شو حاب تحكي؟

خلّي رسالتك لطيفة وبنّاءة

صورة، صوت أو فيديو · حتى 10 MB

لن تظهر رسالتك للعامة إلا إذا نشرها صاحب الحساب.

أسئلة المستخدم

لم ينشر أسئلة بعد.

الرسائل المنشورة

  • رسالة منشورة

    كالعاده قاعده قدام التليفزيون ، الجو سقعه جدا والدنيا بتمطر بطريقه غريبه ، وانا قاعده بشرب نسكافيه ومشغله فيلم أجنبي وبتفرج عليه
    والدنيا هاااديه جدا ، وإذا فجأه أسمع طنط مها جارتنا بتصوووت ، أتفزعت وجريت من مكاني أبص من الشباك ، ماما وبابا صحيوا من النوم علي صويتهاا ، ماما خايفه ومش فاهمين حاجه !
    بابا فتح باب الشقه وجري وماما جريت علي إسدال الصلاه ولبسته علي السلم ، انا من الخضه مش عارفه أتصرف إزاي
    كل الي فكرت فيه إني أجري أشوف في إيه
    دخلت أوضتي بجري ، شديت جاكت الترينج من علي الشماعه والطرحه لبست علي السلم انا كمان
    من اللخمه سبت باب الشقه مفتووح
    في دقيقه كنت واصله شقه طنط مها
    بابا واقف واخد عمو محمد في حضنه وبيعيطوا
    ماما واقفه حطه إيدها علي بؤها ومابتنطقش !!
    طنط مها عماله تصوت وتعيط وانا مش فاهمه حااجه
    الناس بدأت تتلم من الصويت ، سكان العماره كلهم نزلوا !!
    ومازلت مش فاهمه حاجه ومش عارفه في إيه !!
    لحد ماسمعت طنط مها بتقول ، ياحبيبتي يا بنتي
    دي لسه ، لسه طالعه من الدرس وقالتلي انا جعانه ياماما
    قولتلها استني بابا زمانه راجع من الشغل وهناكل سوا ، قالت لي انا هانام لحد مايجي صحيني ..
    ودخلت تنااام ، بس نامت للأبد
    مااتت قبل ماتاكل !! وكملت صويت
    بس انا تنحت شويه ، ماتت مين دي الي ماتت !!
    انا مش مستوعبه ، حاسه إني باحلم ، مصدومه
    أيه ماتت ، إزاي ؟! دي لسه صغيره ، دي لسه ما كملتش 20 سنه !! دي خلاص كان فاضل شهرين علي امتحانات الثانويه العامه وتدخل الكليه !!!
    مرت كل حاجه بسرعه ، الدنيا هديت نوعا ما ، الناس بصراحه ما سابوش طنط مها ولا عمو محمد
    بدأو يتحركوا ، منهم اللي راح يطلع تصريح الدفن
    واللي أتصل بالمغسله تيجي ، واللي راح المسجد جاب الكفن والمغسله اللي بيغسلوا عليها . .
    الوقت عدي جري وفجأه بقت الساعه 9 ، أحمد إبن عمو أيمن جارنا جاب تصريح الدفن
    وطنط اللي هاتغسلها جت ومستنيه يجهزوها !
    مش عارفه يجهزوها إزاي بس أنا سمعتها بتقول لمامتها إنت جهزتيها ولا لا ؟!
    فمامتها قالتلها هادخل أجهزها ، ولقيت مامتها بتنادي على يا أميره .
    كنت خايفه ومرعوبه انها تطلب مني اللي خايفه منه !!
    فرديت عليها بخوف ، نعم ياطنط مها !
    واللي خفت منه حصل ، لقيتها بتقولي تعالي معايا نجهز أيه سوا ، دي أختك ياحبيبتي ، مااقدرش أدخل عليها حد غريب !
    وطبعا في الظروف اللي طنط فيه ووجعها دا ، ماكنش ينفع اقول لا
    كنت ماشيه ببطئ شديد ، عاوزه الأرض تنشق وتبلعني قبل ما اوصل للاوضه !
    وصلت طنط فتحت الباب ، دخلنا ، شديت الملايه من علي وشها ، شهقت واترعشت ، بس اناحاولت اصبرها ، وانا عاوزه اللي يصبرني اصلا
    المفاجأه إن أيه لابسه هدوم الخروج ماغيرتش
    الميك أب لسه علي وشها ، لابسه بنطلون إسكيني إسود
    وبدي بكم لونه فيروزي ، اللون اللي كانت بتحبه !
    طنط جابت بطانيه كبيره وغطيتها
    بدأت تقلعها هدومها ببطئ وانا بساعدها
    انا كنت حاسه ان الساعات الي عدت في دقايق من شويه
    بتعدي دلوقتي في سنين !! بدأنا نحاول نقلعها البنطلون ، كان ضيق لدرجه اننا فعلا مش عارفين نقلعهولها خالص
    بس ربنا يسر ، وجهزناها !!
    خرجت وانا في حاله ذهول تاام ، مابنطقش ومش عارفه اتلم علي اعصابي ! كنت كأني بحلم ، يارب افوق
    دخلت طنط اللي بتغسل ومعاها مامتها وماما
    بدأوا حوالي الساعه 9 ونص ، خلصوا علي 11
    كل دا وانا حاسه اني باحلم ، انا خلاص شويه وماما هاتيجي تصحيني وتقومني من النوم !!
    بدأ المسجد ينادي علي صلاه الجنازه ! عشان هايصلوا عليها الظهر
    ماما فتحت الباب ونادت علي بابا عشان يجيب الصندوق ويشيلوها وقفلت الباب
    شويه ولقيت طنط اللي بتغسل بتفتح الباب وبتناديلي
    روحتلها ، نعم ياطنط ؟!
    قالتلي مامتك بتقولك هاتي من علي الحبل الكبرتايه !
    روحت وجيبتها ورجعت ، وانا بديهالها
    سألتها ، هو انتوا ليه عاوزين كبرتايه ؟!
    قالت لي عشان نسترها بيها !! قولتلها تستروها ازاي يعني !
    مش إنتوا كفنتوها خلاص ؟!
    فردت ااه ، بس برضه القماش ممكن يشف تفاصيل جسمها
    فبنرمي عليها كبرتايه عشان نسترها ، وعشان ما حدش من الرجاله يشوف اي شئ في جسمها .. وقفلت الباب !
    خلصت ومحارمها طلعوا يشيلوها ، نزلنا صلينا صلاه الجنازه
    العربيات بدأت تتجمع للمقابر ، انا روحت لماما
    ماما انا مش هاروح مقابر تحت اي وضع !!
    قالت لي خلاص انت حره
    اطلعي روقي شقه طنط مها واعملي اكل عشان الناس اللي هاتيجي من البلد
    طلعت فعلا بدأت اروق ،دخلت غرفه ايه
    الدولاب مفتوح ، هدومها شكلها جميل
    الوان واشكال ، بناطيل مقطعه وبناطيل اسكيني
    بديهات والتسريحه مفروشه بالميك اب والبرفانات
    ايه مشيت ! ايه سابت كل الهدوم دي
    سابت البناطيل الجميله الي كانت بتلف علي المحلات عشان تجيبها ، والميك أب الي كانت بتدفع فلوس فيه بالعبيط
    اتكفنت بقماشه بيضا في الاخر وهاتروح القبر لوحدها !
    طب وهو انا اختلف عن ايه في ايه ؟!
    ما انا لبسي كله بناطيل وبديهات ضيقه ! انا مابسترش نفسي اصلا ، كل تفاصيل جسمي باينه !
    مابعرفش انزل من غير ميك أب وبرفان جايب لاخر الشارع
    هي سابت كل دا ومشيت ، انا كمان هايجي يوم واسيبهم وامشي
    معرفش امتي ودي المصيبه ! اني ممكن اموت في اي وقت
    لما بنبقي في امتحان ، بنبقي عارفين الورقه هاتتسلم امتي ف بنستعد وبنخلص كل الإجابات قبل الوقت كمان عشان نبقي جاهزين ، بس واحنا عايشين مانعرفش الورقه هتتشد امتي ، ممكن دلوقتي ممكن بعد ساعه ، ممكن بعد يوم ، الله اعلم
    بدأت أفوق ، ماهو أنا لازم افوق ، الناس قربت تيجي وانا لسه مخلصتش حاجه ، شيلت المغسله الي كانت ايه بتتغسل عليها ، مسحت الميه ، وفرشت السجاده ، الشقه برا كانت نظيفه ، هاعمل أكل إيه ؟! انا مش فيا حيل اعمل اي حاجه ، مسكت التليفون ، كلمت المحل الي جنبنا طلبت أكل يجهز بعد ساعتين ، وقولتله لما بابا يجي من الدفن هايحاسبك !
    الوقت عدا بسرعه ، بسرعه البرق ، خلاص دفنوها ورجعوا
    سابوها في القبر لوحدها ، يارب هون ياارب
    إستأذنت أمي إني هاروح أغير هدومي وأرجع
    روحت شقتنا دخلت ، وقفت قدام المرايه الي في وش الباب
    بدأت ابص لهدومي ، جسمي وتفاصيله ،هو انا فعلا مستوره ؟!
    ولا مستنيه أتستر غصب عني لما اموت !! اااه مش قادره
    جريت علي التليفون كلمت ايات ، اول واحده جت في بالي
    ايات بنت معايا في الكليه ، منتقبه ، جميله وهاديه ، بحسها شبه الملايكه ، كانت دايما بشوفها بتوزع ورق علي البنات
    كنت ببعد عنها عشان كانوا بيقولوا عليها متشدده ، مع اني كنت بحسها بتحاول تقرب مني !
    كلمتها
    الو ، أيات أنا أميره فكراني ؟!
    اااه طبعا فكراكي ، اتبسط جدا جدا اني سمعت صوتك
    عامله ايه ؟!
    بدأت أعيط ، اااه انا مش بعيط انا بصوت ، انا جوايااا رعب !!
    ايات انا عاوزة اشوفك حالا
    انا جيالك البسي ، وقفلت
    قمت لبست ، لبست عبايه ، مكنتش،مستحمله البس بنجلون
    طب ولو مت هيفضلوا يطلع عينهم عشان يقلعوني البنطلون زي ايه ؟!
    لقيت ايات بترن ، نزلتلها
    خدتني في حضنها ، قعدت اعيط ، مكنتش بعمل حاجه غير اني بعيط ، مش عارفه انا زعلانه علي ايه ولا زعلانه علي نفسي ولا خايفه من الي ايه هتشوفه ؟!
    قولت لها هانروح فين ؟!
    قالت لي هانروح علي أقرب مسجد نقعد فيه
    روحنا المسجد ، المسجد اللي صلوا عليه علي ايه !
    قعدت حكيت لها كل شئ
    فردت بهدوء وقالت لي فعلا وكفي بالموت واعظا
    عارفه يا أميره ، الموت دا الحاجه الوحيده الي حقيقه في حياتنا ، الحاجه الي ماينفعش تتأجل ، ماينفعش نهرب منها
    الحاجه الي فيها اختيارين بس ياجنه يا ...... ربنا يسلمنا !!
    مافيش حاجه بتحصل صدفه يا أميره ، ربنا قدر موت ايه ربنا قدر ودبر انك تحضري كل دا ، وربنا اللي خلي مامت ايه تناديلك عشلن تدخلي بنفسك ، عشان يفرجك علي النهايه
    علي النهايه الي احنا كلنا هانقابلها
    بصي يا أميره لما السخان عندنا بيبوظ بنروح ندور علي شركه الصيانه لانهم هما اللي صنعوه والصانع أعلم بصنيعته !
    وهكذا ربنا لما فرض الحجاب مش عشان يخنقنا او يعذبنا ، حاشاه ، بس عشان احنا صنيعته وهو أعلم بعباده
    ربنا فرض عليك الحجاب عشان يحفظك ويصونك ويسترك ، وعشان انت كمان بجسمك بتفاصيله فتنه للشباب وبتفتنيهم ، والحجاب مش طرحه ، زي ما العربيه مش ابواب بس
    الحجاب ليه صفات معينه ، لا يصف لا يشف ، ليس لباس كافرات ،ليس زينه في أمره ، وهكذا
    انت لبسك مابيستركيش ، انت كل تفاصيل جسمك الرجاله عارفينها ، انت طول ما انت ماشيه في الشارع كل واحد بيتفرج علي جسمك في موازينك يا أميره ، الأمر فعلا مش سهل
    الأمر مش هين يا أميره عشان نستهون بيه ونعدي حياتنا ، واحنا ڤاترينه للشباب وإنت عارفه إننا فتنه ليهم !!
    مش سهل إنك لما تنزلي مشوار لحد الجامعه كل بصه علي جسمك في موازينك أحسبيها بقي !!
    كدا كدا هاتتستري ، الكفن ٣ طبقات يا أميره ، إتستري بمزاجك ، أحسن مايسترك ربنا بشرعه غصب عنك بس ساعتها ،هتكون الستاره نزلت
    بكيت ، بكيت علي نفسي ، بكيت علي جسمي بكيت علي الدنيا لأني شوفت نهايتهاا
    أيات إنزلي هاتيلي لبس يرضي ربنا
    أيات من كتر الفرحه قعدت تكبر
    الله أكبر الله أكبر ولله الحمد
    قومي يا أميره إسبغي الوضوء وصلي لله توبه يبدل الله سيئاتك حسنات وكأنك للتو ولدتي 💜!
    ونص ساعه وهارجع
    قومت اتوضيت وصليت ، سجدت وطولت في السجود
    دعيت وبكيت ، يارب رضاك والجنه
    حسيت ب ايات جنبي ، عرفت من صوت بكائها
    أخدت الهدوم ، دخلت الحمام ، لبست
    جابتلي فستان جميل لونه زيتي وعليه خمار بني
    لبستهم حسيت اني فعلا اتسترت ، حسيت اني بقيت غاليه وحره ، كفاية احساس الطمأنينه إنك هتبقي ماشيه مش خايفه تفتني حد ولا إن جسمك يبقي معرض للشباب !!