والله

  • رسالة منشورة

    رشحلى قنوات تعلم ماركتينج عربية أو أجنبية وياريت قنوات عن فهم المرأة

    • إبلاغرد صاحب الحساب

      فهم المرأة شوف دورة علم النفس لبشمهندس أيمن عبد الرحيم، وكذلك دورة البيت المسلم. أما بالنسبة للماركيتنج، يكفيك إنك تكتب كلمة ماركيتنج في اليوتيوب وهاتلاقي كل حاجة انت محتاجها