شو حاب تحكي؟

خلّي رسالتك لطيفة وبنّاءة

صورة، صوت أو فيديو · حتى 10 MB

لن تظهر رسالتك للعامة إلا إذا نشرها صاحب الحساب.

أسئلة المستخدم

لم ينشر أسئلة بعد.

الرسائل المنشورة

  • رسالة منشورة

    شوق ، كونك بتتبعي علامات ودلائل ليله القدر راحت ولا لسا حسب العلامات؟

    • إبلاغرد صاحب الحساب

      والله هالسنة ما تتبعت ولا ع بالي 😂
      بس بحس صيامنا غلط وانها كانت زوجية..
      بس بكل الأحوال بحس يلي جد قاصد وناوي ربنا بيسرله انه يقيم ليلة القدر
      والأفضل الاجتهاد بالعشر ليالي طبعًا

  • رسالة منشورة

    كنت حابه اتابعك مو اكتر 🤐

    • إبلاغرد صاحب الحساب

      أكيد بتشرف بس آسفة عالانستقرام ما بضيف حد ما بعرفه، بتقدري تتابعيني فيس 🙋🙆

  • رسالة منشورة

    ما حصل 🥺🤷🏻 شوفي الريكويست 🤐

    • إبلاغرد صاحب الحساب

      بقبل بس بنات بعرفهم* 😂😂🌚

  • رسالة منشورة

    م.شوق ما بتقبلي فولو ع الانستا؟ 🌚

    • إبلاغرد صاحب الحساب

      بقبل بس بنات 🌚

  • رسالة منشورة

    الله يسلمه ويسعده كبر ولا بعده ببو؟ 😂😂😂🤦

    • إبلاغرد صاحب الحساب

      الله يرحمه 🌚

  • رسالة منشورة

    شوق ، ضايل عن رمضان اقل من ثمن ليال، ادعيلي بتيسير الخير

    • إبلاغرد صاحب الحساب

      ان شاء الله
      ربنا ييسر أمركم وييسرلكم الخير

  • رسالة منشورة

    شو اخبار المشين ليرننج باث ؟

    • إبلاغرد صاحب الحساب

      بسلم 🌚

  • رسالة منشورة

    هاه هي طلعت النسكافيه والقهوه الصباحيه قابله للاستغناء

    • إبلاغرد صاحب الحساب

      أكيد 😂

  • رسالة منشورة

    كيف الدوام برمضان؟ 🌞بدون كافيين

    • إبلاغرد صاحب الحساب

      منيح والله الحمدلله

  • رسالة منشورة

    الله يقويك شوق 🌞 احلى انشغال لما الواحد يبعد عن الشاشات ❤️

    • إبلاغرد صاحب الحساب

      اه والله
      ان شالله ع طول بنضل مشغولين بأشياء تفيدنا

  • رسالة منشورة

    ديتوكس قوي عندك هالايام! 😁

    • إبلاغرد صاحب الحساب

      مشغولة 🌚

  • رسالة منشورة

    النبي ﷺ يقول: يا معشر الشباب! من استطاع منكم الباءة فليتزوج؛ فإنه أغض للبصر وأحصن للفرج، ومن لم يستطع فعليه بالصوم فإنه له وجاء،،ثلاثة حق على الله عونهم: المجاهد في سبيل الله، والمكاتب الذي يريد الأداء، والناكح الذي يريد العفاف. ، زمان كنا فاهمين انو الباءه هي استحقاق الماده والرغبه ، لكن الحديث الثاني لغى فكره الماده !بحثت كثير والاراء متضاربه ! ان كان لم يستطع فان له وجاء ! لم يقل فليقبل ورزقه مكفول!

    • إبلاغرد صاحب الحساب

      https://islamqa.info/amp/ar/answers/181556

  • رسالة منشورة

    شوق ، اسالك شي ديني محيرني من فتره !بثق بنظرتك بتحليل الامور

    • إبلاغرد صاحب الحساب

      تفضلوا
      بس اشي في إفتاء رح أعتذر منكم، لكن إذا مجرد رأي عادي

  • رسالة منشورة

    مش عارف زملاء الي خبروني انهم رفعو كتاب للرئاسه ولغو موضوع الاقتطاع ، مشكله اذا الكلام مش صحيح لانو متاملين عليكو 😂😂😂🤦 مبدئيا بباقي الجامعات والقطاعات رفعو كتب بالاعتراض وبنستنا النتيجه ، لكن وان كان لازم تتبهدل النقابه وينرفع عليها قضيه!

    • إبلاغرد صاحب الحساب

      اه والله لازم ومن زمان كمان

  • رسالة منشورة

    للفائده كونو جامعه التكنو رفضت الاقتطاع من رواتب مهندسيها لكن اذا بتحبي هي التفتصيل م.شوق:
    *اعلان بتاريخ ٢٥-٢-٢٠٢٤*

    *الزملاء في المحافظات ومن يصعب عليهم التوقيع في مكتب المحامي*

    - مرفق ملف الوكالة العدلية الذي ينبغي منكم طباعته و من ثم تعبئة البيانات (الأسماء و الأرقام الوطنية ) لدى كاتب العدل في محافظاتكم، الوكالة خاضعة لرسوم رمزية و بالإمكان كتابة اكثر من اسم على الوكالة بحضور كاتب العدل.
    -(نسخة الوكالة بصيغة وورد لكتابة الأسماء و الأرقام الوطنية قبل الطباعة : bit.ly/WakalehWord)
    -(نسخة الوكالة pdf لطباعتها ثم كتابة الأسماء و الأرقام الوطنية : bit.ly/WakalehPDF)
    -ثم يتم ارسال ما يلي :
    1- ورقة الوكالة العدلية الاصلية .
    2- صورة عن الهوية الشخصية .
    3- صورة عن هوية النقابة او شهادة العضوية.
    4- كتاب لمن يهمه الامر من الضمان الاجتماعي
    ٥- كتابة رقم الهاتف الخاص بالموكل ليتم التواصل معه

    -و يتم ارسال الاوراق عن طريق البريد الأردني او ارامكس لعنوان المكتب او بالإمكان تسليم الملف من قبل أي شخص متجه لعمان باليد لمكتب المحامي

    عنوان المكتب : ام اذينة / خلف وزارة النقل/ شارع سامراء/ عمارة 21
    رقم هاتف مستلم الارساليات في المكتب: 0796045922

    • إبلاغرد صاحب الحساب

      مين قال انها رفضت؟
      هاي الدكاترة والمهندسات المعينات صار في اقتطاع 🤔

  • رسالة منشورة

    بقصد انو في قضيه مرفوعه اذا بتحبي توكلي نفس المحامي لانو بحاجه انو يندعم بتوكيلات من المهندسين لتكون القضيه ذات نتائج فعاله ، بتقدري تشوفي قروبات المهندسين الرافضين للتعديلات سواء ع الواتس او الفيسبوك

    • إبلاغرد صاحب الحساب

      ايوه ايوه
      ان شالله يا رب يطلع بإيدهم اشي لانه صراحة يلي بصير اشي مش طبيعي، استغلال عينك عينك

  • رسالة منشورة

    شوق ، متابعه للاوضاع الاخيره لنقابه المهندسين؟ كثير مهم انو القضيه الحاليه المرفوعه ضد النقابه انها تندعم من المهندسين ضد الاجحاف الي قاعد بصير

    • إبلاغرد صاحب الحساب

      والله إحساسي النقابة عاجلاً أم آجلاً رح تنحلّ.. للأسف هم قاعدين بحطوا حل مؤقت لمشكلة إفلاس صندوق التقاعد... ورح يرجع يفلس 😁
      رح أمسك لساني وبس بحكي الله لا يحيجنا للنقابة

  • رسالة منشورة

    وكيف الديتوكس من السوشال ميديا ؟ بعده شغال ؟

    • إبلاغرد صاحب الحساب

      اكتشفت انه أنا أصلا مش كثير عالسوشال ميديا، أنا ممكن إدماني يوتيوب، بس برضو وقتي عليه مش خسارة لانه بحضر فيديوهات مفيدة.
      فعليا كنت عاملة ديتوكس من الناس ومن الحياة
      جد والله الواحد هناك بفصل عن الدنيا كلها

  • رسالة منشورة

    شوق ، كيف الاسعار بمكه ؟ فعلا زي ما بحكو غاليه جدا ولازم نجيب اغراض معنا؟، لانو الصراحه بفكر اقعد هناك شهر زمان اعتزل الكوكب

    • إبلاغرد صاحب الحساب

      واحنا انحكالنا نفس الحكي وأخذنا أكل تقول بدها تقوم الحرب، هو شوفوا الله العليم انه يمكن الأسعار بتختلف حسب المنطقة، يعني مثلا يلي بأوتيل شيراتون وأنجم وغيرهن يلي قراب جدا عالحرم، الأسعار حول هاي المناطق بتكون مرتفعة، أما المناطق الثانية عادي منيحة.
      احنا انحكالنا قال أرخص وجبة أكل ب 7 دنانير وكلشي غالي ومن هالحكي.
      احنا حجزنا بفندق أبراج التيسير بمنطقة التيسير، عادي فندق منيح نوعا ما،
      المنطقة يلي كنا فيها عادي فيها مطاعم الوجبة ب 3 أردني أو 3.5، في بقالة كلشي بتبيع ورخيص، الخبز والمي مثلا بريالين، في شغلات كثير بريال، مطعم البيك مثلا برضو وجباته سعرهن منيح وأكله زاكي.. هي بس الأزمة عليه، لكن عادي الدور بمشي بسرعة..
      خضار وفواكه مثلا برضو مش غالية زي ما حكوا، وانتوا رايحين عالحرم بكونوا ع بسطات يبيعوا بأكياس، موز وتفرح وفراولة وكلشي، وبرضو أسعارهن زي هون وأرخص كمان.
      المي موجودة في الحرم فش داعي تنشرى.
      مرة مشينا لمنطقة جنبنا شوي، كانت نفس البضاعة والأسعار أغلى بنتفة، مشان هيك بقلكم بيختلف يمكن من منطقة لمنطقة.
      احنا صراحة كنا الصبح نوكل أي اشي خفيف، وباليوم فقط وجبة وحدة لانه الواحد بضل بالحرم وما في وقت لاشي.
      واحنا أكلنا خفيف ف برضو بترجع للشخص كيف أكله.
      أخذنا معنا معلبات فول وحمص وسردين وتونا.
      استهلكنا حمص مرتين بس يمكن والباقي والله ما انفتح.

  • رسالة منشورة

    -

    • إبلاغرد صاحب الحساب

      الله يبارك فيكم ويسعدكم
      دعيت لكل يلي طلبوا مني

  • رسالة منشورة

    شو مهندسه
    شكلو في بزنس جديد
    ليرات عفق 😂😂😂😂😂

    • إبلاغرد صاحب الحساب

      الله يرزقنا 😂😂

  • رسالة منشورة

    آسف فكرتك عن قصد لأنه بحكي لحالي شوق مش شريرة😓

    • إبلاغرد صاحب الحساب

      لا والله مش عن قصد
      والحمدلله ما في أمور شخصية بيني وبين أي حد لأتصرّف هيك

  • رسالة منشورة

    ليش يعني ناس بتردي عليهم بإبتسامة و أنا بس سألتك عن حالك بدون إبتسامة ولا سياسية الكيل بمكيالين 🙁

    • إبلاغرد صاحب الحساب

      🤦🏻‍♀️
      برجع بعيد، أنا بردّ على أسئلة مش على أشخاص، وما بعرف مين بيسألوا أصلا..
      والابتسامة شكر لفضل ربنا ونعمه.

  • رسالة منشورة

    مهندسه كيفك
    اخبارك ؟

    • إبلاغرد صاحب الحساب

      الحمدلله بنعمةٍ من الله وفضل 😁

  • رسالة منشورة

    كيفك شوق؟

    • إبلاغرد صاحب الحساب

      الحمدلله منيحة

  • رسالة منشورة

    شوق القديمه الجديدة رجعت 👾🌞 بنبسط ع بوستاتك الي فيها عصفك الذهني 🤩

    • إبلاغرد صاحب الحساب

      والله صراحة وأنا مبسوطة انه شوق القديمة رجعت 😂😂

  • رسالة منشورة

    تعرفي يا شوق اكثر شي سيء انك تنحط بوظيفة ينفرض عليك انك ما تادي عملك بإتقان ، واذا اديته رح تتحارب من الي فوقيك !

    • إبلاغرد صاحب الحساب

      واقع للأسف 😓

  • رسالة منشورة

    اه بس لازم بالتكنو ☺️

    • إبلاغرد صاحب الحساب

      وين ما كان وشو ما كان..
      المهم الواحد يأدّي رسالته بهالدنيا على أتمّ وجه ويتقن عمله ويحط مخافة ربنا بين عينيه 🌸

  • رسالة منشورة

    غير دكتورة جامعة ما بزبط عليكي 😝

    • إبلاغرد صاحب الحساب

      اووه 😂
      يعني رجعنا للتدريس

  • رسالة منشورة

    شيخه 😍😍
    او محاميه ما دامك قد حالك

    • إبلاغرد صاحب الحساب

      ايش يعني شيخة 😂

  • رسالة منشورة

    دكتوره اسنان 😬

    • إبلاغرد صاحب الحساب

      هاي أول مرة بسمعها 😂

  • رسالة منشورة

    قلتيلي بس تغلطي ما بتنكري 😕

    و أصلا حتى لو عامية لازم الإلتزام بالحد الأدنى من القواعد 😝

    • إبلاغرد صاحب الحساب

      التزمت بالحد الأدنى 😁

  • رسالة منشورة

    ما أشطرك بتنفيذ حالك 😑

    • إبلاغرد صاحب الحساب

      😁
      وبرضو بس أغلط ما بنكر 😄

  • رسالة منشورة

    "أنتو" إسم إشارة بتنكتب بدون ألف التفرقة 😕

    • إبلاغرد صاحب الحساب

      انتوا كل الكلمة مش فصحى
      أنتم أصلها 😅
      والعامية ما فيها قواعد

  • رسالة منشورة

    شوق يعني كويسة 🥺

    • إبلاغرد صاحب الحساب

      ثانكيو انتوا المناح والله 🌸

  • رسالة منشورة

    لأنه حتى لو كنتي شوق لا تضحكي علي و أنا أعترض أشد الإعتراض 😑

    • إبلاغرد صاحب الحساب

      شو يعني شوق
      خلص تكرم عينكم ما رح أضحك

  • رسالة منشورة

    هذا اسمه الكيل بمكيالين 😑

    • إبلاغرد صاحب الحساب

      ليش بقا

  • رسالة منشورة

    و انك ضحكتي علي صح ولا خطأ😑

    • إبلاغرد صاحب الحساب

      أكيد صح 😂

  • رسالة منشورة

    صح خطأ الواحد يضحك على الناس 😐

    • إبلاغرد صاحب الحساب

      مش دايما، حسب الموقف
      اذا استهزاء بالناس أكيد خطأ

  • رسالة منشورة

    ليش بتضحكي 😕

    • إبلاغرد صاحب الحساب

      ما لقيت رد حطيت يلي بضحك 😆

  • رسالة منشورة

    عنجد صدفة🙁 أصلا استغربت إنك مداومة

  • رسالة منشورة

    الولاء و الانتماء ↗️↗️↗️ شو السر طيب؟ مضى عشر سنين ع فوتك اياها

    • إبلاغرد صاحب الحساب

      ما بعرف يمكن لاني بحب العلم والتعليم
      بحب التواصل مع الناس..
      ف هاي الشغلتين كانوا متوفرين سواء بس كنت طالبة فيها، وحتى لما صرت أشتغل

  • رسالة منشورة

    سبحان الله اليوم كمان لمحتك بالصدفة

    • إبلاغرد صاحب الحساب

      كثرانة الصدف 🌚

  • رسالة منشورة

    شوق , ما زهقتي من التكنو ؟

    • إبلاغرد صاحب الحساب

      نوب، وما أظن رح أزهق

  • رسالة منشورة

    بصير اطلب طلب

    • إبلاغرد صاحب الحساب

      تفضلوا

  • رسالة منشورة

    له يا مهندسه ساره هاض الي طلع معك
    ازعلت

    • إبلاغرد صاحب الحساب

      وأنا شو بده يعرفني 🤔

  • رسالة منشورة

    ماشاءالله عليكي مهندسه بتجنني 😍
    الله يحميكي ويوفقك
    بس صوره تهبل 🤗

    • إبلاغرد صاحب الحساب

      أكيد انتِ سارة 😂
      أكيد حلوة مش انت صورتيها؟ 🙈🌹

  • رسالة منشورة

    ورقه البايثون تبكي بالزاويه 😂😂😂

    • إبلاغرد صاحب الحساب

      بالضبط 😂
      ان شاء الله برجعلها بس يجيها الدور

  • رسالة منشورة

    اه شو ناويه تعملي بالعطله شو في مشاريع ...

    • إبلاغرد صاحب الحساب

      ان شاء الله مشاريع ومش مجرد أفكار.. هاي العطلة رح تكون غير بإذن ربنا 😃

  • رسالة منشورة

    وفرحانه اووي 😂😂😂

  • رسالة منشورة

    بصراحه ولا انا قدرة بس يعني خففت كثير
    ويعني كاينه تشربي بدون ما تحكي خط أحمر لعاد
    😂😂😂

    • إبلاغرد صاحب الحساب

      ولا يوم قطعتها 😁

  • رسالة منشورة

    شو يا مهندسه
    انا بطلت اشربها معك من لما حكيتي وقفناها
    شكلك ما قدرتي 😂🤣🤣

    • إبلاغرد صاحب الحساب

      والله مش عارفة متى كاين قلبي قوي لهالدرجة أترك النسكافيه 😂
      بتذكر اه إني - حاولت - وأكيد ما قدرت
      الا النسكافيه خط أحمر 😂

  • رسالة منشورة

    ختامها مسك 💙
    يلا مهندسه نرجع لدفترنا وملاحظاتنا
    ونرجع للأكل والحلوه ونلاقي كتاب جديد نشوف شو فيه
    بس بدون نسكافيه

    • إبلاغرد صاحب الحساب

      اه والله أحلى حياة 🥹
      ليش بقا بدون نسكافيه؟ 😂

  • رسالة منشورة

    لا والله بس شفتك بالصدفة و مزحت معك عنجد آسف ما قصدت أضايقك

    • إبلاغرد صاحب الحساب

      مش مشكلة

  • رسالة منشورة

    شو صار و داومتي الخميس 😑

    • إبلاغرد صاحب الحساب

      أفهم في ناس بتراقبني؟
      مين انتوا؟

  • رسالة منشورة

    الحمدلله 🤍
    الله يقويكي ويثبتك

    • إبلاغرد صاحب الحساب

      أجمعين يا رب

  • رسالة منشورة

    مهندسه طمنينا عنك

    • إبلاغرد صاحب الحساب

      منيحة الحمدلله

  • رسالة منشورة

    شوق، الممثل الشرعي والوحيد لمقوله اينما انبتك الله ازهر ، الله يقويك 🌞 مش جديد عليك 🌷

    • إبلاغرد صاحب الحساب

      ياا الله زمان عن هالجملة
      الله يسعدكم هذا من لطفكم والله 🌸 🥹

  • رسالة منشورة

    انتي المختلفه مهندسه 🤍

    • إبلاغرد صاحب الحساب

      شكرا من زوقكم 🌸🙊

  • رسالة منشورة

    كيف حالك مهندسه .

    • إبلاغرد صاحب الحساب

      الحمدلله منيحة

  • رسالة منشورة

    الحمدلله 🌞الله يثبت شوق ويقويها يا رب ،ويجعل الايام الجايه كلها خير وانجازات عديده 💪

    • إبلاغرد صاحب الحساب

      الله يسعدكم
      أجمعين يا رب

  • رسالة منشورة

    شوق ، هل انتِ راضيه عن نسخه شوق -2023؟

    • إبلاغرد صاحب الحساب

      2023 كانت سنة مفصلية بالنسبة الي.
      بالنصف الأول منها كنت ضايعة وكنت مش شوق أبدًا
      والحمدلله بنصها الثاني رجعت لقيت حالي وعرفت بزيادة مين شوق
      والحمدلله يمكن الفترة هذيك كانت ضرورية مشان أرجع أكتشف حالي من جديد :)

  • رسالة منشورة

    لَا أَبْرَحُ حَتَّىٰ أَبْلُغَ.

    • إبلاغرد صاحب الحساب

      أو أمضيَ حُقُبا

  • رسالة منشورة

    عادي سحم حلوه برضو 😜صدقا بستغرب الناس الي مش عارفه غير تركيا وأوروبا وعندنا جنان قريبه سواء عدن او عُمان شي سفاح جدا ولا حتى افريقيا ك مصر والمغرب العربي كلو بس بضل موضوع المصاري هو العائق 😂🙂

    • إبلاغرد صاحب الحساب

      اه والله سحم بتجنن هي أولاً وأخيرًا 🥹
      اه للأسف 😂

  • رسالة منشورة

    مهندسه ليش بطلتي تردي علي ؟؟؟

    • إبلاغرد صاحب الحساب

      مين حضرتكم؟
      أنا ما برد على أشخاص، أنا برد على - أسئلة-

  • رسالة منشورة

    حسب ما شفت من الصور هالمنطقه جنه ! احلى من تركيا, بس هل الصور واقعيه حسب ذاكرتك ؟

    • إبلاغرد صاحب الحساب

      الواقع أجمل والله
      مرات قد ما بكون المنظر حلو بزعل انه جد الكاميرا مش قادرة تنقله زي ما هو

    • إبلاغرد صاحب الحساب

      يا ريت الواحد ضل هناك 😂

    • إبلاغرد صاحب الحساب

      بس مكتوبلي أكمل حياتي في الأردن

  • رسالة منشورة

    شوق ، عمرك رحتي ع صلاله ؟

    • إبلاغرد صاحب الحساب

      لما كبرت لا
      هني بس أول 4 سنين من حياتي قضيتهم هناك

  • رسالة منشورة

    صح ، لغيت الطلب خلص 🙂😂 ما في دراسات مثبته للاسف بس الاوڤر دوز منها بعمل مشاكل بالكبد ما كنت منتبه لهيك قصص الصراحه ، انا جربتها من قبل ك حبوب وكنت ناوي اعملها ك مشروب صباحي بس اذا هيك ما بتزبط

    • إبلاغرد صاحب الحساب

      ااه يلا ان شاء الله خير

  • رسالة منشورة

    شوق؟ بستنى الاضرار ! احكيلي شو اضرارها ؟ وهل في دراسه موثوقه؟

    • إبلاغرد صاحب الحساب

      ما بعرف أكثر من يلي موجود على جوجل، ومش اختصاصي لأقدر أحدد هل هالمعلومات صح أو غلط
      لكن أنا من مبدأ اشي مش ضروري ومش رح نموت اذا ما أخذناه، ف خلص ما في داعي نوحذه

  • رسالة منشورة

    الانون بعاني 😂 حتى انا صابني فضول اعرف شو في

    • إبلاغرد صاحب الحساب

      سألت أكثر من مرة شو في
      لكن ما في جواب

  • رسالة منشورة

    مابعرف مابعرف مابعرف !!!!!!!!!!!!!!!

    • إبلاغرد صاحب الحساب

      ايش في!

  • رسالة منشورة

    شوق.....!!!!

    • إبلاغرد صاحب الحساب

      ممكن أفهم شو في؟

  • رسالة منشورة

    استغفرك اللهم و اتوب اليك.
    اعوذ بلله من الشيطان الرجيم.
    اللهم اهدنا سبل السلام.

    • إبلاغرد صاحب الحساب

      امين يا رب
      بس شو في 😐

  • رسالة منشورة

    شوق.........

  • رسالة منشورة

    انو وين مختفيه

    • إبلاغرد صاحب الحساب

      مشغولة والله طول اليوم لحد الآن لسا بشتغل

  • رسالة منشورة

    مهندسه اليوم علامه كامله غياب

    غردي ..

    • إبلاغرد صاحب الحساب

      مش فاهمة

  • رسالة منشورة

    مجرد فضول اعرف ليش عملتيلي بلوك 😁

    • إبلاغرد صاحب الحساب

      مين حضرتكم؟ 🤔

  • رسالة منشورة

    يما ذمتنا تحليلات 😂😂
    بس اجو بنفس الوقت

    • إبلاغرد صاحب الحساب

      ذمتكم واسعة اسم الله

  • رسالة منشورة

    مجرد سوال . شو السبب الي خلاكي تعملي هيك...؟

    • إبلاغرد صاحب الحساب

      شو عملت؟

  • رسالة منشورة

    بصراحه؟

    • إبلاغرد صاحب الحساب

      بتخلطوا مي وزيت أقسم بالله 😂 أنا أي منشور بيعجبني بشاركه.. نسيت انه في ناس وأنا م ش عارفة بتعمل تحليلات لمنشوراتي 🤦🏻‍♀️

  • رسالة منشورة

    شو قصة برج الحمام مسور .حر . وعاااالي

    • إبلاغرد صاحب الحساب

      بحب هاي الجملة جدًّا.. 🥹
      بغض النظر شو قصدت فيروز فيها.. بس أنا معناها عندي غير
      ومع انه اشي بخصني بس معلش بشارككم هالمرة 😆
      هاي الجملة هيك بحس بتعكس النساء الحرائر المسلمات.. وبتعكس كل بنت عفيفة بشبهها بالحمام الأبيض يلي بكون ببرج عالي محمي ومسوّر.. ما بنال منها ولا بئذيها حدا طول ما هي عارفة حدودها وصاينة حالها بهذا البرج =)

  • رسالة منشورة

    مهندسه ولك اوووه شو هاض كلو شو صاير هون

    • إبلاغرد صاحب الحساب

      ؟؟
      ايش في؟

  • رسالة منشورة

    مو قادره انسجم مع قروبي بالمشروع

    • إبلاغرد صاحب الحساب

      يا أختي حاسة فيكِ والله...
      يمكن أول حل بيخطر على بالك انك تغيري قروبك، بس استني لحظة، أنا بحكيلك لا!
      مش دائما صح الانسحاب والهروب، مرات بكون الصح هو المواجهة..
      حاليا انتوا كطلاب في الجامعة مش بس بتوخذوا علم لا.. انتوا كمان بتبنوا شخصياتكم.. وفرضًا بكرا ببيئة العمل ما عجبك قروبك، بدك تتركي الشغل وقتها؟
      الشغل والحياة كاملة فعليا علاقات.. وهالاشي حقيقة رغما عنا.. حتى لو احنا مش مرتاحينله..
      ف يلي بدي احكيلك اياه حاليا.. مش غلط تصيري تحاولي تفهمي شخصيات وأطباع قروبك وتتعاملي معهم بناء عليها.. وطبعا هالاشي محتاج منك تقرأي وتبحثي وتتطلعي.. مفروض الانسان بكل مراحل حياته يضل يتثقف ويزيد وعيه..
      وصدقيني العلاقات الانسانية ع قد ما هي مهمة، ع قد ما احيانا بتكون صعبة.. المهم حاولي، لكن متى ممكن ننسحب؟ اذا حسيتي انه خلص استنفدتي طاقتك وانه قروبك ممكم يكون بسببلك أذى أو ضغط نفسي انت في غنى عنه..
      لكن الانسحاب من اولها غلط

    • إبلاغرد صاحب الحساب

      وهيك انت أصلا بتكوني عملتي بروفا وأخذتي تجربة جاهزة - من الكم الكبير من التجارب- يلي رح تمري فيها ببيئة العمل 😁

    • إبلاغرد صاحب الحساب

      أنا مثلا أختي في البيت بيني وبينها 11 سنة، على الرغم إنا منسجمين لكن أكيد لانها جيل مختلف بنختلف ببعض الأمور.. ف بحاول أشوف مواضيع عن هذا العمر وكيف بفكروا وشو وجهة نظرهم مشان على طول أضل قريبة منها وأفهمها..
      ف الموضوع بده طولة بال وصبر، وصدقيني مش بخسارة لانه هذا بينعكس على حياتك وتعاملاتك مع الناس وبخليكِ تصيري مرنة أكثر مع الناس. ومع المشكلات يلي بتواجهيها..

  • رسالة منشورة

    كانت حالتك قبل هج الحمام بقيت لحالي ولا انا بتهيالي ؟

    • إبلاغرد صاحب الحساب

      صحيح
      بحب هالمقطع، بس شلته لا يكون فأل سيء لاني ما بحب الوحدة ربنا يبعدها عنا 😂

  • رسالة منشورة

    للتصحيح بس يظل وليس يضل 😅

    • إبلاغرد صاحب الحساب

      كاتبة باللهجة المحكية 😐

  • رسالة منشورة

    بُرج الحمام مسوّر وعالي

    • إبلاغرد صاحب الحساب

      ع طول رح يضلّ بُرج الحَمام مسوّر، حُرّ.. وعاااالي... ! ❤ 🥹

  • رسالة منشورة

    ممكن استشارة؟

    • إبلاغرد صاحب الحساب

      بعتذر كان عندي درس
      أكيد، تفضلوا

  • رسالة منشورة

    شو دخلني انتي حكيتي مش مهم 🙁

  • رسالة منشورة

    صح الحق معك شو الفائدة من سؤال ما إله داعي 😅

  • رسالة منشورة

    يوم الأحد دوامك بخلص على ٢:٣٠ صح؟

    • إبلاغرد صاحب الحساب

      شو بهمّ؟ 😅

  • رسالة منشورة

    آسف إذا ازعجتك بالاسئلة....

    • إبلاغرد صاحب الحساب

      ما في إزعاج

  • رسالة منشورة

    كيف يومك؟

    • إبلاغرد صاحب الحساب

      منيح الحمدلله

  • رسالة منشورة

    كيفك شوق؟

    • إبلاغرد صاحب الحساب

      منيحة الحمدلله

  • رسالة منشورة

    اعلم

    • إبلاغرد صاحب الحساب

      وبأنَّ دربَ الظّاعنينَ يليه طيبُ المُستقَرّ=)

  • رسالة منشورة

    ربنا يهدي بالك و قلبك ما تخلي اشي يزعلك شوق ☺️

    • إبلاغرد صاحب الحساب

      شكرا اللهم أجمعين
      ان شاء الله، لن يضيّعنا الله =)

  • رسالة منشورة

    كأنه في ريحة غرور شعري 😑

    • إبلاغرد صاحب الحساب

      لا أستغفر الله 😶

  • رسالة منشورة

    عشان ما تعرفي او تتوقعي مين من المكان

    • إبلاغرد صاحب الحساب

      ما أظن كنت عرفت حتى لو بوقتها 😅

  • رسالة منشورة

    من وين بتلاقي الاقتباسات يلي بتنشريها

    • إبلاغرد صاحب الحساب

      بحس كل شخص ربنا بحط فيه ميول أو موهبة معينة، أنا بحس حالي بحب الكلمات وبتعلق براسي على طول.. سواء عربي أو انجليزي.. بحب الشعر بعشقه والقصيدة مرات اذا قرأتها مرتين بحفظها ع طول..
      والاقتباسات بتضل ف بالي، بغالب الوقت وأنا ماشية بتضل تيجي ف بالي بكل موقف بمر فيه أو كل مكان..
      وبحب أكتب وبقدّس الكلمات وبحس لكل كلمة أثر بنفوس الناس..
      بس وشكرا 😁

  • رسالة منشورة

    عارف انها متأخره بس في أسباب

  • رسالة منشورة

    أنا عشان الأمانة الشعرية الحق علي 😒

    • إبلاغرد صاحب الحساب

      عادي هذا مسموح بالشعر 😁

  • رسالة منشورة

    هي "كالضباب" وليس "كالسراب"

    • إبلاغرد صاحب الحساب

      عمق البوست بعيط بالزاوية 🌚

  • رسالة منشورة

    ترا انا يلي لازم يخاف انا يلي حلمت فيه 😐

  • رسالة منشورة

    الحلم كان انا بكون ماشي بالممر و بلقى باب مفتوح و طالع منه شوية ضو و بتكوني انتي بالغرفة يلي طالع منها الضو و بتحكي مع ناس و بتناقشي فيهم بس ما كنت بعرف الناس يلي بتحكي معهم...شو التفسير إذا مش أضغاث أحلام 😅 ...يا يوسفية 😝

    • إبلاغرد صاحب الحساب

      يما خفت 😂
      اللهم اجعله خير 🥹
      صراحة ما بعرف شو ممكن يكون تفسيره

  • رسالة منشورة

    شوق ، كونو عندك نظره موضوعية ومنطقية بالامور ، اولى شي بين ثلاث خيارات لشخص جمع مبلغ معين انو
    1-يسافر بقصد الدراسه وتحسين الدخل.
    2-يتزوج.
    3- يبلش بمصلحه خاصه.
    مع العلم انو دخله غير مستقر !

    • إبلاغرد صاحب الحساب

      الاختيار بين هذول الأمور بترجع للشخص نفسه وأولوياته، ما بنقدر نحكي انه طريق واحد هو الصح، أو هو الأسلم.
      في أشخاص حاطين الزواج أولوية،ف بمجرد ما جمعوا مبلغ بيتزوجوا حتى لو دخلهم غير مستقر.
      بينما في شباب وجهة نظرهم لا يأمنوا حالهم بوظيفة وبدخل نوعًا ما ثابت، بعدها بفكروا يتزوّجوا..
      وفي شباب برضو رقم واحد عندهم طموحاتهم سواء يكملوا تعليم أو يترقوا بوظائفهم أو غير، وحاطين فكرة الزواج شوي على جنب.

    • إبلاغرد صاحب الحساب

      ف مفروض الشخص يشوف هو فعلا شو بده، وطبعًا احنا ما بننتقص من أهمية الزواج بالعكس الزواج حفظ للنسل واحنا كأمة مسلمة بهمنا يضل نسلنا موجوذ + هو استقرار فعليا.
      لكن بنفس الوقت يلي بده يتزوج لازم يحط بباله وقته ما حيكون زي أول، ولا تفرغه لشغله، ولا دخله كمان !
      وصراحة ما نقلل من شأن الموضوع لانه فعلا الحياة صعبة، وأكون صريحة أنا كبنت - مع انه أنا مش مجبورة بالإنفاق بشكل أساسي - لكن بهكل هم هالاشي ومع اني حاليا بشتغل ووضعي نوعا ما منيح الحمدلله، بس بضل أحط ببالي أدور ع شغل مستقر أكثر ويكون عندي خطة B في حال ما توفقت بشغل محدد قبل .. لانه جد الحياة صعبة واذا حاليا بصرف بس ع حالي وجزء يسير لأهلي، بكرا حيصير في بيت وأولاد وفي حال كان الوضع مش بزيادة أكيذ ما رح أقعد أتفرج وأسكت ...
      - مش تشاؤم لكن واقعية، وأكيد ربنا يلي برزق لكن احنا النا نوخذ بالأسباب -

    • إبلاغرد صاحب الحساب

      ف زي ما حكيت حسب أولويات الشخص، بس بده يحط بباله انه في أشياء حيكسبها بكل مسار من هذول ال3 وبالمقابل في أشياأ حيخسرها ..
      وفي حالات الشخص بيجمع فيها بين أمرين، مثلا يتزوج ويكمل تعليمه اذا طلعتله منحة منيحة
      أو حتى يفتح مشروع ويحسن دخله خصوصا اذا ربنا أكرمه بزوجة تدعمه..
      لكن أكيد حيواجه بعض الصعوبات ويقدم تنازلات ليوصل هذا اشي أكيد
      بالنهاية no pain no gain

    • إبلاغرد صاحب الحساب

      بالنهاية اذا الشخص حاطط ف باله فكرة الزواج وبده يشوف هل يتزوج ضمن دخله غير المستقر، أو ينتظر ليحسن دخله أكثر، أنا من رأيي يتزوج - طبعا في حال دخله مقبول نوعا ما - لانه فعليا الحياة بتمر وغلط الانسان يفني حياته بس في سبيل انه يجمع فلوس، حيصحئ ع حاله والعمر رايح وفي كثير شغلات ضيعها ع حاله.. وبقدر وقتها حسب استطاعته يفكر كيف يزيد دخله.
      - بعرف ناس تخيروا بين وظيفتين الثانية راتبها أعلئ بكثير بس دوامها طويل جدا، اختاروا يلي راتبها أقل قي سبيل يقضوا وقت مع أسرهم - لانه فعليا العمر رايح..
      وصراحة ساعة وحدة مع الأهل بتنشرئ بكل ذهب الدنيا.. -

      أما في حال مش حاطينه في يالهم، على بركة الله مبروك افتتاح المشروع 😁

  • رسالة منشورة

    الله يثبتك ع الطريق الخير

    • إبلاغرد صاحب الحساب

      آمين
      اللهم أجمعين

  • رسالة منشورة

    اوك سبيستون لعاد ذمتنا


    كيف كان يومك

    • إبلاغرد صاحب الحساب

      الحمدلله مرهق جدًًا بس حلو
      ربنا يديم صحته وعافيته علينا ونضل نعطي ونبذل =')

  • رسالة منشورة

    شو مهندسه الموضوع فيه
    يا صاحب الظل الطويل 😂😂

    • إبلاغرد صاحب الحساب

      😂😂😂
      يما مأوسع ذمتكم

  • رسالة منشورة

    صح الحق معك فيها وجهة نظر لازم احكيلك الحلم 🤔

    • إبلاغرد صاحب الحساب

      اه يلا 😁

  • رسالة منشورة

    فاهمة الموضوع غلط الناس يلي لازم تخاف منك كونك نازلة غزو على أحلامهم بدون إحم ولا دستور 😒

    • إبلاغرد صاحب الحساب

      يا ريت بحكوا الحلم نشوف اذا اله تفسير أو لا 😐

  • رسالة منشورة

    حلمت فيكي اليوم لازم بصمتك بالأحلام عندي😅

    • إبلاغرد صاحب الحساب

      شو في الناس نازلة تحلم فيي 😰
      الله يحميني 😂😱

  • رسالة منشورة

    هسا انا معك انو الواحد كره هاي الدول ، لكن مو شرط الواحد يستقر فيها ويعمل انتاجيته فيها ويكون موالي الها زي وطنه، بالنهاية للاسف الشديد انو الكره بملعبهم والعلم عندهم وبلغتهم، وبيئه الابحاث والبزنس خصبه جدا عندهم عكس بلادنا، ف من الظلم الواحد يحرم حاله انجاز كبير اله ولأمته بالمستقبل عشان هالسبب وهيهم مثلا معظم الاساسيات باغلب العلوم اخذوها منا بالرغم من المعاداه وصارت سبب التفوق علينا !

    • إبلاغرد صاحب الحساب

      اه والله للأسف هذا واقع مرير ما حدا بقدر ينكره..
      وأكيد كرهي الها ما حيكون سبب أرفض في حال أصلا توفرت الفرصة والظروف كانت مناسبة..
      بكل الأحوال ربنا يكتبلنا طريق الخير شو ما كان

  • رسالة منشورة

    ولك اوووه
    رح تصير يا وزيره يا رئيسة جامعه يعني في معاليكي بالموضوع
    ما في مهندسه ايام ورح تعدي

    • إبلاغرد صاحب الحساب

      ما شاء الله مرة وحدة 😂
      ربنا يعلي مقامنا دنيا وآخرة 🌹

  • رسالة منشورة

    الله ييسر امورك شوق ، مع انو بحس مكانك المناسب عالم الابحاث والتدريس ولايق عليك جدا موضوع الدكتوراه 🌹🌞

    • إبلاغرد صاحب الحساب

      الله يسعدكم
      وأنا والله أصلا جدا بحب التدريس
      الله يكتبلنا مع انه - ما كلُّ ما يتمنى المرءُ يدركهُ - 😂
      الدكتوراه مشكلتها ما في اشي معتمد نوعا ما إلا بدول الغرب، وصراحة بعد أحداث غ. زة كرهت هاي الدول بزيادة 😪

  • رسالة منشورة

    حلو يعني ع هيك ما عندك خيار الا تطلعي برا الاردن ! ببالك الخطه ولا مؤجله حتى اشعار اخر؟

    • إبلاغرد صاحب الحساب

      مؤجلة لوقت ربنا يريد

  • رسالة منشورة

    م.شوق ، لو صحلك منحه ماستر خارجية رح تروحي ؟

    • إبلاغرد صاحب الحساب

      الماستر ما رح أقدم على هيك خطوة إلا إذا نويت أكمل دكتوراه وراه - وهذا السبب يلي ما خلاني أدرس ماستر هون في التكنو -

  • رسالة منشورة

    و مبسوطة؟

    • إبلاغرد صاحب الحساب

      اه الحمدلله مبسوطة وراضية
      ألف شكر لربنا 🥹

  • رسالة منشورة

    كيفك شوق؟

    • إبلاغرد صاحب الحساب

      الحمدلله منيحة

  • رسالة منشورة

    هندسه سوال ع الطاير
    ليش كاينه معطله البرنامج...

    • إبلاغرد صاحب الحساب

      مش أنا، الموقع أعتقد كان معطل

  • رسالة منشورة

    شخصيتك عاملة غزو على العقل الباطن للناس شكله لأنه أنا كمان حلمت فيكي أكثر من مرّة 😂

    • إبلاغرد صاحب الحساب

      😂😂😂😂 يما
      طيب ليش ما بتحكوا

  • رسالة منشورة

    بعدين بحكيلك
    بس كنتي فرحانه

    • إبلاغرد صاحب الحساب

      يا رب خير 🥹

  • رسالة منشورة

    لا خير ان شاءالله
    حلم حلو
    اطمني مهندسه

    • إبلاغرد صاحب الحساب

      طيب ما بصير أعرف شو؟ 😂

  • رسالة منشورة

    صباح الخير مهندسه

    حلمت فيكي 😍


    • إبلاغرد صاحب الحساب

      صباح النور 🌞
      يا ساتر اللهم اجعله خير 😂
      شو الحلم؟

  • رسالة منشورة

    حسب منا شايف انتي قاطعه نص الطريق يعني ضل تفوتي ع كورسات ال data analysis والي تحت استغلي خصومات الجمعه السوداء ع يودمي معظم الكورسات القويه ب 10 دولار ، انا لو بايدي عندي فضول اتعلم كل شي بخص الit ابتداء من بناء السيرفرات والبنيه التحتيه ك it لتصميم المواقع والتطبيقات ، للاوتوميشن سكريبتنج لل AI 🌞 حتى لو ما بدي اشتغل بالموضوع( مع اني متحمس وجدا )بحس انو من المهم ما تكون زي الاطرش بالزفه بوسط التطور الرهيب بعالم التكنولوجيا

    • إبلاغرد صاحب الحساب

      اه الحمدلله
      اه والله يا رييت الواحد عنده وقت 😢ما في أحلى من العلم..
      اه فعلا هاي النقطة من يومين كنت أحكي فيها والله.. انه ضروري نكون مواكبين قدر الإمكان ولو بمعرفة بسيطة لأي تطور في التكنولوجيا

  • رسالة منشورة

    ما بزبط نشوفها هون؟

    • إبلاغرد صاحب الحساب

      Python
      Variables
      Math operations
      Logic operations
      Conditions if
      Loop for & while
      Functions

      ...
      Math
      Linear algebra
      Calculus
      Probability and statistics
      ...
      Data analysis
      Pandas
      Numpy
      Visualize library-> matplotlib and seaborn

      ...
      ML
      sk learn
      Regression
      Classification
      Unsupervised

      ...
      DL
      ANN
      RNN
      CNN

      Jose portilla

    • إبلاغرد صاحب الحساب

      طبعًا أنا حاليًا بمرحلة اللهم إن كان هذا سحرًا فأبطله، بس ان شالله حاسة حأوصل يومًا ما 🌚

  • رسالة منشورة

    عندك Roadmap للمجال ؟

    • إبلاغرد صاحب الحساب

      يلي سألتهم عملولي roadmap يس 😁

  • رسالة منشورة

    شي غيره زي شو ؟

    • إبلاغرد صاحب الحساب

      بدي أدخل مجال ال ai وال neural networks وهاي الأشياء.. بعرف انها بحر بس ان شالله ستيب باي ستيب بتكون الطريق وضحت وتعلمت فيها كثير أمور..
      هلا فعليا أنا ليش بلشت بال python لانها فعليا لغة البرمجة يلي شائعة حاليا أكثر اشي لأي اشي بدنا نشتغل عليه.
      واستشرت ناس من شركة شاي بحيث أعرف شو التسلسل يلي أمشي عليه لأوصل يلي بدي اياه. ف اكتشفت انه يلي تعلمته من بايثون لحد الآن بيكفي انه أطلع ستيب أعلى.. وانه أغلب الشغل بكون الكود جاهز تماما بس مهم الشخص يكون فاهمه فقط

  • رسالة منشورة

    شوق ، شو اخبار البايثون ؟

    • إبلاغرد صاحب الحساب

      مش ملحقة ع شغل الجامعة والله.. ان شاء الله ناوية إني أكمل الكورس وقت تسنح الفرصة، مع انه الأشياء يلي تعلمتها فيه لحد الآن بتأهلني أبدأ بإشي غيره، بس حابة أكمل الكورس حتى لو اشتغلت عليه و ع غيره in parallel

  • رسالة منشورة

    في سورة الكهف و قصة نبي الله موسى مع الرجل اللذي آتاه الله العلم كان هنالك موقف قتل الرجل العالم غلاماً و كان تبريره في آخر القصة أن أبواه كانا مؤمنين و خشي أن يرهقهما طغيانا و كفرا دليل أن الأبوين صاليحن و الذرية لم تكن كذلك. بالرغم من ذلك كان تتمة حديث الرجل العالم أنه أراد من الله أن يبدل الأبوين المؤمنين بالغلام الغير صالح آخر صالح و أقرب رحما. الشاهد من القصة بالرغم أنهما نفس الأبوين و قد شُهِدَ لهما بالإيمان في كتاب الله إلا ان أحد ذريتهما كان غير صالح و أبدله الله بآخر صالح فصلاح الذرية مقدر من عند الله مهما كانت رغبتنا لكن ذلك و بكل تأكيد لا ينفي الاجتهاد في اختيار الشريك و ما علينا الا الدعاء ربنا هب لنا من أزواجنا و ذرياتنا قرة أعين و الرضا بقضاء الله.

    • إبلاغرد صاحب الحساب

      مزبوط، بس الأهم احنا نجتهد في ذلك ف بيسقط عنا الاثم والمسؤولية..
      تماما نفس الرزق، احنا بنعمل ونجتهد ونطلب من ربنا، وبالآخر يلي مكتوبلنا رح نوخذه..
      لا فضّ فوكم 👏😁

  • رسالة منشورة

    م.شوق صاحبه العقليه الفذه 🌞 عين العقل والله انا بأيدك جدا حياه كامله واقوى منعطف فيها رح ينبنى على هالقرار بستغرب كيف الناس بتتعامل معه زيه زي كانك مشتري سياره ولا مكمل دراسه ولا ك تجربه ' بلكي زبطت' .وبحس الموضوع ما اله علاقه مباشره بجوده الاخلاق او الوازع الديني بشكل منفرد مع اهميه العوامل هاي الا انها ليست كافيه باتخاذ هيك قرار! ، الله ييسرلك الاختيار الخير والحياه السعيده يارب، المهم متى رح نشوفك دكتوره؟

    • إبلاغرد صاحب الحساب

      شايفين.. لسا لو بدهم يشتروا سيارة بفكروا أكثر.. أكيد الدين والأخلاق وحدها ما بتكفي.. في كثيير أمور مفروض تتاخذ بعين الاعتبار.. بعد الاستعانة بربنا..
      هههه ان شاء الله اذا ربنا كتبلي بصير دكتورة ليش لا 😆

  • رسالة منشورة

    وَإِذا كانَتِ النُفوسُ كِباراً
    تَعِبَت في مُرادِها الأَجسامُ

    • إبلاغرد صاحب الحساب

      من أرادَ المعالي، هانَ عليهِ كلّ هم
      لأنّهُ لولا المشقّةْ، لسادَ النّاسُ كلّهم

  • رسالة منشورة

    بتخافي من الارتباط؟

    • إبلاغرد صاحب الحساب

      أنا بالعادة ما بجاوب هذا النوع من الأسئلة لكن هالمرة رح أجاوب لانه بحس ممكن يكون في فائدة اذا انقرأ الجواب

    • إبلاغرد صاحب الحساب

      مش قصة خوف بقدر ما إني معطية الموضوع أهميته وقدسيته..
      طول عمرنا بنوخذ انه الأسرة هي اللبنة الأساسية لتكوين المجتمع.. والأسرة دائما بتبدأ برجل وامرأة قرروا انهم يرتبطوا وينشئوها..

    • إبلاغرد صاحب الحساب

      الزواج مش لانه صار عمري مناسب ولا لانه العمر بيمشي ولا لانه أجا شخص عنده منصب أو فلوس أو غيره...
      لا، الزواج وقت تلاقي شخص بوافقك النهج والرؤية والطموحات.. شخص تبدأ معه وتكون أسرة صالحة وأبناء ييجوا من بعدكم يمشوا على مبادئكم وأخلاقكم وطموحاتكم.. تنشئوا أبناء يربوا بنفسية صحية وعقلية سليمة وببيئة علمية خصبة بحيث يكون الهم أثرهم ويكملوا من بعدكم بعد ما ترحلوا..
      تنشئوا نسخ أفضل منكم تأثر بالمجتمع وتبنيه مش تفسده!

    • إبلاغرد صاحب الحساب

      صدقًا الموضوع أبدا مش سهل وبده تأني لانه صدقوني شو ما اشتغلتوا على حالكم وشو ما كنتوا ناس رائعين وعندكم أهداف ومبادئ، يا إما بيجي الشخص الصح يشجعكم وتكملوا هالنهج سوا، أو بيجي شخص بهدم كل التطلعات والطموحات يلي بنيتوها.. وحيأثر عليكم شو ما حاولتوا هالاشي ما يصير..
      وممكن يكون سبب بنشوء أسرة جديدة فاسدة، كلها نزاعات وعقد نفسية وبيئة مش سليمة..
      ف الاختيار الصح مهم والله..
      وأبدا ما اله وقت ولا عمر محدد!
      المهم تتحرّوا صح وتعملوا يلي عليكم وتستعينوا بربنا.. وصدقوني ربنا جل وعلا مستحيل حد يلجأله ويردّه خائب..
      وشو أحسن من انّه الواحد ينوي حتى هذا الاشي يكون بمرضاة ربنا ووفق النهج يلي برتضيه؟ 💚

    • إبلاغرد صاحب الحساب

      وبس والله خلصت فقرة الأسئلة خليني أرجع لشغلي 🌚

  • رسالة منشورة

    مهندسه شو الصح بكره ولا بكرا

    • إبلاغرد صاحب الحساب

      لا هاي ولا هاي 😂
      الصح : بُكرة

  • رسالة منشورة

    مهندسه بكره اي ساعه دوامك

    • إبلاغرد صاحب الحساب

      بكرا ما عندي دوام

  • رسالة منشورة

    لا تنسيني من الدعاء

    • إبلاغرد صاحب الحساب

      ان شاء الله
      مع هالمطر ربنا يعطي كل شخص سؤله.. ربنا كريم والله وهو جل وعلا حكالنا ادعوني أستجب لكم

  • رسالة منشورة

    اللهم امين

    اذا انتي بدك تعطلي مين يداوم لا تعطلي

    • إبلاغرد صاحب الحساب

      😭
      واجب ولازم الشخص يأديه

  • رسالة منشورة

    احلى واحسن ميس هندسه

  • رسالة منشورة

    مهندسه انتي كتير منيحه

    • إبلاغرد صاحب الحساب

      شكرا انتوا المناح والله 🌹

  • رسالة منشورة

    شوق ، برايك الافضل لو كنت بموضع انو عندك وقت بوظيفه معينه وما فيها هاللود العالي لكن ما فيها تطور فبتستغل الفراغ بانك تطور حالك بمجال ثاني ، الافضل تضل مستمر بالتعلم لحتى توصل الاحتراف بعدين تبدا شغل بمجال ثاني ولا اول ما تقدر تبلش اي خبره بالمجال الثاني مهما كانت متواضعه بالبدايه عشان تكسب وقت وما يضيع عمرك ك خبره لكن رح تخسر الفضاوه الي كنت فيها؟

    • إبلاغرد صاحب الحساب

      أنا برأيي اذا الشخص مأمن حاله بوظيفة، ما يتركها إلا وهو متأكد من قراره، الشغف والطموح حلو لكن للأسف احنا محكومين بقلة فرص العمل والسعي الصعب لكسب العيش... وفرص العمل صارت جدا قليلة..

      مشان هيك الأفضل انه الواحد ما يتخذ خطوة إلا وهو متأكد منها، وما تكون مجازفة أو تسرّع..
      فالأفضل يضل بوظيفته ويطوّر من نفسه - مش شرط طبعا لدرجة الاحتراف - ويبدأ بعدها الشّغل الثاني هذا في حال زبط يشتغل شغلين سوا، أما في حال شاف انه الشغل الثاني أنسبله والأول بعيقه عنه، بترك وقتها الشغل الأول.

  • رسالة منشورة

    غُرفٌ مُظلِمٌ نواحيها و جدرانٌ حزينٌ سكان من فيها
    و افواه تصطنع ابتسامتها و قصصٌ غاب اللذي يرويها

    • إبلاغرد صاحب الحساب

      يا الله 😞
      القلب مكلوم والله 💔
      ربنا يربط على قلبهم

  • رسالة منشورة

    بتروح هيبت عطله اخر يوم في الاسبوع اذا هيك😅

  • رسالة منشورة

    و بكره دوام؟!🤔

    • إبلاغرد صاحب الحساب

      لا استراحة بكرا

  • رسالة منشورة

    شو سبب الدوام و وما في مختبرات يا شاطره ولا اجتهاد 🤔🤔

    • إبلاغرد صاحب الحساب

      اجتهاد

  • رسالة منشورة

    ما كنت بعرف اذا داومتي بس توقعت😝

    • إبلاغرد صاحب الحساب

      اووه 😆

  • رسالة منشورة

    كيف كان دوامك اليوم؟!🤔

    • إبلاغرد صاحب الحساب

      اش عرفكم إني كنت مداومة 🤔
      منيح كان الحمدلله 😁

  • رسالة منشورة

    اصلا الدكاتره ما بتعرفي ليه شايفين حالهم 😒

    منيح يلي مو مبين مين انا كان صفرنا 🤣

    • إبلاغرد صاحب الحساب

      لا حرام بدون تعميم،
      إن خليت خربت 😁

  • رسالة منشورة

    احسن من الدكاتره كمان
    متى ببدا دوام المختبر دكتوره 😄

    • إبلاغرد صاحب الحساب

      شكرا 😂
      الأسبوع القادم بإذن الله 💫

  • رسالة منشورة

    دكتوره ايش ماخده لابات هاد الفصل؟!

    • إبلاغرد صاحب الحساب

      الله يسمع منكم وأصير دكتورة 😂
      ان شاء الله سنسور وانسترو والكترونيات

  • رسالة منشورة

    مبارك مبارك بس ع شو

    • إبلاغرد صاحب الحساب

      الله يبارك فيكم 🌹

  • رسالة منشورة

    شوق ، عمرك حسيتي ب شعور انو بالرغم الواحد ما يمتلك من كفاءات وامتيازات الا انه مربط ما بقدر لا يغذي كفاءته ولا يعطي انجاز عليه العين !بالرغم من السعي القوي! وتحس انو حياتك اصعب من الي حواليك ! اوك مش القصد مقارنه ظروف ! لكن كل شي الواحد بعمله بمعاناه !بشكل بكبرك عن كل سنه خمس سنين!

    • إبلاغرد صاحب الحساب

      أكيد، للأسف الحياة مش عادلة ومش دائمًا بتعطي الفرص للناس يلي بتستحقها.. والتفاوت بهالشيء من باب اختبار للانسان. (وجعلنا بعضكم لبعض فتنة أتصبرون)

    • إبلاغرد صاحب الحساب

      لكن في نقطة جدا مهمة، وبرضو مش من باب مقارنات، لكن الحقيقة المطلقة انه الصورة يلي يتظهرلنا من الناس ليست كاملة.. ممكن بنظرنا ناس أمورهم سهلة وميسرة بمجال ما، ممكن هالاشي صحيح وممكن لا، لكن هم أكيد بعانوا بشيء آخر

    • إبلاغرد صاحب الحساب

      وبغض النظر عن كل شيء احنا مطلوب منا السعي.. ممكن الإنسان يشعر بتعسير بأموره، بس في أمور من الكتاب والسنة بتفرق كثييير بتيسير الأمور طبعا بعد السعي.
      زي مثلا الاستغفار، ولا حول ولا قوة الا بالله سحر
      واليقين بربنا كمان

    • إبلاغرد صاحب الحساب

      اليقين بربنا بمجرد الانسان سعى وجد كان واثق بربنا، أموره رح تتيسر (من لو أقسم على الله لأبره)
      وبرضو الانسان يراقب نفسه بلكي هو عامل طاقة سلبية وبشوف الأمور بنظرة سوداوية!

  • رسالة منشورة

    لن تذهب لغيرك
    اكملي 🧡

    • إبلاغرد صاحب الحساب

      كلشي من ربنا خير وبركة 😄

  • رسالة منشورة

    يسعد صباحك شوق💚

    • إبلاغرد صاحب الحساب

      صباح النور ☀

  • رسالة منشورة

    الف الف مبارك ان شاءالله هندسه
    الله يوفقك

    • إبلاغرد صاحب الحساب

      الله يبارك فيكم

  • رسالة منشورة

    عندك بحساب بيونير ؟ موضوع فتح الحساب بغلب ؟

    • إبلاغرد صاحب الحساب

      عندي،
      لا عادي ما بغلب أبدًا،
      بس لازم يكون في حساب بنكي أو بطاقة ينربط فيه

  • رسالة منشورة

    شوق ، سؤال appean بدهم حساب ببيونيرز ولا في اسلوب اخر للدفع؟

    • إبلاغرد صاحب الحساب

      ما دققت صراحة، أعتقد حسب ال project ..
      أنا حاطة بايونير .. وشفت أغلب الprojects بيطلبوا بايونير

  • رسالة منشورة

    شوق ، كيف وضع البايثون معك ! بصير معك انو الواحد بنتكس بنص الطريق هيك وبتنح والانجاز بصير شبه صفر لاسباب مجهوله ! اذا اه شو كنتي تعملي بهيك قصص ؟ بحب اسمع افكارك ، يسلمو جدا ع الكلام الاخير هون 🌞

    • إبلاغرد صاحب الحساب

      أكيد بصير والطبيعي أصلا انه يصير هيك، كثير الواحد بتصير تجيه أفكار انه طيب بلكي أنا بدرس هالاشي عالفاضي، بلكي ما اشتغلت بعدها، بلكي ضيعت وقتي بمجال غلط.. ومرات كمان همته بتضعف وطاقته بتخلص

    • إبلاغرد صاحب الحساب

      أنا اذا حسيت طاقتي خلصت بعطي لحالي فترة راحة بعدها برجع قوية..
      واذا حسيت هالفترة طالت، برجع بحط أهدافي قدامي..
      مثلا أنا بتعلم بايثون لأحسن شغلي ودخلي يزيد، ومشان أواكب متطلبات سوق العمل.
      وبصير أتخيل حالي وأنا شغلي منيح وراتبي عالي وموفرة الحياة الكريمة يلي بطمحلها

    • إبلاغرد صاحب الحساب

      وصراحة أنا بفوت بتفرج عالانفلونسرز عالانستقرام كيف حياتهم، في ناس هالاشي بحبطهم وفي ناس بحفزهم، انا صراحة من النوع يلي بتحفز، هالاشي بعطيني طاقة بصير احكي بحالي انا شو ناقصني ما احسن وضعي مثلا
      ولما تجيني الافكار السلبية مرات انه بلكي ما اشتغلت، بذكر حالي انه الاحتمال السلبي اله نسبته والايجابية اله نسبته، حتى من المؤشرات وطلب سوق العمل بنستنتج انه الاحتمال الايجابي نسبته اعلى بكثير

    • إبلاغرد صاحب الحساب

      الواحد بمجرد حط هدف أمامه وضل يتذكره هالاشي بحمسه
      مثلا حد هدفه يشتغل ويشتري سيارة، بقدر يطبع السيارة يلي حابب يشتريها ويحط صورتها عالحيط عند مكتبه.
      برضو التنظيم جدا مهم
      يعني الشخص بس يحصي الوقت يلي بمر بكتشف كم وقته رايح هيك.
      فبمجرد نظمه بقل هدره للوقت وبزيد انجازه

    • إبلاغرد صاحب الحساب

      الله يسلمكم ولو

  • رسالة منشورة

    شوق , لما الواحد يدخل بحاله من التوهان وفوضى بالافكار , مش عارف يقرر مصيره بحيث يطلع باقل الخسائر بعد القرار ! ايام من الصراع مع النفس ! شو الحل !

    • إبلاغرد صاحب الحساب

      في أخذ بالأسباب واستخارة، يفكر منيح ويسأل ويستشير، يبحث عالنت ويعمل يلي عليه وبعدها يستخير.
      الانسان بمجرد استخار ويوكل أمره لربنا خلص بيعرف انه أي اشي حيصير خير

    • إبلاغرد صاحب الحساب

      وهيك بحمي نفسه لقدام انه ما يحط اللوم على حاله في حال كانت النتائج عكس ما بده.
      لانه وقت استخار خرج من حوله وقوته وبنظرته القاصرة البشرية، لحول وقوة ربنا جل وعلا

    • إبلاغرد صاحب الحساب

      وصدقوني الانسان بمجرد آمن انه كلشي صار معه أو حيصيرله مكتوبله بالقضاء والقدر من وقت انخلق، ما حيخاف من مستقبل، ولا حيأسى على ماضي... عليه فقط يسعى، ويحمل هم السعي لا النتيجة

    • إبلاغرد صاحب الحساب

      https://www.instagram.com/reel/Cvb7J-Pohl2/?igshid=MzRlODBiNWFlZA==

  • رسالة منشورة

    بعرف انو علاقتك منيحه مع ربنا
    ف بدي اغلبك

    • إبلاغرد صاحب الحساب

      استغفرالله، اللهمّ اجعلني خيرًا مما يظنون

    • إبلاغرد صاحب الحساب

      عالهامش، ربنا بستجيب الدعاء من الجميع بغض النظر عن درجة القرب، بكفي انه ندعي واحنا واثقين بربنا 🌸

  • رسالة منشورة

    شوق دعيلي بحاجة الدعاء انا وكالعاده كثريهم واليوم الجمعه

    • إبلاغرد صاحب الحساب

      ان شاء الله ولا يهمكم، ربنا يعطيكم كل ما بتتمنوا

  • رسالة منشورة

    شوق ،شوفي coursera google automation by python جدا مرتب انا اخذت اول كورس واسلوب الفيديوهات ممتع فيما ولو حاسه بضياع مع يودمي

    • إبلاغرد صاحب الحساب

      الكورس لحد الآن جدا واضح وحلو ومبسط، وصرت مبلشة فيه ف لازم أكمبه
      https://www.udemy.com/course/100-days-of-code/

  • رسالة منشورة

    شو المصدر ؟

  • رسالة منشورة

    شوق ،شو اخبارك ال machine learning? درستي فيه شي؟

    • إبلاغرد صاحب الحساب

      حاليا بوخذ كورس python وبعدها بشوف شو ممكن أوخذ
      بدي أستغل العطلة قبل ما تخلص صراحة 🥲

  • رسالة منشورة

    ما بنسى مساعدتك الي بيوم كنت ضايعة ونصيحتك فادتني جدا
    شكرا من قلبي

    • إبلاغرد صاحب الحساب

      🥹🌹

    • إبلاغرد صاحب الحساب

      الشكر لربنا أولا وأخيرا، ربنا بيسرنا لمساعدة بعض
      مبسوطة انك بخير الحمدلله 💕

  • رسالة منشورة

    وين بتختفي انتي والصفحة فجأه
    كثير عملتيها روقي

    • إبلاغرد صاحب الحساب

      هذا ديتوكس من السوشال ميديا
      مفروض كل شخص يعمله من فترة لفترة ليركز بحياته ويعيد تنظيم أموره

  • رسالة منشورة

    شوق جد تعبت من السهر ومن ابني حاسه حالي أم فاشله شو اعمل 😭

    • إبلاغرد صاحب الحساب

      يا حبيبتي ربنا يعينك هذا كله أجر بإذن الله 😥❤
      اطلبي من ربنا يعينك ربنا سميع مجيب
      وانت مش أم فاشلة، صدقيني بمجرد هكلتي هم الإشي هذا معناتك أم قوية ومخلصة
      ان شالله بتشوفي ثمرة هالتعب بابنك ربنا يحميلك اياه 😘

  • رسالة منشورة

    صدقت ، لكن في مرحله ما يقترب الانسان من فهم ذاته اذا اقتطع من ايامه وقتها لفهمها ، اما بعد اربع سنوات من التخرج ، هل لدى شوق المزيد؟ يقال ان ما بعد السكون عاصفة قويه!

    • إبلاغرد صاحب الحساب

      لتكشف لنا الأيام ذلك.. :)

  • رسالة منشورة

    تبا لهم ! ما علينا، هل انتهت مرحله البحث عن النفس في توقيتك!

    • إبلاغرد صاحب الحساب

      أعتقد هاي المرحلة ما بتنتهي إلا بطلوع الروح من الجسد
      إنك إن شعرت أنك تملكت نفسك وأمسكت بزمام الأمور، فاجأتك نفسك من حيث لم تحتسب؛ لتعود رحلة البحث والتمكين من جديد
      الإنسان كل ما يتقدم فيه العمر بيصير يكتشف جوانب جديدة تطورت بشخصيته، سواء إيجابية أو سلبية
      وطول ما هو عايش بده يشتغل على تخلصه من السلبية، وتعزيزه ودعمه للإيجابية. :)

  • رسالة منشورة

    شوق ، مضى وقت طويل ! تبا لحظر الاسك 🙃

    • إبلاغرد صاحب الحساب

      مع انه كان اله فوائد جد، زي حساب قطوف من الآسك، بس أعتقد الحكومة شافت انه مساوئه أكثر.
      أغلب هاي المواقع انحظرت بكثير دول، لانه سمعت في ولد انتحر بسبب التنمر يلي تعرضله من مواقع مشابهة.

  • رسالة منشورة

    شو اخبارك

  • رسالة منشورة

    كيف حالك يا شوق

    • إبلاغرد صاحب الحساب

      الحمدلله بخير، انتِ كيفك؟