خلّي رسالتك لطيفة وبنّاءة
لن تظهر رسالتك للعامة إلا إذا نشرها صاحب الحساب.
الثانوية العامة من أهم الفترات الصعبة في حياتنا وال انا شخصياً لسة مخلصها والحمدلله ربنا كرمني ب 95% وف البوست دا هتلاقي كل النصايح والأخطاء والخبرات ال انا مريت بيها شخصياً وال لو انت عندك هدف نفسك تحققه هيكون طريقك ليه ف يلا بينا انا مش هقولك نصائح ولا خطوات تمشي عليها واقولك دي هتوصلك لهدفك لا انا هحكيلك ازاي تمشي وتذاكر طول السنة وتتعامل مع كل الظروف والمتغيرات ال ممكن توقفك لأني حقيقي سمعت نصايح كتير جداً لكنها مكنش ليها لازمة لما كنت بقع ف مشكلة بس أهم نصيحة اثرت معايا هي الدافع وال هنكلم عنه كمان شوية بداية ف الثانوية العامة عاوزاك تشد ف الأول وف النص وف الأخر واللحظة ال بتمر عليك ف الثانوية العامة قيمتها من دهب ومش هتعرف دا غير بعد اما تخلص امتحانات ونتيجتك تظهر ومتقولش ان المادة دي انا شاطر فيها ومش هتكون اول اهتمامتي لا كل المواد عندك ذاكرها بنفس القدر وخليك متميز فيها لأن مادة واحدة تقدر تبوظلك المجموع زي ماحصل معايا وقفلت ف كل المواد والانجليزي نقصت فيه 14 درجة خلوني اجيب 95 % ف كل المواد عاملها بنفس القدر من الاهتمام اول 4 شهور من الثانوية العامة هما اهم 4 شهور حرفياً ف علشان كدا لازم تبدأ وتشد من الأول وتخلص المناهج بتاعتك علي شهر 1 او تحديداً اجازة نص السنة بحيث الوقت ال هيكون فاضل تحل كتير فيه وتراجع فيه وتثبت المعلومات ال ذاكرتها ومتقولش المدرسين هيراجعوا لا معظم المدرسين هتلاقيهم بيكروتوا ف المراجعة ف لو انت مش مذاكر مش هتقدر تلم حاجة الا بصعوبة ومش هتحل كتير وهتيجي تلاقي نفسك اتزنقت ف اخر كام شهر ومتذاكرش غير من الكتب لو نفسك توصل لهدف كبير انا كنت بذاكر من كتاب الامتحان ف كل المواد وملازم المدرسين مكنتش بهتم بيها وك مثال مادة زي التاريخ دخلت الامتحان خرجت مقفله رغم ان الناس كلها كانت بتعيط منه لكن هو مخرجش من الكتاب والكتاب فيه مميزات كتير جداً ومستحيل هتلاقي معلومة مكتوبة ف كتاب الوزارة مش موجودة ف الكتاب الخارجي ف حاول بكل الطرق تبعد عن مذكرات المدرسين لأنها هضرك اكتر م هتفيدك ومش معني اني بقولك تشد انك تموت نفسك وكل الكلام دا لا انك تشد ف اقصد بيها تعمل ال عليك كويس ف طبعاً هتسالني اعمل ال عليا ازاي ؟ بص ياسيدي وبصي انتي كمان تعمل ال عليك ف أول حاجة لازم تيجي ف عقلك انك متراكمش دروس وراك النصيحة دي انت سمعتها كتيييير عارف بس هي أهم نصيحة ف لو عملت كدا فعلاً ف أنت كل مدي هتلاقي ان كل حاجة بتتسهل معاك والضغط تدريجياً بيقل والكلام ال جاي هتفهم منه أكتر أول 4 شهور مشمهم تحل أكتر من إنك تحفظ المنهج المقرر عليك وتخلصه علي شهر 1 وقتها باقي السنة هتحل فيه براحتك وكمان هتراجع وتثبت معلوماتك ف متركزش ف بداية السنة انت بتحل قد ايه لا ركز انت بتخلص قد ايه ومتراكمش دروس عليك الموضوع هيكون صعب في البداية وانا شخصياً كنت شايفه صعب لكن ديماً كنت اسمع ان لما اوصل لشهر 1 مخلص المنهج هرتاح جداً وقد كان ودا ساعدني كتير جداً سواء ف اني احل او اراجع او احس براحة ومكونش قلقان ان الامتحانات بتقرب و كمان هتيجي تحفظ هتلاقي نفسك بتنسي ال حفظته ف متخافش دا طبيعي هتحفظ وهتنسي هتحفظ وهتنسي لحد ماتوصل لمرحلة انك تبص للكلام ف تسمع الصفحة كلها وهتحل وتغلط وهيفضل الموضوع يكرر معاك لحد ماتوصل لمرحلة انك مبتغلطش متقلقش السنة هتكون طويلة معاك وهتراجع وتحل فيها وتعمل كل حاجة بس شرط إنك تستغلها وتستغل الوقت فيها صح مش معني إني بقولك شد ف الأول وف الأخر وف النص إنك تقفل بقا ع نفسك ومتنزلش تلعب ولا تخرج مع صحابك لا انا بقولك اهو عييش لكن وانت مخلص ال وراك يعني النهاردة مثلا وراك تذاكر درس ف كل مادة بحيث تروح تسمعهم يبقا تذاكرهم وتخلصهم وتذاكرهم " بضمير" وركز جداً علي كلمة بضمير دي بعدين خد وقت الراحة ال انت عاوزه المهم تكون مخلص ال وراك "لتاني مرة" اللغات * بص يابني او يابنتي اللغات ف الثانووية العامة اهم حاجة خصوصا الانجليزي طيب هتسال هي اهم ف ايه ؟ هقولك انك بعد م تخلص الثانوية هتلاقي معظم الكليات بتطلب انك تكون جايب درجة عالية ف الانجليزي زي السن هتقولي م انا لو جايب مجموعها هخشها هقولك اه بس مش هتخش افضل الاقسام فيها زي اداب زي اعلام انجليزي زي تجارة زي تربية كمان هتلاقي اقسام جوا الكلية مستحيل هتدخلها وف كليات بتطلب مجموع لغاتك التلاتة ال هي عربي وانجليزي وفرنساوي ف لازم تتعب فيهم كويس لأنهم هيفدوك ف المجموع جداً وزي م قولتلك متهتمش بمادة ع حساب التانية ذاكر كل المواد واتعب فيها بما يتناسب معاها النصيحة الأهم من وجهة نظري الصحاب متصاحبش شخص مبيذاكرش شخص مش كويس شخص هيرجعك لورا مش هيساعدك تتقدم لقدام ولو صاحبك كدا ابعد من غير تفكير ومتقولش هتحاول تغيره لا هو ال هيغيرك ولو محصلش ف هيضيع وقتك وهتلاقي نفسك ضعت ودا حصل معايا شخصياً وحاولت لقيت وقتي بيضيع وهو مش ف دماغه وحلمي بيروح مني تدريجياً ف لازم تبعد عن اي صاحب او اي حاجة عامة ممكن ترجعك لورا وياريت تقلل الصحوبية ف توقيت الثانوية العامة لأني ضررها أكتر من نفعها بكتير الثانوية العامة فيها مشاكل كتير وهتلاقي نفسك بيحصلك ف اوقات كتير اكتئاب هتلاقي مدرس بيضايقك مشاكل ف البيت ايا كان ايه ال هيضايقك بص اول حاجة هتيجي ف بالك انك متذاكرش وتمسك فونك بقا تتفرج ع افلام تخرج تصاحب حد سئ ف يدفعك معاه للأسوأ دي كلها هتكون اعراض بس لو عندك هدف افصل افصل افصل لأنك هتيجي ف الاخر هتفوق وتندم بس الوقت هيكون اتاخر افصل بين اي حاجة وبين مذاكرتك مذاكرتك دي لازم تكون ركن اساسي من اركان حياتك متاجلهاش ابدا ومتخليش مشاكلك تتغلب عليك انت الاقوي ردد ديماً إنك قدها وإنك قد كل حاجة ادي لنفسك الأمل ادي لنفسك الطاقة ادي لنفسك الدافع ال يخلي عندك شغف وانت بتذاكر خليك ديماً طموح ومتوقفش طموحك هيمر عليك اوقات ضعف اوقات هتجيب درجات وحشة ف امتحاناتك معني كدا انك فشلت ؟ لا طول م في وقت طول م انت قادر انا لميت المنهج كله مراجعة ف شهر رمضان وحليت عليه وعملت معجزات ف شهر رمضان وكل دا من غير م افطر يوم الحمدلله ووانا صايم وكان معظم مذكرتي الصبح ف طول م انت معاك وقت ولو ثانية ف انت قادر تحقق المعجزات فيها بص انا مش هقولك نظم وقتك واعمل جدول وكل الكلام دا لأننا مبنمشيش عليه وحاولت طول الثانوية انظم وقتي وكل دا لكن كنت بفشل ف انت اول لما تيجي من الدروس نام شوية وارتاح وقوم خلص ال وراك وافصل بين كل مادة ومادة واول لما تخلص ال وراك خدلك راحة ترفه بيها عن نفسك بأي وسيلة بقا خلاص انت خلصت ال وراك وطول م انت مبتاجلش حاجة طول م هتلاقي الدنيا كلها ماشية تمام معاك النصيحة الذهبية بالنسبالي انك تقرأ كتاب "العادات السبع للمراهقين الأكثر فعالية" ل شين كوفي الكتاب دا تحديداً كان من أهم العوامل ال كانت بتجدد جوايا الدفع والكتب جواه قصص ومعاني كتير جداً وكان ف جملة قرأتها فيه فيما معناها انك عشان تحقق هدفك لازم يكون عندك تحمل وطول م عندنا تحمل طول م احنا قادرين نحقق هدفنا والثانوية العامة محتاجة صبر وتحمل وجلد للذات وترفع عن اللذات طبعاً انا قولت هكلم عن الدافع ف الاخر وكل ال فات دا يعتبر تعريف للدافع بص يابني وبصي يابنتي طول ماعندكوا الدافع طول ماهتكملوا طول ماعندكوا هدف طول ماهتتعبوا عشانوا ف انت اقعد فكر ف هدفك اكتبه ف كتبك ف كشكولك ف اوضتك ع مكتبك وكل يوم قبل ماتذاكر فكر فيه وف قد ايه هتكون فرحان لما توصله انا كان هدفي اعلام كنت بحارب عشانها كنت ف عز تعبي بناضل عشانها وفرحتي ب اني ربنا كرمني بيها كانت اعظم حاجة واحساس حرفياً مقدرش اوصفه كان عامل ازاي اخر واهم حاجة ودي تكون اول حاجة بالنسبالك قرب من ربنا وخليك ديما علي مسافة قريبة منه ادعيله بكل ال بتتمناه بكل دعوة ف قلبك متغضبش ربنا واقرا قرآن كتير وروح صلي ف الجامع متقولش هضيع وقت علشان المذاكرة بالعكس انا كنت بروح اصلي وارجع الاقي ربنا باركلي ف ال ذاكرته وسهلي مذاكرة ال فاضل وطول م انت قريب من ربنا هتلاقي نفسيتك مرتاحة وهتلاقي السهل بقا اسهل والصعب بقا مفيش اسهل منه الثانوية العامة سنة سهلة وبسيطة جداً متخفش من كلام أي حد عنها انت تقدر انت قدها خليك واثق من دا وطول مانت قريب من ربنا وبتعمل ال عليك طول م ربنا هيكرمك ويحققلك كل ال بتتمناه .
لا توجد حسابات جديدة بصور حاليًا.